Чи хөдөө явбал яасан юм" хэмээтэл хариуд нь "Би тэнд очиж зудан дээр зуд болоод яах вэ" гэж хэлсэн гэдэг. Үнэхээр байгалийн гамшигт үзэгдлийг давах гэж ядарч яваа хөдөөний малчид дээр дарга очоод дэм өгөхөөсөө илүү дараа л болно. Түүн шиг зудан дээр "зуд" болсон үйл явдлууд манай улс төрийн хүрээнд идэвхитэй өрнөж эхлээд, бүр эрчээ авчихлаа. Ерөнхийлөгчийн өргөн барьсан Засгийн газрын тухай хуульд нэмэлт, өөрчлөлт оруулах тухай төсөл парламентын босго давж, ирэх пүрэв гаригт эцсийн халэлцүүлгийг нь хийх гэж байна.

    Олны хэлж заншсанаар Засгийн газрын гишүүдийн давхар дээлийг тайлах хууль батлагдвал ямар байдал үүсэх вэ. Засаглалын зөв хэлбэр, парламентыг сонгодог тогтолцоо гэхээсээ Засгийн газрыг огцруулах дүр зураг түрүүлж харагдаад байна. Үнэхээр ч тийм юм. Өнөөдөр манай улсын эдийн засаг хүнд байгааг бүгд мэдэж буй. Өмсөх оймсноосоо бусдыг шахуу үйлдвэрлэдэггүй Монгол орны хувьд газар доорх баялгаа зарж мөнгө олдог ганц улирал нь ирээд байна. Харин энэ үед "Монгол Улсын Засгийн газар долдугаар сарын 1-нд хуулийн хэрэгжилтээр огцорно" гэвэл хөрөнгө оруулагчдад ямар сигнал өгөх вэ.

    Хөрөнгө оруулалтын тухай хуулийг баталсны ачаар арай гэж манайх руу эргэж байгаа гадаадын хөрөнгө оруулагчид шууд л мөнгөө татчихна. Улс төрийн тогтворгүй байдал хөрөнгө оруулагчдын хувьд эрсдэл. Тэд ашиг олохын тулд хөрөнгөө оруулж байгаа болохоос, унах нь тодорхой Засгийн газартай орны юунд нь найдаж хөрөнгөө эрсдэлд оруулах билээ. Өөрөөр хэлбэл, "Давхар дээл"-ийн тухай хуулийн төсөл яг тийм дохиог гадны хөрөнгө оруулагчдад өгч байна.

    Түүнээс гадна хууль батлагдаж, Засгийн газрын дийлэнхийг гаднаас бүрдүүллээ гэхэд байдал одоогийнхоос дээрдэх үү. Бас л баахан албан тушаалын халаа сэлгээ, холио хутгаа. Хоолондоо орж буй хоёрдугаар ээлжийнхэн албан тушаалын бялуугаа хуваахын тулд төрийн алба, улсын өмчит үйлдвэрүүдэд дахин шинэ хуваарилалт эхэлнэ.

    Шинэ хүн сонгогдлоо гэхэд адаглаад ажилдаа сурах, танилцах, дадах гэсээр бас хугацаа алдана. Мэдээж шинэ засгийн эсрэг акц хийгээд, улдаад суучих улс төрийн үйл явдал өрнөж л таарна. Эцсийн дүндээ үүнээс монголчууд л хохироод үлдэх юм. Тиймээс нэгэнт нүүрлэсэн эдийн засгийн зудан дээр улс төрийн зуд нэмж юугаа хийх билээ. Энэ байдлаас гарах ганц л гарц байна. Ухаалаг төртэй болохын төлөө ухаанаа уралдуулсан хэлэлцүүлэг дээр Ерөнхийлөгч "Монгол Улсын Засгийн газар тогтвортой үйл ажиллагаа явуулах ёстой.

    Хэрвээ хуулийн өөрчлөлтөөр Засгийн газрыг огцруулах болбол улс төрийн тогтворгүй нөхцөл байдал үүсгэх учраас хориг тавина" гэж хэлж байсан. Өөрөөр хэлбэл, өөрийнх нь өргөн барьсан хуулийн төслийг хугацааны хувьд тэр хэлбэрээр нь батлахгүй бол, Монгол Улсын Ерөнхийлөгч баталсан өдрөөс нь хойш ажлын тав хоногийн дотор хориг тавих эрхтэй. Гэвч Ерөнхийлөгчийн хоригийг хүлээж авахгүй байх эрх УИХ-д бий. Угаас энэ хуулийн төслийн хэрэгжих хугацаан дээр олонхи биш цөөнх хүчтэй дэмжлэгтэй болчихоод байгаа. Тиймээс улс төрийн тогтвортой байдлын төлөө Ерөнхийлөгч өөрийнхөө өргөн барьсан төслийг УИХ-аас эргүүлэн татахаас өөр боломжит хувилбар харагдахгүй байна. Гэтэл эрхэм төрийн тэргүүнд ийм алхам хийхэд нь хугацаа бас л бага үлдэв. Өнөө маргаашгүй л шийдээ хэлж, шийдвэрээ эс гаргах аваас галт тэрэг хэдийнэ хөдөлж араас нь хэчнээн чанга хашгираад ч зогсоож хүчрэхүй болох юм.