Засгийн газраас АИ92, АИ80 шатахууны Онцгой албан татварыг тэглэж, үнэ дахин нэмэгдэхгүй гэдгийг Ерөнхий сайд У.Хүрэлсүх мэдэгдсэн. Гэвч шатахуун импортлогчид шатахууны үнийг өнгөрсөн долоо хоногт 30-35 төгрөгөөр, хотын захын шатахуун түгээх станцуудад 100 гаруй төгрөгөөр нэмсэн. Энэ асуудлаар Уул уурхай, хүнд үйлдвэрийн яамнаас тайлбар өглөө. Өнгөрсөн долоо хоногийн байдлаар ердийн хэрэглээний 38 хоногийн газрын тосны бүтээг­дэхүүний нөөцтэй байгаа аж. Үүнээс АИ80 авто­бензин 97, АИ92 авто­бензин 36, түлш 33 хоно­гийн нөөцтэй байгаа гэнэ. Энэ талаар тус яамны Түлшний бодлогын газрын дарга Ч.Чулуунбат "Шатахууны үнэ өсөхөд гурван төрлийн хамаарал байдаг. Нэгдүгээрт, дэлхийн зах зээлийн үнийг уул уурхайн яам байтугай Засгийн газар ч тодорхойлж чадахгүй. Хоёрдугаарт, дотоод талаасаа татварын асуудал. Нөгөө талаасаа валютын ханш байна. Дотоод талаасаа Засгийн газар эрх мэдлийнхээ хүрээнд авах ёстой арга хэмжээгээ авч хоёр төрлийн шатахууны Онцгой албан татварыг тэглэсэн. Мөн валютын ханш аажмаар буурах төлөвтэй байгаа. Голлон нөлөөлдөг нь гадаад зах зээл. Өнгөрсөн оны долдугаар сараас эхлээд газрын тосны үнэ тасралтгүй өссөн. Харин өнгөрсөн долоо хоногийн дунд үеэс газрын тосны ханш аажмаар буурч байна. Үүнийгээ дагаад газрын тосны гадаад болон дотоод зах зээл тогтвортой болно. Яамнаас шатахууны үнийг тогтвортой барина. Шатахууны нөөц хүртээмжтэй байгаа” гэсэн юм. Энэ үеэр Уул уурхай, хүнд үйлдвэрийн сайд Д.Сумъяабазар сэтгүүлчдийн асуултад хариулав. 

-"Роснефть” компанитай хийсэн уулзалтын үр дүн гарсан уу?
-"Роснефть” компанитай уулзахад эерэг үр дүн гарсан. Үүнийг хэлэхэд таатай байна. Тодорхой тоо баримтыг шийдвэр гаргах төвшний хүмүүстэй уулзсаны дараа хэлнэ. Одоогийн байдлаар мэдээлэхэд "Роснефть” компани манай улсад ашигтайгаар асуудлыг шийднэ гэдгээ хэлсэн. Энэ сарын 22-27-нд Орос, Монгол улсын Засгийн газар хоорондын хурал болно. Уг хурлаар тус компанийн шатахуун түгээх станцыг оруулах чиглэлийн ажлыг ярина. 
-Та "Шатахууны үнэ нэмэгдэхгүй” гэж хэлж байсан. Яамнаас "Үнэ тогтвортой байна” гэж мэдээлэл хийдэг. Гэвч оны өмнө импортлогчид хорин хэдэн хоног үнээ нэмж, шатахууны  хязгаарлалт хийсэн. Онцгой албан татвар арваад хоногийн өмнө тэглэсэн. Гэвч өнөөдөр дахин АИ92 шатахууны үнийг 100-110 төгрөг нэмсэн байна. Энэ ямар учиртай юм бэ?
-Энэ асуудлаар өглөө яамны шуурхай хурал дээр бид ярилцсан. Зарим дарга нарт үүрэг өгсөн байгаа. Онцгой албан татвар тэглээд байхад үнээ нэмсэн компаниудын үнэ нэмсэн үндэслэл, тайланг шалгана. Дараа нь албан ёсны мэдээлэл хийнэ. 
-Нефьт импортлогч компаниуд дур мэдэн үнээ нэмээд байхад Уул уурхайн яам зохицуулалт хийж чадахгүй юм. Үүнд тайлбар хийхгүй юу?
-Шатахууны үнийн асуудал жил бүр яригддаг. Яагаад шинэ Засгийн газар, салбарын яам компаниудын өмнө ийм хүчгүй юм шиг харагдаад, хариуцлага тооцно гэчихээд тооцож чадахгүй байна гэхээр манай улс шиг стратегийн гол салбараа хувьд шилжүүлсэн улс дэлхий дээр байхгүй. БНХАУ шатахуун болон нефьтийнхээ салбараа 100 хувь төр нь мэдэлдээ авдаг. ОХУ ч бас тийм. Манайх шатахуун, гурил, махны салбараа бүгдийг нь хувьд шилжүүлчихээд хувийн хэвшлийн тоглолтод төр нь орчихсон. Тэгээд аж ахуйн нэгж иргэдийнхээ дунд төр нь зохицуулалт хийж чаддаггүй. Нефьт боловсруулах үйлдвэр бариад шатахуун газрын тосны асуудлаа төр мэдэлдээ авах ёстой гэж бодож байна. Тэгэхгүй болохоор шатахуун импортлогчид хөнгөлөлт чөлөөлөлт, "Үнэ тогтворжуулах хөтөлбөр” нэрийдлээр төрөөс татаас аваад сурчихсан. Энэ нь манай улс хувьчилж болохгүй салбараа хувьчилсантай холбоотой. 2004 онд НИК-ийг хувьчилсан нь буруу байсан. Цаашдаа "Роснефть”-ийг оруулж ирээд төр хариуцаад ажиллах бүрэн боломжтой. Яагаад бид шатахуун импортлогчдын шанаажинд орох ёстой юм” гэв. 
Харин энэ асуудлын талаар Шударга өрсөлдөөн, хэрэглэгчийн төлөө газрын Өрсөлдөөний бодлого зохицуулалтын газрын мэргэжилтэн Б.Наранцэцэгээс тодруулахад "Төрийн байгууллагаас гаргасан "Үнэ нэмэхгүй гэсэн” зөвлөмжийг шатахуун импортлогчид зөрчиснөөр Үндэсний хэмжээний Түлшний бодлогын зөвлөлийг эрхзүйн чадамжгүй гэж олон нийт харж байна. Энэ зөвлөл нь Засгийн газрын тогтоолоор байгуулагдсан. Төр хувийн хэвшлийн төлөөлөгчид байдаг. Ашигт малтмалын тухай хуулинд хүртэл энэ талаар заасан байгаа. Энэ зөвлөлийн шийдвэр нь төрийн байгууллагын шийдвэрт хамаарна. Тэгэхээр Өрсөлдөөний хуулинд зааснаар төрийн байгууллагын гаргасан шийдвэрийг эс зөвшөөрсөн гэдэг үндэслэлийн дагуу зохих ёсны хариуцлага тооцох ёстой. Мөн аж ахуй эрхлэгчдийн тусгай зөвшөөрлийг түдгэлзүүлэх хүртэл шийтгэл ноогдуулна. Бид "Магнай трейд” компанийн эрхийг түдгэлзүүлэх санал Уул уурхай, хүнд үйлдвэрийн яаманд хүргүүлсэн. Гэвч одоо хариу алга байна. "Магнай трейд” Үнийн бодлогын зөвлөлийн шийдвэрийг хоёр удаа зөрчиж үнээ нэмсэн. Шатахуундаа хязгаарлалт хийсэн. Тиймээс олон удаагийн энэ үйлдлийг таслан зогсоохоор манайх эрхийг нь түдгэлзүүлэхээр болсон” гэв. Тус газраас шалгалтын талаарх мэдээллээ нэгтгэж дуусаагүй байгаа тул өөр хариулт өгөх боломжгүй гэлээ. Энэ онд манай улс 8.1 сая баррель буюу 1.1 сая тонн газрын тос олборлож 223 тэрбум төгрөг төсөвт төвлөрүүлэхээр төлөвлөжээ.