МАН-ын дарга М.Энхболд сар гаруйн өмнө Хятадад айлчилсан. Айлчлалын зэрэглэл нь төрийн өндөр дээд хэмжээнд болсон талаар тухайн үед хэвлэлүүд шуугиж байлаа.

Ерөнхийлөгч, УИХ-ын дарга, Ерөнхий сайд биш боловч ийм зиндаанд хүндлүүлж очихдоо томоохон асуудал ярилцсан талаар улс төрийн хүрээнийхэн шивэр авир хийх болов. Тодруулж хэлбэл, Хятадаас ирснийхээ дараахан АН-ын удирдлагууд буюу эрх баригчидтай уулзаж зарим нэг "татгалзахын аргагүй” санал тавьжээ. Тэрээр өөртэй нь буюу МАН-тай аятайхан "харьцвал” нийлүүлэлт нь зогсоод байсан нүүрсийг төвөггүй урагш нь ачуулж байхаа мэдэгдсэн гэнэ. Энэ засгийн толгойны эргээ, шүдний өвчин болоод байгаа асуудал бол яахын аргагүй нүүрсний экспорт билээ.

Тиймээс Ерөнхий сайд Н.Алтанхуяг тэргүүтэй АН-ын дарга нар нэлээд бодсоны эцэст толгой дохиж байгаа бололтой юм. УИХ-ын чуулганы өчигдрийн хуралдаан дээр С.Баярцогт гишүүн "Өнөөдөр бид Эдийн засгийг эрчимжүүлэх төлөвлөгөөг УИХ-аар баталлаа. Үүнийг хэрэгжүүлэхийн тулд Үндэсний эв нэгдлийн Засгийн газар байгуулах шаардлагатай. Яагаад гэвэл бид араас нь Өрийн удирдлагын тухай хуулийн төслийг батлах шаардлагатай. Өрийн хэмжээг бид ДНБ-ний 70 хувьд хүргэхээс аргагүй.

Үүнд зөвшилцөл шаардана. Ардчилсан намын дарга, Ерөнхий сайд Н.Алтанхуяг та МАН-д урилга илгээж, Засгийн газарт хамтрах хүсэлт тавь. Засгийн газрын бүтэцдээ өөрчлөлт хий. 2009 онд монголчууд эдийн засгийн хямралыг богино хугацаанд давж гарч чадсаны цаад шалтгаан нь Ардын нам, Ардчилсан намын хамтарсан Засгийн газар ажиллаж байсанд байгаа юм. Ерөнхий сайд асан С.Баяр 45 гишүүнтэй хэрнээ хамтарсан Засгийн газрыг байгуулж байсан. Одоо тийм биш байна. Тиймээс МАН-ыг Засгийн газарт урьж оролцуулаад хямралыг давж гаръя. МАН-тай өндөр хэмжээний яриа хэлэлцэл хийж байж асуудлыг давж гарна. Хэлэлцээрт орооч гэж хүсч байна...” хэмээв. Хариуд нь М.Энхболд чуулганы хуралдаанаас хэд хоногийн завсарлага авч байгаагаа мэдэгдээд "УИХ дахь МАН-ын бүлгийг бүх зүйл дээр завсарлага авдаг, бойкотолдог гэж байгаа боловч өнгөрсөн оны наймдугаар сарааас хойш эдийн засаг хүндэрч байгааг хэлж, түүнийг даван туулах арга замыг яаралтай хэрэгжүүлэхийг шаардаж ирсэн.

Энэ хүрээнд Засгийн газар, Монголбанкны хамтран хэрэгжүүлж байгаа "Үнэ тогтворжуулах дэд” хөтөлбөрийг зогсоох, Бага дунд орлоготой иргэдийг Хувь хүний орлогын албан татвараас хөнгөлөх, "Чингис бонд”-ын үлдэгдэл, Самурай бондыг төсөвт суулгах, Чингис бондыг Үндэсний аюулгүй байдлын зөвлөлөөс гаргасан зөвлөмжийн дагуу зарцуулах, цалин, тэтгэвэр, тэтгэмжийг инфляцийн төвшинтэй уяж нэмэгдүүлэх зэрэг саналуудыг тавьж ирсэн. Эдийн засгийг идэвхижүүлэх зарим арга хэмжээний тухай УИХ-ын тогтоолын төслийг хэлэлцэх шатанд ч энэ саналуудыг гаргасан. Харамсалтай нь, та бүхэн хүлээж авалгүй бүгдийг унагасан..” гэсэн юм. Энэ бүхэн санамсаргүй "яриа” биш ажээ. Өөрөөр хэлбэл, АН-ынхан МАН-ын хүслийг биелүүлж М.Энхболд нартай хамтран Үндэсний эв нэгдлийн Засгийн газар байгуулах магадлалтай болоод ирж байгаа юм. Ингэснээр урд хөрш рүү нүүрсээ экспортлон, мөнгөтэй болж, эдийн засгийн хямралаас гарна гэж тооцоолов бололтой.

Б.Дамдин-Очир

Эх сурвалж: Зууны мэдээ