Туркийн баруун хэсэгт орших Сома хотын нүүрсний уурхайд дэлбэрэлт болсон. Үүний улмаас олон хүн амиа алдсанд эсэргүүцлээ илэрхийлсэн Анкара, Станбулын хэдэн зуун жагсагчдыг тараахын тулд цагдаа нар нулимс асгаруулагч хий, усан их буу ашиглажээ.

Станбулд жагсагчид Сома дахь дэлбэрэлт болсон уурхайг эзэмшигч компанийн барилгын урд болон төв талбай-Таксимд цугларчээ.

Харин Анкарад ойролцоогоор 800 гаруй хүн Эрчим хүчний яам хүртэл жагссан байна.

Жагсагчид Засгийн газар огцрохыг шаардаж байгаа юм.

Ерөнхий сайд Режеп Таип Эрдоган Албанид хийх айлчлалаа хойшлуулж, Сома хот уруу өчигдөр яаралтай явсан. Түүнийг ирэхэд орон нутгийн иргэд чулуу нүүлгэхийг оролджээ.

Хохирогчдын тоо өссөөр

Дэлбэрэлтийн улмаас амиа алдсан хүмүүсийн тоо 274 хүрсэн. Үүнээс гадна 100 гаруй ажилчид одоог хүртэл ор сураггүй байгаа юм.

Одоогийн байдлаар томоохон аврах ажиллагаа үргэлжилж байгаа бөгөөд хохирогчдын ар гэрийнхэн уурхайн гадаа олноороо цугларч, үр хүүхэд, ах дүүгээ нэхэж байгаа гэнэ.
Уурхайчдын хамаатан садан, ар гэрийнхэнд туслахаар Сома хотод 20 сэтгэлзүйч ирсэн байна.

Хохирогчдын дийлэнх нь анхны тусламж авч чадалгүй нүүрстөрөгчийн дутуу ислийн хордлогын улмаас амиа алдсан.

Одоо нуранги доорх хүмүүсийг аврахын тулд уурхайн гүн рүү хүчилтөрөгч явуулж байна.

Энэ золгүй явдалтай холбогдуулан улс орон даяар гашуудлын гурван өдөр зарласан.

Туркийн Hürriyet сонины мэдээлж буйгаар ослын үед амиа алдсан нэг уурхайчин дөнгөж 15 настай байжээ.

Сомагийн нүүрсний уурхайн уурхайчдын ихэнх нь аюулгүй байдлын дүрэм журамтай хангалттай сайн танилцаагүй байсан гэж Үйлдвэрчний эвлэлийн төлөөлөгчид мэдэгдсэн.

Өнөөдөр Туркийн гол гол үйлдвэрчний эвлэлийн холбоод уурхайчдын ажиллах орчныг эсэргүүцсэн ажил хаялт зарлахыг ард иргэдэд уриалж байгаа юм.

Сомагийн нүүрсний компанийн төлөөлөгчид ослыг мөрдөн шалгах ажил эхэлсэн гэж мэдэгдсэн. Тэдний хэлснээр уурхайд аюулгүй байдлын арга хэмжээ хатуу чанга сахидаг байсан гэсэн юм.

Сома дахь уурхайг эзэмшигч компани болон Туркийн эрх баригч "Шударга ёс, хөгжлийн нам” ард иргэдийн зүгээс ширүүн шүүмжлэлд өртөж байна.

Туркийн Эрчим хүчний сайд Танер Йылдыз, дэлбэрэлт үүссэн газар гал гарсаар байгаа нь аврах ажиллагаанд саад учруулж байгаа гэжээ.

Дэлбэрэлтийн үед газар доор 787 ажилчин байсан. Мэргэлжилтнүүд богино холбоо үүссэний улмаас гал гарч, улмаар дэлбэрэлт боллоо хэмээн таамаглаж байна.

Олон улсын хөдөлмөрийн байгууллагаас (ОУХБ) авсан тоон үзүүлэлтээр Турк улс үйлдвэрийн ослын тоогоор Европт эхний байрт, дэлхийд гуравдугаарт жагсдаг. Ийм ослын улмаас Туркт жил бүр 100 мянган хүн тутамд 18 хүн амиа алддаг. Энэ нь Европын бусад орнуудтай харьцуулахад долоо дахин өндөр үзүүлэлт.

Дөрвөн жилийн өмнө тус улсын Зонгулдак хотын уурхайд 30 ажилчин дэлбэрэлтэд амиа алдсан бол 1992 онд 270 хүн уурхайн ослын улмаас хорвоог орхиж байв.

Зонгулдак хотод дэлбэрэлт болоход Ерөнхий сайд Эрдоган "Үхэл – уурхайчны хувь заяа" гэж хэлж байжээ.

gogo.mn