УИХ-ын 2016 оны улс төрийн тоглолтын гол хөзөр нь шинэ төмөр зам байх нь дамжиггүй. Учир нь Эдийн засгийн хөгжлийн сайд Н.Батбаяр "Төмөр замын шинэ шугам барих тухай” тогтоолын төслийг УИХ-д өргөн барьсан. Үүнээс болж Х.Баттулгыг сайдын албан  тушаалаа өгөхөд хүрлээ гэж таамаглах хүн ч байгаа. Төмөр замын өргөн нарийн царигаас болж улстөрчид иргэдийг залхтал маргалдсан.

Гол  буруутанг нь Х.Баттулга байсан хэмээн дуугаа өндөрсгөн дайрах улстөрч олон бий. Үнэндээ эрх баригч, сөрөг хүчний доторхи бүлэглэлүүдийн  ашиг сонирхлын зөрчил дээд цэгтээ хүрсэн учраас царигийн асуудал наашаа ч үгүй, цаашаа ч үгүй  гацчихсан. Түүнээс ганцхан Х.Баттулгаас болоод экспорын гол нэрийн бүтээгдэхүүнээ тээвэрлэх эдийн засгийн тоолуураа таг зогсоочихно гэж юу байх билээ. Улстөрчид удаан маргалдсан ч шийдэл гаргаж чадахгүй байна гэх шалтгаанаар Засгийн газраас дундын хувилбарыг санал болголоо.  Өөрөөр хэлбэл Тавантолгой, Гашуунсухайт, Сайншанд-Замын-Үүд, Хөөт Бичигтийн чиглэлийн төмөр замыг нарийн царигтай. Харин Могойн гол Эрдэнэт, Тавантолгой-Сайншанд, Баруун урт Хөөт,  Чойбалсан, Хөөт-нөмрөг чиглэлийн замыг өргөн царигтайгаар барихаар болов. "Давхар дээл”  тайлах тухай хуулийн төсөл чуулганы хуралдаанаар бүхлээрээ уначихсан эгзэгтэй үед Х.Баттулга сайдын албан тушаалаа өгөхөө мэдэгдсэн. Үүнтэй давхцаад Хууль зүйн сайд Х.Тэмүүжинг сайдын сэнтийд нь үлдээх үү, явуулах уу гэдгийг ч хэлэлцэж байв. Эцэст нь эрх баригчид нэгийг нь явуулж нөгөөг нь хүчээр авч үлдлээ. Ингэхдээ зүгээр ч нэг явуулсангүй. Байгаль орчин, хүнс хөдөө аж ахуйн байнгын хороогоор Х.Баттулга сайдын огцрох өргөдлийг хэлэлцэхэд УИХ-ын гишүүн Ц.Нямдорж түүн рүү баахан дайрав. Түүнийг төрийн ажил хийхгүй өөрийн Баянгол зочид буудалд амарч байдаг гэж Ц.Нямдорж гишүүн телевизийн камерын өмнө харсан юм шиг хэлэв. Бүр засгаас гарч байгаад баяр хүргэж, Солонгост живсэн "Севол” хөлөг онгоцны ахмад шиг багийнхныгаа орхиод зугтаж байгааг нь тодотгов. Хашир улстөрчийн энэ үйлдлийг учир мэдэх хүмүүс өөр өнцгөөс тайлбарлаж байна.

Түүнийг "МСS” -ийн захиалгаар ингэж агсарч байна хэмээн хэлэх хүн ч байна. Учир нь УИХ-ын гишүүн Ц.Нямдоржийг  "МСS” –ээс байр авсан гэж Х.Баттулга сайд хэлж байсан удаатай. Тиймээс ҮХАА сайдын суудлаас буусныг "Давхар дээл” тайллаа гэж тайлбарлахаас илүүтэй "МСS” энэ удаа яллаа хэмээн харж болох  юм.  Х.Баттулга руу импортын улаан буудай,  төмөр замын цариг, нууц гэрээний асуудлаар байнга давшилж байдаг. Түүнийг Оросын талыг баримтлагч мэтээр ярих нь ч бий. Гэвч өргөн царигтай төмөр зам тавина гэснээс нь шууд ингэж дүгнэх нь өрөөсгөл. Манайх импортын бүтээгдэхүүний 90 орчим хувийг урд хөршөөс оруулж ирдэг. Эдийн засгийн 80 гаруй хувь нь Хятадаас хамааралтай.  Хөрөнгө оруулагчдын олонхи нь урд хөршийн бизнесмэнүүд.  Барилгын салбарын ажиллах хүчин ч тэндээс орж ирдэг. Ийм байхад төмөр замыг нарийн царигаар барих нь үндэсний аюулгүй байдалд хор хөнөөлтэй  гэдэг нь ойлгомжтой. Эдийн засгаас гадна ажиллах хүчнээр орж ирсэн Хятадууд Монгол бүсгүйчүүдтэй гэрлэж байгаа нь цөөн хүн амтай манай улсын аюулгүй байдалд хэрхэн нөлөөлөхийг бодолцож үзэхэд илүүдэхгүй болов уу. Энэ мэт шалтгааныг Х.Баттулга гишүүн  анзаарсан учраас Оросын талыг баримтлагч, урвагчаар дуудуулан байж үзэл бодолдоо бат зогссон болов уу.