Хойд хөршийн нүүрсний экспорт эхний долоон сарын байдлаар 110 сая тоннд хүрсэн нь өмнөх оны дүнтэй дүйцжээ. Монгол Улсын хувьд энэ онд нийт 42 сая тонн нүүрс экспортод гаргах төлөвлөгөөг цаасан дээр зоосон. Оны эхний долоон сарын байдлаар үүний 50 гаруй хувийг нь биелүүлжээ. Чамлахааргүй амжилт мөн үү гэвэл тийм. Үлдсэн хугацаанд төлөвлөгөө биелэх эсэх нь зах зээлийн төлөв, хил гаалийн хүчин чадал, хөршийн хандлагаас шалтгаалахаар байна.

Олон сараар далайн боомт дээр саатсан Австралийн нүүрсний усан онгоцнууд өмнөд хөрш рүү тасралтгүй цувсаар. Тэгвэл хамгийн сүүлийн үеийн мэдээгээр өнгөрсөн сард тус улсын Ньюкасл боомтоор БНХАУ руу экспортолсон нүүрсний хэмжээ эрс өсжээ. Тус боомтын нэг болон хоёрдугаар нүүрсний гарцаар өнгөрсөн сард нийт 10.4 сая тонн нүүрс экспортолсон нь 2018 оны долоодугаар сараас хойших хамгийн өндөр үзүүлэлтэд тооцогдож байна.

Мөн Valata боомт группийн үйл ажиллагаа явуулж буй хоёр нүүрсний гарц Хятад руу өнгөрсөн сард гэхэд нийт 2.97 сая тонн нүүрс экспортолсон нь өнгөрсөн оны мөн үеийн нэг сая тоннтой харьцуулахад 188.7 хувиар нэмэгджээ. Үүнийг зургадугаар сартай харьцуулахад 22.56 хувиар давсан байна. Энэ нь боомтын нийт экспортын 28.4 хувийг эзэлж, дээд амжилт тогтоов. Экспортын хэмжээ нь уруудаж байсан ногоон тив улсын эдийн засагт энэ нь гялтайх  үзүүлэлт.

• Австралийн нүүрсний экспорт ийнхүү хурдтай сэргэсэн нь өрсөлдөгч орнуудын хувьд баярлах мэдээ биш. 

• Өмнөд хөрш 2018 онд хагас тэрбум тонн коксжих нүүрс хэрэглэсэн бөгөөд үүний 64 сая тонныг импортоор хангасан байдаг.

Хятадын нүүрсний импортын дийлэнхийг Индонези болон Австрали эзэлдэг. Харин Австрали Хятадтай ам зөрснөөр нүүрс худалдааны хилийн хориг нь удааширсан. Энэ нь "Эрдэнэс Тавантолгой” тэргүүтэй манай улсын дотоодын компаниудад түүхэн боломж олгож, 2017 оноос хойш төрийн өмч давамгайлсан тус компани гэхэд хоёр жил дараалан ашигтай тайлан гаргаж эхэлсэн юм. Харин өмнөд хөрш рүү нийлүүлэх Австралийн нүүрсний экспорт тасралтгүй нэмэгдсээр байвал оны эцэст төлөвлөгөө тасрах эсвэл зах зээлийн үнэ уруудах болгоомжлол байна.

Нийлүүлэлт нэмэгдэх хэрээр зах зээлийн эрэлт, хэрэгцээ хангагдах, үнэ буурах нь хууль. Хятадын гангийн үйлдвэрлэлд Австралийн сайн чанарын нүүрсний үүрэг, оролцоо их. Хэдий тийм боловч тус улс импортынхоо бараг талыг авдаг орноос зайгаа барьж, янз бүрийн шалтгаанаар хөндийрч чадсан. Тэгсэн ч Монгол, ОХУ гэсэн шинэ нийлүүлэгч байгаа учраас гэдийж, гол импортлогчоо буулт хийхэд хүргэсэн ч байж болох юм. Аль нэг орны хэт хамаарлаас зайлсхийх болсон өмнөд хөрш 2018 онд хагас тэрбум тонн коксжих нүүрс хэрэглэсэн бөгөөд үүний 64 сая тонныг импортоор хангасан байдаг.

Импортын нүүрсний хэмжээгээ жил болгон танахаа мэдэгдсэн Хятадын хувьд аль нэг оронд давуу эрх олгохгүй гэдгээ "Дэлхийн коксжих нүүрс ба зах зээл” олон улсын хурлын индрээс мэдэгдсэн удаатай. Эндээс харахад, Австрали зах зээлд шархаа нөхөхийг оролдох хэдий ч Монгол, ОХУ-ыг чухал түнш хэвээр байлгах стратегийн сонирхол Хятадад бас бий. Дэлхийн уур амьсгалын өөрчлөлтийн эсрэг хамгийн тууштай бодлого хэрэгжүүлж буй тус улс нүүрсний технологийг халж, жижиг уурхайгаа хаах болсон. Нөгөө талд импортоо ч хянаж, хязгаарлах нь нэмэгдсэн.