"Роснефть” Монголын зах зээл дэх хувиа нэмэгдүүлэх, бүтээгдэхүүнээ борлуулах баталгаатай зах зээл авах бол Монголын тал ямар ч саадгүй, найдвартай түлшээр хангагдах юм.

"Роснефть” Монголтой том гэрээ байгууллаа

РИА новости агентлаг

ОХУ-ын нефтийн "аварга загас” болох "Роснефть” Монголд маш том төсөл хэрэгжүүлэх болсноо зарлалаа. "Роснефть” Монголын газрын тосны зах зээлийн 80 хувийг хангахаар болж, зохих гэрээ хэлэлцээрийг ойрын хугацаанд байгуулахаар болжээ. Таван жилийн хугацаатай, 2.3 тэрбум долларын гэрээг Петербургийн олон улсын эдийн засгийн чуулга уулзалтын үеэр хэдийнэ байгуулаад байна. Тус компанийн ерөнхийлөгч И.Сечин Дорнод зүгт буюу Азид анхаарлаа улам бүр хандуулна гэдгээ мэдэгдээд байна.

"Роснефть” "НИК”-д нефтийн бүтээгдэхүүн нийлүүлнэ

Итар ТАСС агентлаг

"Роснефть” компани Петербургийн олон улсын эдийн засгийн чуулга уулзалтын үеэр гадаадын компаниудтай 12 гэрээ байгуулсан дотор Монголын "НИК” компанитай нефтийн бүтээгдэхүүн нийлүүлэх нийт 1.3 тэрбум долларын гэрээ орж байна. Гэрээ ёсоор энэ жилийн зургадугаар сараас 2019 оны тавдугаар сар хүртэл нийт 1.2 сая тонн бүтээгдэхүүн нийлүүлэх юм. "Роснефть” Монголын зах зээлд нийлүүлэх бүтээгдэхүүнээ цаашдаа ч нэмэгдүүлэх зорилготой байгаа бөгөөд Монголын бусад газрын тосны зэх зээлийн компаниудтай ч бас гэрээ байгуулсан. Ингэснээр "Роснефть” Монголын нефтийн бүтээгдэхүүний зах зээлийн 80 хувийг хангахаар болж байна. Ойрын үед дахин шинэ гэрээ хэлэлцээр байгуулна.

"Роснефть” "НИК” хамтран ажиллана

"Нефть Россий” цахим сэтгүүл

Петербургийн олон улсын эдийн засгийн чуулга уулзалтын үеэр "Роснефть” нефтийн бүтээгдэхүүн нийлүүлэх том гэрээг Монголын "НИК” компанитай байгууллаа. Таван жилийн хугацаатай тус гэрээнд "Роснефть”-ийн ерөнхийлөгч Игорь Сечин, "НИК” компанийн гүйцэтгэх захирал Сономцэрэнгийн Алтанцэцэг нар гарын үсэг зурлаа. Гарын үсэг зурах ёслолын үеэр ОХУ-ын Ерөнхийлөгч В.Путин байлцсан байна. "НИК” компани нь Монголын газрын тосны бүтээгдэхүүний зах зээлийн 25 хувийг эзэлдэг компани юм. Гэрээ ёсоор "НИК” компанид 2014 оны зургадугаар сараас 2019 оны тавдугаар сар хүртэл нийт 1.3 тэрбум долларын бүтээгдэхүүн нийлүүлэх болжээ. Энэ гэрээ нь нефтийн бүтээгдэхүүн хэрэглэгч компанитай шууд байгуулснаараа эдийн засгийн хувьд ихээхэн ашигтай боллоо. Игорь Сечин "Монголын зах зээл их ирээдүйтэй. Тийм болохоор манай компани Монголд итгэлтэй, бат бэх байр суурьтай болсондоо их баяртай байна. Бид цаашдаа ч монгол түншүүдтэйгээ харилцан ашигтайгаар хамтран ажиллах болно” гэж мэдэгдсэн байна.

"Роснефть” Монголын нефтийн бүтээгдэхүүн импортлогч компаниудтай гэрээ байгууллаа

Neftegaz.RU Intl мэдээллийн агентлаг

"Роснефть” компани Монголын нефтийн бүтээгдэхүүн импортлогч "Магнай Трейд”, "Шунхлай” компаниудтай бүтээгдэхүүн нийлүүлэх гэрээ байгууллаа. Талууд таван жилийн хугацаатай 1 тэрбум долларын гэрээ байгуулсан байна. "Магнай Трейд”, "Шунхлай” компаниуд Монголын зах зээлийн 28 хувийг эзэлдэг. "Роснефть” өнгөрсөн жилийн гуравдугаар сард Монголд дахь охин компанидаа нийлүүлэх нефтийн бүтээгдэхүүнийхээ хэмжээг 25 хувиар багасгаж, 1.068 сая тонн болгон бууруулахаа зарлаад байсан юм. Мөн Петербургийн олон улсын эдийн засгийн чуулга уулзалтын үеэр "Роснефть” Монголын Газрын тосны газартай хамтын ажиллагааны гэрээ байгуулсан. Гэрээ ёсоор "Роснефть” Монголын газрын тосны салбарын дэд бүтцийн төсөлд оролцох, Монгол дахь нефть, байгалийн хийн орд газруудыг ашиглах талаар хамтран ажиллах болжээ.

"Роснефть” Монголд 1 тэрбум долларын 1 сая тонн нефть нийлүүлнэ

FINAM.RU мэдээллийн агентлаг

"Роснефть” компани Монголын нефтийн бүтээгдэхүүний зах зээлд байр сууриа бэхжүүлж байна. Тус компани Монголын "Магнай Тренд”, "Шунхлай” компаниудтай 1 тэрбум долларын бүтээгдэхүүн нийлүүлэх таван жилийн гэрээ байгуулсан байна. Ингэснээр "Роснефть” Монголын зах зээл дэх хувиа нэмэгдүүлэх, бүтээгдэхүүнээ борлуулах баталгаатай зах зээл авах бол Монголын тал ямар ч саадгүй, найдвартай түлшээр хангагдах юм.

Бэлтгэсэн М.Сугар-Эрдэнэ

time.mn