Хятадын эрчим хүчний нүүрсний импортын хамгийн том эх үүсвэр болох Индонез экспортоо нэг сарын хугацаанд зогсоохоо мэдэгдсэн билээ. Гэхдээ энэ нь БНХАУ-д төдийлөн нөлөө үзүүлэхгүй гэдгийг шинжээчид онцолж байна. Индонезийн Засгийн газар өнгөрсөн бямба гарагт дотоодын цахилгаан станцуудад нийлүүлэлт хангалтгүй байгаатай холбоотойгоор цахилгаан тасалдахад хүрсэн тул нүүрсний экспортоо зогсоож буй талаараа мэдээлсэн.

Индонези нүүрсээ дотоодын зах зээлдээ хямд үнээр борлуулах ёстой гэсэн бодлого баримталдаг бөгөөд үүний хүрээнд олборлогчид дотоодын зах зээлдээ нүүрсээ тонныг нь 70 ам.доллароор борлуулдаг. Хятадын эрчим хүчний эдийн засгийн судалгааны төвийн тэргүүн Лин Боцян  "Зүүн өмнөд Азийн Индонези улс нь  цахилгаан эрчим хүч үйлдвэрлэхэд ашигладаг нүүрсний олборлолтоороо дэлхийд тэргүүлдэг тул уг хориг арга хэмжээ нь нүүрсний үнийг өсгөж, дэлхийн зах зээлийг богино хугацаанд цочирдуулах болно” хэмээсэн байна.

Шиамэний их сургуулийн Эрчим хүчний төвийн тэргүүн Лин Боцян "Индонензоос авч буй эрчим хүчний нүүрс БНХАУ-ын  импортын нүүрсний 10 орчим хувийг эзэлдэг тул тус улсын нүүрсний нийлүүлэлтэд үзүүлэх нөлөө нь хязгаарлагдмал” гэв.

2021 оны сүүлийн хагасаас хойш Хятадын Засгийн газар нүүрсний нийлүүлэлтийг эрчимжүүлэх арга хэмжээ авч, үйлдвэрлэлийн хүчин чадлыг нэмэгдүүлснээр нүүрсний нөөц хангалттай хэмжээнд хүрсэн. Тиймээс  нүүрсний импортын хэлбэлзэл нь дотоодын нийлүүлэлтэд тийм ч их нөлөө үзүүлэхгүй” гэдгийг тодотгосон байна.

Өнгөрсөн оны сүүлчээр Хятадад үүссэн нүүрсний нийлүүлэлтийн хямрал Индонезийн шийдвэрийн улмаас дахин БНХАУ-д тулгарахгүй гэдгийг  тус улсын Нүүрс тээвэрлэлт, маркетингийн нийгэмлэгээс мөн мэдэгджээ.  Ройтерс агентлагийн мэдээлснээр, Индонезийн Нүүрс олборлолтын нийгэмлэг Засгийн газраасаа хоригийг цуцлахыг уриалж, олборлогчидтой  ярилцалгүйгээр шийдвэр гаргасан хэмээн буруутгасан байна. БНХАУ-ын Гаалийн ерөнхий газрын мэдээллээс харахад Хятад  өнгөрсөн оны нэгдүгээр сараас арваннэгдүгээр сар хүртэл 290 сая тонн нүүрс импортлосон бөгөөд үүний 61 орчим хувийг Индонез нийлүүлсэн байна.

"Guosheng Securities” компанийн нүүрсний шинжээч Жан Жинмин "Индонезийн экспортын хоригийн улмаас үүссэн хомсдол нь Хятадын эрчим хүчний нүүрсний нийлүүлэлтийг 5.3 хувиар бууруулна. Австралийн нүүрс хязгаарлагдмал хэвээр байгаа бөгөөд Орос тэргүүтэй бусад орноос импортлож буй нүүрсний хэмжээ ч буурсан учраас үүссэн зөрүүг богино хугацаанд нөхөхөд хэцүү байх болно” гэжээ. 

Өнгөрсөн есдүгээр сард Индонез улс БНХАУ-д 21 сая тонн нүүрс экспортлосон нь шинэ дээд амжилт тогтоолоо. Одоогоор Индонез БНХАУ-ын нүүрс импортын гуравны хоёрыг нь бүрдүүлж байгаа бөгөөд гол нийлүүлэгч орон болж байна.

Австралийн нүүрсэнд хязгаарлалт тавьж, бусад улсаас нүүрс импортлох хоригоо сулруулж байгаа нь Индонезийг Хятадын хамгийн том нүүрсний нийлүүлэгч орон болоход нөлөөлсөн байна. Нэгэн цагт Хятадын хамгийн том нүүрсний импортын эх үүсвэр байсан Австралийн оронд ОХУ-аас авах нүүрсний хэмжээгээ нэмэгдүүлсэн. Сиднейн Технологийн их сургуулийн Австрали, Хятадын харилцааны хүрээлэнгээс арванхоёрдугаар сард нийтэлсэн тайланд дурдсанаар, 2019-2021 онд Хятадын Австралиас импортлосон нүүрсний хэмжээ тэг болж буурсан байна.

Дэлхийн нүүрсний жилийн хэрэглээ ойролцоогоор долоон тэрбум тонн болдог гэсэн НҮБ-ын судалгаа байдаг. Нийт нүүрсний хэрэглээний 75 хувь нь цахилгаан гаргаж авахад зориулагдаж байгаа бөгөөд хамгийн том хэрэглэгч нь БНХАУ, Энэтхэг юм.