БНХАУ-д Монголын коксжих нүүрсний үнэ IX сар гарсаар тонн нь 190 юаниар өсөв
- 2023 оны 09 сарын 23, 05 цаг 19 минут
- 4401
Есдүгээр сарын 20-ны өдрийн байдлаар Монголын V ангиллын түүхий коксжих нүүрсний үнэ БНХАУ-ын Ганцмод боомтод НӨАТ нэмээд тонн нь 1520 юань болсныг “SXCoal” тооцооллоо. Энэ нь долоо хоногийн хугацаанд 90 юаниар, сарын эхнээс 190 юаниар өссөн дүн болж байна.
БНХАУ-д нүүрсний олборлолт буурч, нийлүүлэлт саараад байгаа аж. Нөгөө талаас коксжих нүүрсний үнэ эрчимтэй өссөнөөр эцсийн хэрэглэгчид импортын нүүрс рүү хошуурахад нөлөөлж байна.
Долоодугаар сард БНХАУ-ын Шаньси болон Шэньси мужийн уурхайнуудад болсон ослын улмаас үйлдвэрлэл буурсан бол бусад уурхай хүчин чадлаа давуулан, зөвшөөрөгдсөн хэмжээнд олборлолтоо үргэлжлүүлж байна.
Есдүгээр сарын 18-19-ний өдрүүдэд Монголоос БНХАУ-ын Ганцмод боомтоор нүүрс тээврийн 1000 гаруй автомашин нэвтэрсэн бол 20-ны өдөр 886 автомашин хилээр гарчээ.
"Үүнд Монголын нүүрс тээврийн жолооч нар тээврийн хөлсөө нэмэгдүүлэхийг зорьж байгаатай холбоотой, ойрын өдрүүдэд хэвийн байдалд орно" гэж ӨМӨЗО-ы эх сурвалж мэдээлсэн байна.
Ж.Зоригт
Gogo.mn
Сэтгэгдэл (0)