Эдийн засгийг эрчимжүүлэх төсөл батлагдаад 50 хоног өнгөрч байна. Хөтөлбөрийн хүрээнд Монголын бизнесийн дээд

Энэ үеэр "MCS” группийн ерөнхийлөгч Ж.Оджаргал, Тавантолгой цахилгаан станц төслийн захирал М.Энхсайхан, "UFC” группийн ерөнхийлөгч О.Амартувшин, БНХАУ-аас Монгол Улсад суугаа онц бөгөөд бүрэн эрхт Элчин сайд Ван Шяолүн, "Сэргэн мандалт” группийн үүсгэн байгуулагч Б.Төмөрчулуун нар байр сууриа илэрхийллээ.

Ж.Оджаргал: ТОМООХОН ТӨСЛҮҮДИЙГ ХӨДӨЛГӨХ ЁСТОЙ

-Эдийн засгийн хүндрэл үүсч байгаа учраас манайхаас гадна бусад бүх компанийн хувьд амаргүй байгаа. Гэхдээ бид хямралыг даван туулж чадна. Ингэхэд төр, хувийн хэвшил хамтран ажиллах ёстой. Манай компанийн хувьд аль болох ажлын байраа хадгалж, хийж байгаа хөрөнгө оруулалтуудаа зогсоохгүй байхаар ажиллаж байна. Мэдээж чуулган дөнгөж эхэлж байна. Төр засаг, улстөрчид их ач холбогдол өгч байна.

Би их үр дүнтэй, чухал уулзалт болно гэж найдаж байна. Цаашдаа эдийн-засгийн хүндрэлийг даван туулахад томоохон хэмжээний хөрөнгө оруулалтуудыг яаралтай шийдвэрлэх хэрэгтэй. Их хэмжээний хөрөнгө оруулалт, том төслүүд хэрэгжиж байж, хямралын үед түлхэц болох ёстой. Хэт өндөр хүлээлтийг ард түмэн хүлээгээд байх шиг санагддаг. Ер нь эдийн засгийн 100 хоногт өргөс авсан мэт эрүүл болгоно гэж байхгүй. Сайжруулж болох бүхий л арга замыг эрэлхийлж байгаа гэж харж байна.

М.Энхсайхан: БИЗНЕС ЭРХЛЭГЧДЭД ЗОХИОН БАЙГУУЛАЛТ ЧУХАЛ

-Бид хамгийн гол нь хөлөө олохгүй байна.Төр хувийн хэвшил гэхээр төр нь хувийн хзвшилтэйгээ өрсөлдөх юм шиг хараад, эсвэл бие биендээ садаа болдог зүйл ч юм шиг болчихоод байдаг. Энэ сэтгэлзүйн зөрчил нь хөгжлийн явцад байх ёстой зүйл.Бид энэ үеийг туулаад явж байна.Аль болох хурдан арга зүйг нь олчихвол бүх зүйл сайхан болно. УИХ-аас Эдийн засгийг эрчимжүүлэх талаар 100 хоногийн бодлогын шийдвэр гарсан.

Энэ хүрээнд өнөөдрийн уулзалт болж байгаа. Хамгийн гол нь энэ уулзалт төрийн санаачилгаар бус хувийн хэвшлийнхний санаачилгаар болж байна. Монгол Улсын Ерөнхийлөгч "Хувийн хэвшлийнхэн өөрсдөө бас зохион байгуулалтанд орох хэрэгтэй” гэж хэлсэн нь маш зөв. Төртэйгөө яаж хамтарч ажиллах вэ гэдэг асуудлаа өөрсдөө гаргадаг байх ёстой гэсэн. Үүний эхний алхам нь энэ арга хэмжээ болж байна. Ийм арга хэмжээ цаашид уламжлал болоосой гэж бодож байна.

О.Амартүвшин: ГАДААДЫН ХӨРӨНГӨ ОРУУЛАЛТГҮЙГЭЭР ХӨГЖИХ БОЛОМЖГҮЙ

-Хамгийн түрүүнд бид гадны хөрөнгө оруулалтыг татах ёстой. Гадаад бодлогоо нээлттэй, тогтвортой байлгах шаардлагатай.Өнөөдөр нэг компанитай гэрээ хийдэг, маргааш нөгөөдөхийг нь өөрчилчихдөг. Монголчуудыг эцсийн эцэст Монголын Засгийн газар, Монгол Улс гэж харна. Түүнээс биш аль нам нь засаг барьж байна, аль нам нь үйл ажиллагаа явуулж байна гэдэг нь сонин биш.

Тэгэхээр улс төрийн гол хүчнүүд хоорондоо учир зүйгээ олоод, хөрөнгө оруулагчдын итгэлийг олж авах тал дээр дорвитой, тууштай алхмыг авч хэрэгжүүлэх ёстой. Үүний тулд хоёр том нам маш зөв зүйтэйгээр хамтарч ажиллах хэрэгтэй байна.

Ван Шяолүн: ТӨСӨЛ ХЭРЭГЖВЭЛ ХӨРӨНГӨ ОРУУЛАЛТ САЙЖИРНА

-Өнгөрсөн онд хийсэн санамж бичигт тусгагдсан төслүүд хэрэгжиж эхлэхээр хоёр орны хоорондын хөрөнгө оруулалт сайжирна гэдэгт илтгэлтэй байна. Монгол Улс төвлөрсөн бодлоготой учраас хоорондын харилцаа холбоо болон төмөр замын асуудлыг шийдэх хэрэгтэй байгаа. Бид хамтарч ажиллаж байгаадаа баяртай байна.

Б.Төмөрчулуун: ЧИНГИС БОНДЫН 50 ХУВИЙГ БИДЭНД ӨГӨӨЧ

-Бид Монгол Улсын тусгаар тогтнол, нэр хүнд, аж ахуйн нэгжүүдийн үйл ажиллагаагаар дэлхийн зах зээлээс мөнгө босгосон. Үүнийг буруутгахгүй. Мөнгөний хэмжээний тухайд манай улсад цаг үеэ олсон хөрөнгө байсан. Энэхүү хөрөнгийг Засгийн газар хэнээс ч асуухгүйгээр өөрийн дураар зарцууллаа. Одоо "Чингис" бондын мөнгөний 50 хувь үлдсэн хэмээн ярьж байна. Түүнчлэн хувийн хэвшлийнхэн маш чухал болж буйг хүн бүр ярьж байна. Тэгвэл яагаад арилжааны банкуудтай санамж бичиг зураад байгаа юм бэ. Тэд бидэнд итгэхгүй байгаагийн илрэл гэж харж байна. Бид ачаа үүрэлцэж яваагийн хувьд тэрхүү хөрөнгөөс авах эрхтэй гэж боддог. Учир нь бид эргүүлээд хүүтэй нь төлнө. Тийм учраас улсын баяр наадмаас өмнө аж ахуйн нэгжүүдийн зээлийг яаралтай гаргах хэрэгтэй байгаа юм. Ярьсаар байтал улиг, домог боллоо. Бидний эргэн төлөлтөөр манай улсын мөнгөний ханш тодорхойлогдох юм.