Сүүлийн өдрүүдэд цаг агаар хүйтэрч өдөртөө 8-12 хэм, шөнөдөө хасах хэм хүрснээс нүүрс эрэлт ихтэй байна. Өнөөдрийн байдлаар нэг портер нүүрс 200-300 мянган төгрөгийн үнэтэй байгаа нь иргэдийн санааг зовоох нэг асуудал болоод байгаа юм. Мөн нүүрсний үнийг өнгөрсөн жилийн энэ үетэй харьцуулахад өссөн үзүүлэлттэй байна. Иймд иргэдээс нүүрсний үнэ ханшийн талаарх сэтгэгдлийг нь сонслоо.

Чингэлтэй дүүргийн иргэн Л.Цэрэннадмид: ЖИЛД 2-3 ПОРТЕР НҮҮРС ТҮЛДЭГ

-Энэ жил иргэд харьцангуй эрт нүүрс түлж эхэллээ. Сүүлийн хэдэн өдөр өглөө, оройдоо их хүйтрэх болж. Үүнийг дагаад нүүрс, түлээний үнэ өссөн. Манайх ам бүл хоёулаа. Миний тэтгэврээс өөр өрхийн орлого байхгүй. Манайх ер нь шуудайгаар л нүүрс авдаг. Хаяа түлээ, нүүрсний захаас бөөний үнээр нэг шуудай нүүрсийг 2600 мянган төгрөгөөр авч байна. Ганц нэгээр бол 3500-4000 төгрөгөөр худалдан авах юм. Өвөл эхлэхээр өдөртөө нэг шуудай нүүрс түлдэг. Заримдаа хоёрыг ч түлэх үе гарна. Нам даралтын зуух галладаг болохоор тогтмол нүүрс хэрэглэнэ. Жилд 2-3 портер нүүрс түлдэг. Хэмнэж түлээд энэ шүү. Манайх жилд дунджаар 600-900 мянган төгрөгийн нүүрс, түлээ хэрэглэдэг.

Баянзүрх дүүргийн иргэн Д.Ундармаа: НҮҮРС САВЛАГАА БАГАТАЙ ХЭРНЭЭ ҮНЭТЭЙ БАЙНА

-Нийслэлийн гэр хорооллын иргэдийн дийлэнх нь шуудайгаар нүүрс авдаг. Энэ нь түлшээ бөөнөөр нь бэлтгэх санхүүгийн чадамж муу байгаатай холбоотой. Манайх байнга шуудайгаар нүүрс авдаг. Нэг шуудай нүүрс 3500 төгрөг. Хотын захаар үнэ нь өссөн байх юм. Нэг шуудай нүүрс сайн түлдэг айлд бол ганц, хоёрхон удаа хэрэглээд л дуусна. Нүүрс савлагаа багатай хэрнээ үнэтэй байна. Ийм байсан ч иргэд хэрэглэхээс өөр аргагүй болдог. Сүүлийн өдрүүдэд та нар ажигласан бол өглөө, оройдоо гэр хороолол нягт суурьшсан газарт утаа гарах болсон. Энэ нь иргэд нүүрс түлж эхэлсэнтэй холбоотой. Даарч хөрөхгүй нь тулд түлэхээс өөр аргагүй. Нүүрс өндөр үнэтэй байна.

Сүхбаатар дүүргийн иргэн Д.Батжаргал: НҮҮРСНИЙ ҮНЭ НЭМЭГДЭХГҮЙ ГЭХ БАТАЛГАА АЛГА

-Энэ жил иргэдийн хамгийн их санаа зовоож байгаа зүйл бол нүүрс. Нийслэл хотын иргэдийн50-аас дээшгүй, магадгүй түүнээс ч их хувь нь гэр хороололд амьдарч байна. Эдгээр иргэдийн өвлийг өнтэй давах ганц зүйл нь нүүрс. Өнгөрсөн жил "Нүүрс” хөтөлбөр хэрэгжиж иргэдэд хөнгөлөлттэй нүүрс түлээд боломжийн байсан. Харин энэ жил "Нүүрс” хөтөлбөр хэрэгжихгүй болсон юм шиг байна. Энэ нь нэг талаас иргэдийн хохироож байна. Өнөөдөр иргэдийн дунд хөнгөлөлттэй нүүрс хүлээсэн хүн олон бий. Өвлийн идэр ес эхлэхэд нүүрсний үнэ нэмэгдэхгүй гэх баталгаа алга.

Сонгинохайрхан дүүргийн иргэн Э.Түмэнжаргал: НҮҮРСНИЙ ҮНЭ ХАРЬЦАНГУЙ ӨССӨН БАЙНА

-Манайх өнгөрсөн жил гурван портер нүүрс авсан. Энэ жилийн хувьд үүнээс их авах юм шиг байна. Цаг агаарын байдлыг ажиглахад эрт хүйтэрч хатуу жил болох бий гэсэн бодолтой явна. Нүүрс нь үнэ энэ жил харьцангуй өссөн байна. Өнгөрсөн жил нэг портер нүүрсийг200 мянган төгрөгөөр худалдаж авч байсан. Өнгөрсөн долоо хоногт түлээ, нүүрсний захаар явж ажиглахад хамгийн багадаа250 мянган төгрөгийн үнэтэй байна. Үүнийг дагаад модны үнэ бага зэрэг өсчээ. Ер нь нэг өрх айл дунджаар түлээ, нүүрсэнд хамгийн багадаа 650-900 мянган төгрөг зарцуулсан гэхэд хилсдэхгүй болж. Хэрэглээнээс шалтгаалан үүнээс өндөр гарч болно. Захын хорооллын айлууд бүрт хэцүү нөхцөлд өвлийн давдаг. Ер нь нэг өрх айлын өвлийн түлээ, нүүрс худалдаж авах мөнгө орон сууцны айлуудын цахилгааны төлбөрөөс өндөр гарна.

В.Нэргүй