Уул уурхайн салбарт өнгөрсөн долоо хоногт Хэн, Юу хэлсэн талаар танд хүргэж байна. / 2014.10.22- 2014.10.28/

Уул уурхайн үндэсний ассоциацын ерөнхийлөгч Н.Алгаа: Хайгуулын лиценз авах хүсэлт 300 гаруй компани гаргаад байгаа

Хайгуулын лизенз олгоно гэж зарласнаас хойш 300 гаруй компани хүсэлт гаргаж тэмдэгтийн хураамжид тус бүр 250 мянган төгрөг төлсөн. /Ардчилал 2014.10.23197/2076/
Монголын уул уурхайд хөрөнгө оруулагчдын ассоциацийн ерөнхийлөгч  Т.Лхагва: Манай уул уурхайн салбарын үнэлэмж 3-4 дахин унаад байна

Нэг жишээ татахад нэлээд маргаан дэгдээсэн "Саусгоби Сэндс" гэдэг компанийг Хятадын Чалькод худалдах гэж байсан үнэ 900 сая ам.доллар байсан. Гэтэл 30 хувиа энэ жил 50 сая ам.доллараар худалдлаа. Эндээс үзэхэд компанийн үнэлгээ 3-4 дахин унасан байна. Үүнийг Монголын уул уурхайн өнөөгийн үнэлэмж гэж ойлгож болохоор байна. /Ардчилал 2014.10.22 196/2075/
"Тавантолгой" ХК-ийн гүйцэтгэх захирал Р.Сэддорж: Уг нь манайх "жижиг" биш "эцэг" гэгдэх учиртай уурхай байгаа юм  

1997 оны Ашигт малтмалын тухай хуулийн шинэчлэлээр тусгай зөвшөөрлийн талбайн төлбөр нэмэгдэж, эзэмшиж байсан 11350 га/Тавантолгой ордын нийт хэмжээ/ талбайгаас хамгийн ашигтай хэсэг болох 270 га-г авч үлдэн бусад эзэмшлийн талбайгаа улсад түр хүлээлгэн өгч байсан байх юм. Тэр талбайд одоо "Эрдэнэс-Тавантолгой"-н уурхай, Ухаа худагийн уурхайнууд ажиллаж байгаа. Ингээд бодохоор бид жижиг гэж хэлэгдэх биш, харин "эцэг", "эх" гэж хэлэгдэх хэмжээний уурхай юм. /Үндэсний шуудан 2014.10.27 205/2141/
Ашигт малтмалын газрын уул уурхайн газрын мэргэжилтэн Х.Лхагвабаатар: Эрдэсийн үнэ унаснаас шалтгаалж 30-аад баяжуулах үйлдвэр зогссон

Одоогоор ашигт малтмалын газарт 105 баяжуулах үйлдвэр бүртгэлтэй байдаг. Энэ жил 76 баяжуулах үйлдвэр үйл ажиллагаагаа явуулна гэх төлөвлөгөө гаргаж өгсөн. Үүнээс 15 нь үйлдвэрлэлээ эхлэх гэж бэлтгэлээ хийж байгаа. Мөн 30-аад баяжуулах үйлдвэр зах зээлийн байдал, эрдэсийн үнээс шалтгаалж бүтээгдэхүүн үйлдвэрлэхээ түр зогсоосон. үлдсэн нь хөрөнгө оруулалт хайж байна. /Ардчилал 2014.10.24 198/2077/
Геологи, эрдэс зүйн ухааны доктор Ч.Хурц:Бид газар нутгаа өгөх биш баялгаа түрээсэлж ашгаа хүртэх ёстой 

Ер нь уул уурхай хөгжинө гэдэг их сонин зүйл. Эхлээд эрдэсийн түүхий эдээ бэлдэнэ. Дараа нь түүнийгээ дагасан дэд бүтэц байгуулна. Цаг  хугацаагүй, хариуцах эзэнгүй бодлого бол бодлого биш. Хэзээнээс ямар бодлого хэрэгжүүлж хүрэх үр дүн нь тодорхойгүй байгаа юм. Уул уурхайн салбарын олон хууль баталсан. Гэвч энэ тэр асуудлыг ингээд шийдлээ гэсэн зүйл байхгүй. Бид эрдэс баялгийн өмчлөгч. Иймд бусдыг түрээслэгчээр татаж ашгаа хуваах ёстой. Гэтэл манай газрыг ав гэж байгаа юм. Монгол Улсад удахгүй хүнд аюул учирч мэднэ. /Ардчилал 2014.10.23197/2076/
ШУТИС-ийн геологи уул уурхайн сургуулийн профессор Д.Энхбат: Эрдэсийн экспорт төлөвлөж байснаас 2-3 дахин бага байна 

Хөрөнгө оруулалт огцом буурсан. Эрдэсийн экспорт төлөвлөж байснаас 2-3 дахин бага байна. Хэрэв бид эрдэс түүхий эдээ зөвхөн баяжмал хэлбэрээр экспортлоод байвал хоёр хөршийнхөө зах зээлээс үргэлж хамааралтай банйа. Тэд худалдаж авбал эдийн засаг өсдөг үгүй бол хямардаг байдлаас гарахгүй. нэг ёсондоо түүхий эдийн бааз хэвээр үлдэнэ гэсэн үг. /Ардчилал 2014.10.24 198/2077/