Хүйтний ам наашилж хөхүүрийн ам цаашиллаа. Улсын хэмжээнд өвлийн бэлтгэлээ хангаад байгаа бөгөөд энэ өвөл олон жилийн дунджаас ахиу цас орж, эрс хүйтрэхийг цаг уурчид анхааруулж байгаа.

     Мөн өнгөрсөн онд улсын хэмжээнд 45 сая тоо толгой мал өвөлжихөд нэг сая 120 мянган тонн байгалийн хадлан бэлдсэн. Харин энэ жил улсын хэмжээнд 55 сая тоо толгой мал өвөлжих төлөвлөгөөтэй байгаа бөгөөд нэг сая 200 мянган тонн байгалийн хадлан бэлдэхээс гадна өнгөрсөн оны 320 мянган тонн өвс улсын нөөцөд үлдсэн.

    Харин энэ жилийн хувьд  өвөлжилтийн бэлтгэл ажил базаахаар 60 мянган хүн ажиллаж зургаан мянган жижиг оврын техник, машин ажилласан бөгөөд ажил сайн үр дүнтэй дууссан хэмээж буй. Ерөнхийдөө улсын хэмжээнд өвөлжилтийн бэлтгэл ажил дууссан байна. Харин иргэдийн хувьд бэлтгэл ажил хараахан дуусаагүй байгаа бололтой. Гэр хорооллын айл өрхүүдийн өвлийн бэлтгэлийн хамгийн том ажил бол  нүүрс, модны бэлтгэл ажил болоод байгаа юм.

    Нүүрсний хувьд жил ирэх тусам үнэ ханш нь нэмэгдэж байгаа бөгөөд портер нүүрс авахад санхүүгийн хүнд байдал үүсэх хандлагатай байгаа билээ. Гэр хорооллын  айл өрхүүд өвлийг өнтэй давахын тулд мод түлээнээсээ илүүтэй нүүрсийг өргөн хэрэглэдэг. Тийм дээ ч өнөөдрийн байдлаар нүүрсний эрэлт ихсээд буй. Энэ жилийн хувьд өнгөрсөн жилийнх шиг ямар нэгэн "Нүүрс хөтөлбөр” хөнгөлөлт, байхгүй байгаа.

   Өнгөрсөн жилийн тухайд дээрх хөтөлбөрийн хүрээнд нүүрс нэг тонн нь 80 мянган төгрөгөөр  худалдаалагдаж байсан.  Гэтэл энэ төслийг зогсоосны үр дүнд  иргэд хямд нүүрсээр хангагдаж чадахгүй болжээ. Өнөөдрийн байдлаар жижиглэнгийн нүүрсний үнэ жижиг шар тороороо 3000 төгрөгөөр борлуулагдаж байгаа юм байна. Жижиглэнгийнх нь бөөний үнэ 2500 юм байна харин иргэдэд худалаалахдаа 3000 төгрөгөөр худалдаалдаг гэнэ. Үүнээс гадна нэг портер налайхын нүүрс 160 мянган төгрөгийн үнэтэй байгаа бол багануурынх 120 мянган төгрөгийн үнэтэй байна.

   Ихэнх ченжүүд налайхын нүүрсний уурхайгаас нүүрсээ авдаг бөгөөд нүүрсээ жижиглэнгээр зардаг болохоор  портероор буюу нэг тонноор нь авдаггүй, харин гуч машинаар авдаг байна. Энэ жилийн хувьд нэг гуч машин нүүрсээ 600 мянган төгрөгөөр авч байгаа бөгөөд тэндээ бол нэг ковш нүүрс нь 50-60 мянган төгрөгийн үнэтэй байдаг гэнэ.

  Үүнээс гадна налайхын уурхайн нүүрсний  гарц бага, амууд цөөн болсон аж. Иймээс нүүрсээ авах гэж нэлээд юм болдог бөгөөд өнгөрсөн жилийнхийг бодвол нүүрсний бөөний үнэ бага зэрэг нэмэгдсэн талаар ченжүүд хэлж байна. Арваннэгэн сар гарсан гэхэд цаг агаарын байдал харьцангуй дулаан байгаа бөгөөд энэ нь иргэдэд саянаар нөлөөлж буй.

  Учир нь эд хүйтрэх үйд айл өрхүүд нүүрсийг их хэмжээгээр хэрэглэх ба нүүрсний эрэлт улам ихэсч үнэ нь өсөх хандлагатай байгаа юм. Гэхдээ өнөөдрийн байдлаар ханш тэгтлээ өсчөөгүй байгаа бөгөөд иргэд үнэ ханш огцом өсөсхөөс урьтаад бэлтгэлээ базааж буй бололтой. Ямар ч энэ өвлийн бэлтгэл ажил хаа хаанаа дуусах шатандаа орсон буюу зарим нь дууссан байна.