Тэд уул уурхайн салбараас авдагаа аваад одоо салбар уналтын байдалд орсон тул хэрэггүй хог мэт хаяж байгаа бололтой. Энэ мэт ажиллавал хөдөө аж ахуйн салбарыг ч мөн мөлжиж дуусгаад дараагийн салбар руу орох байх. Гэхдээ өнөөдрийн байдлаар хөдөө аж ахуй хөгжих боломж нөөцтэй байгаа бөгөөд улсад ихээхэн хэмжээний ашиг оруулах боломжтой аж.

    Энэхүү салбарыг дагаад үйлдвэрлэл ч бий болох бололцоотой ба үйлдвэрлэл бий болсоноор дотооддоо бүтээгдэхүүнээ боловсруулж дотоодынхоо хэрэгцээг хангахын зэрэгцээ боловсруулсан бүтээгдэхүүнээ экспортод гарган түүнээс ихээхэн хэмжээний ашиг авсанаар манай улсын эдийн засгийн дархлаа сайжирч эхлэх билээ. Үүнээс гадна Монголчууд жилдээ дунджаар 10 гаруй сая ширхэг арьс, шир бэлтгэдгээс дөнгөж 20 хувийг л дотооддоо боловсруулан эцсийн бүтээгдэхүүн үйлдвэрлэж, бусдыг нь гадаадад гаргаж байна. Энэ байдлыг арилгаж, дотооддоо нэмүү өртөг шингэсэн эцсийн бүтээгдэхүүн үйлдвэрлэхийн тулд үйлдвэрүүдийг түүхий эдээр тасралтгүй хангаж, малчид, түүхий эд бэлтгэн нийлүүлэгчдийн орлогыг баталгаажуулах хэрэгтэй гэдэг.

   Тиймээс үндэсний үйлдвэртээ тушаасан нэг ширхэг бодын ширэнд 15 мянган төгрөг, богийн арьсанд 3000 төгрөгийг энэ жилээс олгож эхэлсэн байна. Энэ урамшууллын тогтолцоог цэгцтэй болгохын тулд арьс, ширээ тушаах үндэсний үйлдвэрүүдийн жагсаалтыг Үйлдвэр, хөдөө аж ахуйн яам, Монголын арьс, ширний үйлдвэрлэлийн холбоо жил бүр олон нийтэд танилцуулж байхаар болсон юм.

   Мөн энэ оны эхний хагас жилд 19 аймгийн 29811 малчинд нийт хоёр тэрбум 711 сая 691 төгрөгийн урамшуулал олгоод байгаа бөгөөд хоёрдугаар хагас жилд олгох 300 орчим сая төгрөгийн урамшууллын баримтыг баталгаажуулж байгаа. Өнөөдрийн байдлаар арилжааны банкуудын ХАА-н салбарт оруулсан зээл бүх зээлийн багцын ердөө таван хувийг л эзэлдэг. ХАА-н салбарт орох гадаадын хөрөнгө оруулалт гэж байхгүй боловч, ХАА-н салбар нь улсын ажиллах хүчний 33 хувийг шингээдэг нийгмийн том үр нөлөөтэй салбар.

   Түүнчлэн Монгол Улсын үйлдвэрлэлийн 20 хувийг бий болгодог стратегийн ач холбогдол бүхий салбар боловч энэ салбарт шинэчлэлт хөгжил одоог хүртэл хийгдээгүй уламжлалт аргаараа л урагшилж яваа салбар. Мөн үнээний фирм байгуулах, ХАА-н биржийг идэвхжүүлэх, хүлэмжийн аж ахуйг хөгжүүлэх  шийдвэрүүд нь дотоодын хүнсний аюулгүй байдал, дотоодын хүнсний хэрэглээнд зөв өөрчлөлтийг авчрах юм. Харин ноос ноолуурын салбарыг дэмжсэнээр Монголыг дан ганц уул уурхайгаас хамаарсан улс биш болгож, ХАА-н гаралтай бүтээгдэхүүнээ экспортлох, импортыг орлуулах, экспортыг төрөлжүүлэхэд их чухал ач холбогдолтой  билээ.

    Энэ мэтчилэн хөдөө аж аухйн салбар руу чиглэсэн ажлуудыг хийж хэрэгжүүлэх нь тус салбарын болоод улс орны эдийн засагт сайнаар нөлөөлөх учиртай аж. Гагцхүү буруу бодлого нь уул уурхайн салбарын адил өрөнд орж дуусах аюултай бөгөөд эрсдэлийг нарийн тооцолсон байх хэрэгтэй билээ. Гэхдээ уул уурхайн салбар тэгтлээ доройтчихоогүй байгаа бөгөөд салбарыг сэргээх боломж бий.

   Хэдийгээр ихээхэн хэмжээний өр зээлийн асуудалтай байгаа ч ирэх оны төлөвлөгөөнд энэхүү өр зээлийн асуудлыг цэгцлэх тал дээр анхаарал хандуулан дахин нэмж зээл авахгүй байх нь чухал бизээ. Учир нь өмнө зээлээ төлж барагдуулж дуусаагүй атал дахин зээл авах нь улс орны хөгжилд томоохон саад болсон хэрэг болно. Ямартай ч дээрх хоёр салбарыг хөгжүүлэхэд улсын эдийн засгийн дархлаа сайжирч Монгол улс дэлхийн зах зэлд томоохон тоглогчийн нэг болох боломж бий билээ.