УИХ-ын Эдийн засгийн байнгын хорооны өчигдрийн хуралдаанаар Засгийн газраас өргөн барьсан Тогтоолын хавсралтуудад өөрчлөлт оруулах асуудлыг хэлэлцлээ. Энэ нь Гацууртын алтны ордыг стратёгийн ордод хамруулах тухай юм. Хамгийн анх Хөшөөт, Цайдам нуурын нүүрс, Гацууртын алт, Халзанбүргэдэй, Лугийн гол, Мушгиа худаг, Хотгорын газрын хрвор элементийн ордыг стратегийн ач холбогдол бүхий ордын жагсаалтад оруулахаар УИХ-д өргөн барьсан юм. Гэвч газрын ховор элемэнтийн ордууд нь бүрэн судлагдаагүй, баяжуулах, боловсруулах технологийн шийдэл тодорхойгүй гэдэг шалтгаанаар хассан байна. Мөн Хөшөөтийн нүүрсний ордын тухайд олон улсын хөрөнгийн бирж дээр бүртгэлтэй хөрөнгө оруулагчидтай нь стратегийн ордод оруулах асуудлаар санал нэгдээгүй аж. Учир нь, орон нутгийн зүгээс хөрөнгө оруулагчидтай хамтран ажиллах тохиролцоонд хүрснээр стратегийн ордод хамруулахгүйгээр гэрээ байгуулах ажиллах боломжтой гэж үзжээ. Цаадам нуурын нүүрсний ордын лицензийг эзэмшигч нь "Төр хөрөнгө оруулах, эсвэл Засгийн газар хөрөнгө оруулалтын зээлд баталгаа гаргах юм бол стратегийн ордын жагсаалтад оруулж болно" гэсэн байна. Мөн тогтоолын төслийг УИХ-д өргөн барьсны дараа уг ордыг эзэмшигч компани нь стратегийн ордод хамруулахыг эсэргүүцсэн юм. Харин "Сентерра гоулд" компани лицензийг эзэмшиж буй Гацууртын алтны ордоо стратегийн ордод хамруулах хүсэлтэй байгаагаа Засгийн газарт албан ёсоор илэрхийлсэн байна. Ингэснээр эцэстээ ганцхан Гацууртын алтны ордыг стратегийн ордын жагсаалтад оруулах санал үлдэснийг Уул уурхайн сайд Р.Жигжид танилцуулав. Түүнийг дээрх танилцуулгыг хийсний дараа гишүүд сонирхсон асуултдаа хариулт авахын зэрэгцээ саналаа хэллээ.
Р.ЖИГЖИД: -Гацууртын орд "Урт нэр"-тэй хуульд хамрагдаж байгаа. Харин стратегийн орд нь энэ хуульд хамаарахгүй гэсэн заалт бий. Тиймээс эдийн засгийн байдал хүндрэлтэй байгаа энэ үед стратегийн ордод бүртгэж ашиглах нь зүйтэй гэж үзэж байгаа юм. Одоогийн байдлаар 50 тоннын нөөцтэй гэж тогтоогдоод байгаа. Цаашдаа энэ нөөц нэмэгдэх магадлалтай. Мөн "Сентерра гоулд" компани уг ордыг ашиглахад бэлэн байгаа.
Л.ЭНХ-АМГАЛАН: -"Урт нэр"-тэй хуулиас тойруулахын тулд л стратегийн ордод хамруулах гэж байгаа юм байна шүү дээ.
С.ДЭМБЭРЭЛ: -Стратегийн ордод бүртгэлээ гэхэд төр ямар үүрэг хүлээх юм бэ. Төр хүчээр 34 хувийг нь авах гээд байгаа юм шиг ойлгогдсон. Ер нь лиценз эзэмшигч компаниас нь стратегийн ордод хамруулах хүсэлтээ илэрхийлсэн албан бичиг бий юү.
Р.ЖИГЖИД: -Төр хүчээр тодорхой хувийг нь эзэмших гээгүй. Өөрсдийнх нь гаргасан саналын дагуу асуудлыг оруулж ирсэн. Эхлээд стратегийн ордод бүртгэх эсэхийг нь шийдчихээд дараа нь Засгийн газар УИХ-д дахин төсөл оруулж ирээд ямар хэлбэрээр ашиглахаа шийдэх юм. Ер нь эдийн засагт үзүүлэх нөлөөлийг нь үндэслэн стратегийн ордод бүртгэхээр оруулж ирсэн. Урьдчилсан тооцоогоор жилд улсын төсөвт гурван их наяд төгрөг төвлөрүүлэх юм.
Б.БАТХҮҮ (Уул уурхайн яамны бодлого төлөвлөлтийн хэлтсийн дарга): -Хуучин шороон ордыг нь ашиглачихсан газар учраас шинээр газар хөндөхгүй ашиглагдах орд байгаа юм. Анхны хөрөнгө оруулалт нь 326 сая ам.доллар гэсэн тооцоо хийсэн. Үүнийг төсөвт ачаалалгүйгээр шийдэх юм.
Л .ЭНХ-АМГАЛАН: -Оюутолгой шиг явцын дундаа анхны хөрөнгө оруулалт нь нэмэгдвэл яах вэ. Лиценз эзэмшигч компани нь зээл авч хөрөнгө оруулалт хийх нь ойлгомжтой. Зээл авахдаа Засгийн газраас баталгаа гаргаж өгөхийг шаардвал яах вэ. Төрийг ингэж эрсдэлд оруулж болохгүй шүү дээ. Жижиг орд юм шиг боловч цаанаа том үр дагавартай асуудал шүү.
Д.ГАНХУЯГ:-Нэгдүгээрт, стратегийн ордод хамруулчихаад, хоёрдугаарт, эзэмшлийнх нь хувь хэмжээг тогтооно. Эзэмшлийн хувь хэмжээг нь тогтоох Засгийн газрын тогтоол бэлэн болчихсон байгаа.
А.ТЛЕЙХАН: -Төсөвт ачаалал өгөхгүйгээр ашиглаж, ногдол ащиг өгье гэж байгаа нь зөв. Эдийн засаг хүндрэлтэй байгаа үед үүнийг дэмжих ёстой гэж үзэж байна.
Ж.БАТСУУРЬ:-Төсөвт дарамт учруулахгүйгээр ашиглана гэдэг чинь 34 хувийг нь төрд үнэгүй эзэмшүүлнэ гэсэн үг биш шүү. Үүнийг цаашдаа анхаарах хэрэгтэй. Мөн үүнтэй адилхан "Урт нэр"-тэй хуулийн хязгаарлалтад орчихсон орд газруудыг стратегийн ордод хамруулаад ашиглаад байх юм уу. Ингэвэл "Урт нэр"-тэй хуулийн хэрэг алга.

 С.ШИЙЛЭГТӨМӨР /ҮНДЭСНИЙ ШУУДАН/