Өнгөрсөн долоо хоногт Уул уурхайн салбарт салбарт Хэн, Юу хэлсэн талаар танд хүргэж байна. /2015.01.07-2015.01.13/

Уул уурхайн сайд Р.Жигжид: "Тавантолгой"-д хөрөнгө оруулах консерциум манай талаас тавьсан бүх саналыг хүлээн авсан

Тавантолгойн хэлэлцээр ид үргэлжилж байна. Ажлын хэсэг хоёр хуваагдан ажиллаж байгаа. Эхний ээлжинд "Эрдэнэс-Тавантолгой" Тавантолгой ордын өнөөгийн байдал "Монголын төмөр зам" компани ажлын явцын талаар танилцуулга хийсэн. Харин нөгөө талаас хөрөнгө оруулалтын хэлэлцээр концесийн гэрээнийхээ ерөнхий нөхцөл байдлын талаар танилцуулга хийлээ. Үүний дараа ажлын хоёр дэд хэсэг байгуулаад төмөр зам, ордын ашиглалтын чиглэлээр яриа хэлэлцээр хийж байна. ... Тогтоолд тодорхой заалтууд оруулсан. Жишээ нь 30 жилийн дараа төмөр замын суурь бүтцийнх нь 51 хувийг эзэмшинэ гэдэг ч юм уу. Эсвэл Чалькогийн өрийг шийдвэрлэх гэдэг ч юм уу. Үүнийг ерөнхийд нь хөрөнгө оруулагч тал хүлээн авсан болохоор энэ консерциум шалгарсан гэж ойлгож байгаа. /Монголын үнэн 2015.01.09 005/

Монгол улсын сайд М.Энхсайхан: Тавантолгойтой адилхан төсөл Оросууд хэрэгжүүлж байгаа учраас бид цаг алдаж болохгүй

Бид цаг алдаж болохгүй. Яг Тавантолгойтой адилхан ийм уул уурхайн төслийг манай хойд хөрш хэрэгжүүлж байгаа. Бид өөрсдийн боловсруулалт, бүтээн байгуулалтын ажлаараа тэднээс хол хоцорсон явж байна. Тиймээс цаг хожиж, энэ өрсөлдөөн дунд Тавантолгой гэдэг том ордыг ашиглах хэрэгтэй. Зөвхөн гадаад нөхцлөөс гадна дотоод хүчин зүйл гэж байна. Өнөөдрийн байдлаар манай эдийн засаг, санхүүгийн нөхцөл байдал хүндхэн байгаа. Тиймээс өмнөө тулгарсан олон асуудлыг шийдэхэд Тавантолгойн төсөл чухал үүрэг гүйцэтгэнэ. /Монголын үнэн 2015.01.13 №007/

"Эрдэнэс-Тавантолгой" компанийн уул уурхайн стратеги төлөвлөлтийн газрын захирал Б.Гантулга: "Эрдэнэс-Тавантолгой" дээр экспортлоход бэлэн 2.3 сая тонн нүүрс байна

Уурхайн нүүрсний агуулахад экспортлоход бэлэн 2.3 сая тонн нүүрс байна. Олборлоход бэлэн гэвэл 1.7 сая тонн нүүрс бий. Өнгөрсөн оны хувьд экспортод хамгийн их хэмжээний нүүрс гаргалаа. Олборлолтын хувьд өмнө нь нилээд хэмжээгээр хийсэн байсан л даа. Өнгөрсөн жилийн хувьд компанийн хэмжээнд нийт 4.5 сая сая тонн нүүрс олборлосон гэсэн статистик үзүүлэлт бий. /Өдрийн сонин 2015.01.08 004/

Эрдэнэс-Тавантолгой компанийн борлуулалтын маркетинг, ложистикийн газрын дарга Б.Батбилэг: "Эрдэнэс-Тавантолгой" компани Хятадын коксжих нүүрсний импортын 10 хувийг нийлүүлсэн

Өнгөрсөн онд Хятадын нүүрсний импорт 60 саяд хүрсэн. Өөрөөр хэлбэл Хятадын нүүрсний импортын 10 орчим хувийг Эрдэнэс-Тавантолгой дангаараа эзэлж байна гэсэн үг юм. 2013онд Хятадын импортын хоёр орчим хувийг л эзэлж байсан бол энэ жил 10 орчим хувьд хүрсэн нь Монголын нүүрс зах зээлээ алдаагүй байгааг илтгэж байна. /Үндэсний шуудан 2015.01.09 005/

Эрдэнэс Тавантолгой  ХК-ийн   үйл  ажиллагаа  эрхэлсэн дэд  захирал  М.Мягмар-Эрдэнэ: Эрдэнэс таван толгой  ХК 2014 онд зах зээлийн хүндрэлтэй нөхцөлд амжилттай ажиллажээ

Компанийн  үр  ашгийг  дээшлүүлэх  нь   аливаа компанийн байнга хийгдэх  ёстой  ажил юм. Бидний  2014  онд  хийсэн  ажлыг дүгнэхэд "Эрдэнэс-Таван толгой"  ХК зах зээлийн хүндрэлтэй нөхцөлд амжилттай ажиллажээ. /Өнөөдөр 2015.01.12 007/

Эдийн засагч О.Сайнжаргал: Оюутолгойн 34 Эрдэнэтийн 51 хувийг нийлүүлж, компани байгуулах хэрэгтэй

Монголын төр "Бид л хувь эзэмших ёстой" гэсээр байгаад Оюутолгойн ордын 34 хувийг эзэмшсэн. Одоо яаж байна вэ. Үгээ хэлж байна хөрөнгө босгох газар юм. Тиймээс ашиглахгүй байгаа хөрөнгүүдийг эргэлтэд оруулах нь зүйтэй гэж би хувьдаа боддог. Манайд иймэрхүү хөрөнгө гэвэл Оюутолгой ордын 34 хувь байгаа нь үнэн. нөгөөтэйгүүр Эрдэнэтийн 51 хувийг эзэмшиж, ноогдол ашиг авах замаар амьдарсаар удаж байна. Ийм хоёр хөрөнгийг нийлүүлж компани байгуулаад хувьцааг нь арилжаалж мөнгө босгох юм бол Монголын эдийн засаг сэргээд ирэхийг хэн ч үгүйсгэхгүй. Яагаад гэвэл Оюутолгойн ордын талаар бараг бүх хүн мэдэж байгаа. Энэ компанийн 34 хувь нь 98 тэрбум ам.доллартай тэнцэх хэмжээнийх гэдгийг олон компаниуд тогтоосон. Эрдэнэт бол түүх. Ийм хэмжээний хоёр хөрөнгийг нийлүүлж, компани байгуулаад хувьцааг борлуулвал хаанаас ч мөнгө босгох боломжтой. /Улс төрийн тойм 2015.01.07 002/