Тавантолгойг эдийн засгийнэргэлтэд оруулахаар Монгол Улсын Засгийн газраас байгуулагдсан ажлын хэсэг ажилласан. Монгол Улсын сайд М.Энхсайханаар ахлуулсан ажлын хэсэг Монгол, Хятад, Японы компаниудын хамтарсан консорциумыг хөрөнгө оруулагчаар сонгосон. Тэдэнтэй хэлэлцээний ширээний ард сууж, нийт 26 удаагийн уулзалтыг хийгээд байгааг Ажлын хэсгийн ахлагч М.Энхсайхан хэлж байна.

Тавантолгойн ажлын хэсгийнхэн хэлэлцээ хийх үеэр хөрөнгө оруулагчидтай, тэр тусмаа Монголын талын хөрөнгө оруулагч "Энержи ресурс” МСS компани нэлээд шүүмжлэлд өртөөд байгаа. Тус компанийн толгой компани болох ММС нь гадных хэмээн нэр бүхий улстөрчид ярьж эхэлсэн.Сонгон шалгаруулалтаар Японы "Сумитомо”, Хятадын "Шинхуа Энержи”, Монголын "Энержи ресурс” шалгарсан. Эдгээр компанийг ажлын хэсгийнхэн тодруулж, хэдийнээ гэрээ хэлэлцээгээ үзэглэхэд бэлэн болгоод явж байгаа юм.

Ажлын хэсгийн ахлагч Монгол Улсын сайд М.Энхсайхан томоохон төслийг урагшлуулахад хэл ам, маргаан, улстөржилт гардаг. Угаасаа гарахаас аргагүй. Учир нь жижиг биш том төслийн тухай ярьж байгаа болохоор тэр гэж хэлсэн удаатай.Тэрбээр уг хэлэлцээг эхлэхээс л өмнө ярьж байсан. Түүгээр нь ч болж байх шиг.Монголын талаас хөрөнгө оруулагчаар ажиллах "Энержи ресурс” компанид зөвхөн ийм боломж олгож болохгүй, дотоодын үйлдвэрлэгчид хамтдаа энэ төсөлд орох ёстой гэдэг асуудлыг тавих ч хүмүүс бий бололтой. Дотоодын олон компани бий. Эдгээр компаниуд мөн л Тавантолгой төсөл дээр ажиллах сонирхол байгаа. Иймд "Энержи ресурс”-тай хамтарч, уг төсөлд орох талаас нь асуудлыг харвал болохгүй гэх зүйлгүй биз ээ. Учир нь тус компанийг дийлэнх хувь нь гадных гэх шүүмжлэл хурдан өрнөж байгаа. Тиймээс л энэ байдлыг өөрчилж, цөөн ч гэсэн дотоодын компаниудаа дэмжээд явбал Тавантолгой төсөл улстөржилтөөс хол байж болох талтай.    

Монгол Улсын Үндэсний аюулгүй байдлын зөвлөл Тавантолгойг эдийн засгийн эргэлтэд оруулах асуудлаар хуралдсан. Ажлын хэсэг, хөрөнгө оруулагч консорциумтай хэлэлцээ хийж, үүнийхээ үр дүнг ҮАБЗ-ийн гишүүдэд танилцуулсан байгаа юм. Хэлэлцээрийн дүнд нийт 350 орчим асуудлыг хөндөж үндсэндээ тохиролцсон, ойрын хугацаанд нэг талаас хөрөнгө оруулагчид, нөгөө талаас "Эрдэнэс Тавантолгой" ХК, "Монголын Төмөр Зам" ТӨХК компаниудын хооронд хэд хэдэн гэрээ хийх шаардлагатай байгаа аж.

Тавантолгойн ажлын хэсгийн хийсэн ажлын дүнтэй танилцсны дараагаар ҮАБЗ-өөс Засгийн газарт зөвлөмж гаргасан байна. Зөвлөмждөө "УИХ, Засгийн газрын тогтоол, шийдвэрийн уялдааг сайжруулж, төслийг саадгүй хэрэгжүүлэх, Хөрөнгө оруулалтын гэрээг байгуулах, иргэдэд олгосон "Эрдэнэс Тавантолгой" ХК-ийн хувьцааг эдийн засгийн эргэлтэд оруулах, хэлэлцээний явц үр дүнг, УИХ болон олон нийтэд танилцуулж байх үүрэг өглөө” хэмээн бичжээ. Үүнээс харахад ҮАБЗ-ийн гишүүд Тавантолгой төслийг эдийн засгийн эргэлтэд оруулж, ашиглах ёстой. Улстөржилтөөс болж ажил зогсохыг хүсэхгүй байгаа нь харагдаж байна. Энэ төслийг олон жил ярьсан. Харин энэ онд Хөрөнгө оруулалтын гэрээг байгуулж, төслийг хэрэгжүүлэх үүд хаалга нээгдэж байна. Цаашлаад олон жил ярьсан иргэдэд олгох 1072 ширхэг хувьцааны асуудал нэг тийш болох нь. Сар гаруйн хугацаандуг төслийн хэлэлцээ дээр ажилласан Ажлын хэсгийн үр дүн удахгүй тодорхой болж, олон нийтэд мэдээлэгдэх болов уу.

Ц.Гэрэл

zaluu.com