Модон морин жил гарснаас хойш Мүүний шашин, Уран гэдэг хоёр зүйлээр маш олон хүмүүс цахимд амьсгалж байна. Мөн Францын төрийн өмчит компани болох "Арева”-г эсэргүүцэгчид энэ сарын 17-нд Төрийн ордны баруунтай жагсаж "Урангүй монгол”-ын төлөө хэмээн уриалав. Жагсагчдыг 40 гаруй хүн бүрдүүлж байсан агаад тэдний дунд намын дарга, иргэний хөдөлгөөний гишүүд, үндсэрхэг үзэлтнүүд, ажилгүй авгайчууд, малчид, оюутнууд гээд төрөл бүрийн төлөөллүүд явж харагдсан. Харин фэйсбүүкээр ураныг эсэргүүцэж жагсах тухай уриалга гаргаад сүйд болж байсан нөхдүүдээс хүний урманд нэг нь ч харагдаагүй.

Ордны гадна цугларсан "уранчид” "Арева компани монголоос зайл”, "Бид ирээдүйгээ цөмийн хаягдлаар хордуулмааргүй байна”, "Бидэнд уран биш ирээдүй чухал байна” гэх мэтийн урантай холбоотой байж болох бүхий л сүржин үгнүүдийг лоозон болгож гартаа атгацгаажээ. Мэдээжээр мөнгө төлж хэвлэмэл цаас гарт нь атгуулсан гэдэг нь илэрхий хэдэн оюутнууд Арева, уран хоёроо ч бүрэн гүйцэд ялгаж салгаагүй яваа нь тус жагсаалыг нэг л итгэл үнэмшилгүй харагдуулж байсан юм.

14.00 цагт эхэлсэн уранчдын жагсаалын өмнөтгөл болгож  13.00 цагт "Гал үндэстэн” холбооны удирдах зөвлөлийн гишүүн гэх хоёр нөхөр хэвлэлийн хурал зарлаж "Урангүй ирээдүйн төлөө урагшаа”, "Арева монголоос зайл” гэх мэтээр сэтгүүлчид хийгээд телевизийн камерын өмнө хоолойгоо сөөтөл хашгирцгаасан. Бодвол ураны төлөө дуу хоолойгоо цуцтал өргөсөн тэд суваг бүхний оройн мэдээгээр залхтал гарч, ард түмэн ч ураны аюулын тухай багагүй мэдээлэлтэй болсон биз.

Энэ сацуу зурагт үзэж суусан мань мэтийн толгойд "эд үнэхээр сэтгэл зүрхнийхээ дуудлагаар урантай холбогдов уу, эсхүл хэтэвчнийхээ дуудлагаар ураны эсрэг нэгдэж ийнхүү үхэн хатан зүтгэнэ үү?” гэдэг сонирхолтой асуулт төрж байсныг нуух юун.

Магадгүй хоёр дахь хүчин зүйл тэднийг нэгтгэсэн бол иргэний хөдөлгөөн гэх нэрээр бодит дүрээ  халхавчилсан "уранчдын” хамгийн найдвартай болоод барьцтай олз нь "Арева” компани юм. Нэг үгээр ураныг эсэргүүцэх нэрээр "Арева”-г шантжаажилж ам.доллар салгах явдал.  Улмаар урангүй ирээдүйн төлөөх шантаажаа жинхэнэ эх орончдын тэмцэл мэтээр ард түмэнд "зөв” харагдуулахын тулд мөнөөх тэмцэгчид маань Дорноговь аймгийн Улаанбадрах сум, малчин Норсүрэн, учир битүүлгээр үхсэн 22 тугалын тухай үлгэрийг зохиож нийгэмд итгүүлсэн. Үүгээр зогсохгүй шантаажныхаа эцсийн бай болсон "Арева” компанитай дээрх үлгэрүүдээ холбон тайлбарлах оролдологыг маш амжилттай хэрэгжүүлсэн гэж хэлж болно. Энэхүү компанит ажлыг их эртнээс, зохион байгуулалтайгаар эхлүүлсэн иргэний нийгмийн хөдөлгөөнүүд энэ удаад барьцаа лавшруулах гэж улайрч байсныг саявтархан ордны гадна болсон "Урангүй монгол” жагсаал батлан харуулав.

Иргэний хөдөлгөөн гэх итгэл үнэмшилтэй нэрийн дор халхавч үүсгэж шантааж хийгээд сурчихсан, цөмийн салбарын тухай түй ч ойлголтгүй хэдэн хүмүүсээр тэдний өөрсдөө ч сайн ойлгоогүй яваа ураныг эсэргүүцүүлэх сонирхол хэнд байна вэ? Мэдээж хэрэг үүний цаана Монгол улсыг мөнхийн ядуу зүдүү, гуйлгачин орон хэвээр нь үлдээх гэсэн хэсэг бүлэг хүмүүсийн явуулга хэрэгжээд байгаа нь хэнд ч ойлгомжтой харагдахгүй байна гэж үү?