-Төрийн өмчит компаниуд алдагдалтай ажиллаж байгаагийн цаад шалтгаан нь юу вэ. Алдагдлыг бууруулахын тулд ямар арга хэмжээ авч ажиллаж байна. Төрийн өмчит компани хэд байна вэ?
-2012 онд төрийн өмчийн компани 94 байсан бол одоо 88 болсон. Үүнээс зургаа нь судалгаа шинжилгээний чиглэлээр үйл ажиллагаа эрхэлдэг компаниуд юм. Төрийн өмчит компаниудын алдагдлыг бууруулахын тулд захиргааны зардлыг бууруулахад голлож ажиллалаа, өнгөрсөн хугацаанд. Алдагдал хүлээхэд нөлөөлдөг гол хүчин зүйл нь худалдан авалт гэхээс илүү төрийн өмчтэй холбоотой гомдол шүүхэд ирэхэд ялагддаг нь эрх зүйн акт зөрчилтэй байдагтай нь холбоотой. Тийм учраас төрийн өмчит компаниудад аудитын алба, хуулийн зөвлөхүүдийг ажиллуулсан. Компаниуд 100 сая төгрөгөөс нэг тэрбум хүртэлх төгрөгийн алдагдалтай ажилладаг байсан. Тодруулбал, 2012 онд 14 компани 51 тэрбум төгрөгийн алдагдалтай ажиллаж байсныг дээрх менежмэнт хийсний дүнд 10-аад тэрбум төгрөгөөр бууруулж чадсан.

-Төрийн өмчит компаниудыг хувьчлах асуудал хийгээд бусад өмчлөлийн асуудал өнгөрсөн онд хийгдсэнгүй. Хувьчлах обьектуудын жагсаалт гарч, тэр хүрээнд асуудал шийдэгддэг. Жагсаалтыг гаргасангүй юу, эсвэл өөр шалтгаан байв уу. Ер нь алдагдалтай ажилладаг компаниудыг хувьчилж, төр ачаагаа хөнгөлж болдоггүй юм уу?
-Төрийн өмчийн хороо нь өнгөрсөн жил өмч хувьчлалын үндсэн чиглэлээ танилцуулж байсан, Засгийн газар шийдээгүй. Учир нь өмч хувьчлалын концепцийг өөрчлөх ёстой гэх асуудал хөндөгдсөн. Эцэст нь, тухайн үйлдвэрийнх нь ажилчдад давуу эрх олгосон байхаар Хөрөнгийн биржээр дамжуулж хувьчлалыг зохион байгуулах нь хамгийн зөв шийдэл юм байна гэж үзсэн. Энэ чиглэлээр Норвеги, Хятад, Япон, Франц, Орос зэрэг орны туршлагыг судалсан. Францын туршлагыг хэрэгжүүлбэл зах зээлд савлагаа үүсгэхгүйгээр хувьчлал хийх боломжтой юм байна гэдэг нь харагдсан. Тухайлбал, төрийн өмчийн 88 компани байлаа гэхэд түүнийхээ 5-10 хувийг зэрэг хувьчилж болох. Хувьчилсан мөнгө нь тэр компанийн эдийн засаг, санхүүгийн чадавхийг дээшлүүлэхэд хөрөнгө болж очих менежмэнт нь Монголын нөхцөлд илүү нийцэх, хэрэгжүүлэх боломжтой юм байна гэж бид харж байгаа. Нөгөөтэйгүүр, хувьчлагдаагүй барилгын тухайд үнийн асуудал сөхөгдөж байгаа. Зарласан үнээр нь хувьчлаад авах боломж иргэн, аж ахуйн нэгжид байдаггүй. Ийм нөхцөлд бид төрийн өмчит компаниудыг үнэ цэнэтэй болгож байж хувьчлах нь зөв юм байна. Үнэ цэнэтэй болговол төр ч аваад явж болно, хувийн хэвшилтэй хамтраад аваад явж болно гэж үзэж байгаа. Өндөр хөгжилтэй орнуудын туршлагыг харахад, хувийн компани дампуурвал төр тодорхой хөрөнгө оруулаад босгоод ирдэг, төрийн компани хүнд байдалд орвол хувийн компани хөрөнгө оруулалт хийж хамтраад дараа нь хөрөнгөө буцаагаад татаад авах боломж нээлттэй байдаг юм билээ.

-Төрийн өмчийн хороог татан буулгаад төрийн өмчийн сан байгуулж мэдэх нь гэх мэдээлэл гарах боллоо. Судалгаа хийгдээд эхэлсэн хэрэг үү?
-Төрийн өмчийн хороо татан буугдахгүй.  Яагаад гэвэл Төрийн өмчийн хороо нь төрийн болон орон нутгийн өмчийн хуулиар зохицуулагддаг тохируулагч агентлаг. Хуульдаа өөрчлөлт оруулж байж л Төрийн өмчийн хорооны асуудал яригдана. Яаж шинэчлэх вэ, өөрчлөх вэ, ямар менежмэнтээр авч явах вэ гэдэг санал, судалгаа харин явж байгаа. Ажлын хэсгийг байгуулсан, түүнийг Засгийн газрын хэрэг эрхлэх газрын дарга Ч.Сайханбилэг ахалж байгаа. Эцсийн дүндээ төрийн өмчит компани яаж ашигтай ажилладаг болох вэ, нийгмийн хариуцлагаа яаж хүлээдэг болох вэ гэдэг асуудал юм шүү дээ.

-Саяхан Тагнуулын ерөнхий газрын дуусаагүй барилгыг дуудлага худалдаагаар зарах гээд чадсангүй. Дахиад дуудлага худалдаа зарлана гэсэн үг үү. Үнэлгээг нь хаанаас тогтоосон юм бэ?
-Тийм ээ, дахин дуудлага худалдаанд оруулна. Дахин дуудаад зарагдахгүй бол үнэлгээг нь 20 хувь бууруулаад дахин дуудлага худалдаанд оруулж болдог. Үнийг нь 13.5 тэрбум төгрөгөөр үнэлсэн байдаг. Газрын байршил болон баригдсан обьектынхоо үнэлгээгээр хийгдсэн. Хөндлөнгийн аудитын байгууллагын үнэлгээгээр хийгдэж байгаа. Дахин дуудаад зарагдахгүй бол өөр менежмэнтээр хувьчилж болох юм гэх асуудал яригдаж байгаа. Нийслэлийн Баянзүрх дүүрэгт харьяалагддаг болохоор тухайн обьектыг сургууль, эмнэлэг болгон зориулалтыг нь өөрчилж болох юм гэдэг зүйл яригдсан. Талууд нэгдсэн саналд хүрвэл нийслэл рүү шилжүүлж болно.