Энэ талаар хэвлэлийн албан мэдээнд "Оюу толгой” ХХК-ийн хувьцаа эзэмшигчид болох Монгол Улсын Засгийн газар, "Туркойз Хилл Ресурс” болон "Рио Тинто” компани Оюу толгойн далд уурхайн бүтээн байгуулалтыг үргэлжлүүлэхээр шийдвэрлэснийг тус компани талархан хүлээн авч байна. Энэхүү төлөвлөгөөнд далд уурхайн бүтээн байгуулалтын чиглэлээр хийгдэх ажлуудыг тохиролцсоны дотор төслийн санхүүжилтийг эцэслэх, техник эдийн засгийн үндэслэлийг дахин хянах, батлуулах, шаардлагатай бүх зөвшөөрлийг авахад тус тус голлон төвлөрч ажиллах ба ингэснээр далд уурхайн бүтээн байгуулалтыг үргэлжлүүлэн явуулах нөхцөл бүрдэнэ”гэсэн байна.  Харин энэ талаар "Оюу толгой” ХХК-ийн Төлөөлөн удирдах зөвлөл (ТУЗ)-ийн дарга Г.Батсүх "Хувьцаа эзэмшигчдийн гаргасан энэхүү шийдвэр нь Оюу олгойтой холбоотой бүх талуудад нэн таатай үйл явдал болж байна. Монгол Улсын Засгийн газар болон Рио Тинто компанийн хэлэлцээрийн багуудад мэргэжлийн өндөр ур чадвар, тэсвэр тэвчээр, харилцан хүндэтгэл гарган ажиллаж, энэхүү шийдэлд хүрсэнд нь талархал илэрхийлэхийг хүсч байна. Оюутолгой төсөл, түүний хувь нийлүүлэгчид төдийгүй Монголын ард түмний хувьд энэ нь бахархалт мөч бөгөөд ТУЗ-ийн нэрийн өмнөөс бүх талуудад баяр хүргэж байна” гэжээ. 

Харин "Оюутолгой” компанийн ерөнхийлөгч Эндрью Вүдлэй "Оюу толгойн хувьцаа эзэмшигчид шийдвэрлэгдээгүй байсан асуудлуудаа эцэслэн тохирч, далд уурхайн бүтээн байгуулалтыг үргэлжлүүлэхээр шийдвэрлэсэн явдалд сэтгэл хангалуун байна. Ингэснээр газрын гүнд байрлаж буй, дэлхийд томоохонд тооцогдох зэс-алтны ордыг ашиглах бүтээн байгуулалтын ажлыг үргэлжлүүлэх бололцоо бүрдэж байна. Өнөөдөр ил уурхайн үйл ажиллагаа аюул осолгүй, үр бүтээмжтэй явагдаж байна. Цаашид ч аюулгүй ажиллагаа бидний нэн тэргүүний чиглэл хэвээр байх болно. Бид урт хугацааны бизнесийн бат бэх үндэс суурь бүрдүүлэхийн зэрэгцээ үйлдэврлэлийн бүтээмжийг нэмэгдүүлэх, үйл ажиллагааны суурь зардлыг бууруулахад үргэлжлүүлэн анхаарч ажиллана” гэдгээ илэрхийлжээ.

Ийнхүү 2013 оноос хойш зогссон Оюутолгойн далд уурхайн бүтээн байгуулалтын ажил эхлэхээр болж байна. Тус зэс, алтны ордын 80 хувийг далд уурхайгаас олборлох тооцоо байгаа юм. Ил уурхайн олборлолт хэвийн явагдаж байгаа бөгөөд өнгөрсөн оноос тус компани зэсээ экспортод гаргаж эхэлсэн байдаг. Энэхүү бүтээн байгуулалтад нийтдээ 4.9 тэрбум ам. доллар хэрэгтэй байгаа бөгөөд үүнийг Дэлхийн банк болон гадаадын томоохон арилжааны 15 банкнаас зээлэхээр ярьж байсан юм.

Тоон мэдээ

-Оюутолгой өнгөрсөн онд 185.8 мянган тонн зэс болон 561 мянган унци алт бүхий баяжмал борлуулсан

-Оюу толгой” компани 2015 оны нэгдүгээр улиралд 66.4 сая ам.долларын татвар, төлбөр төлж, 78.3 сая ам.долларыг дотоодын худалдан авалтад зарцуулсан бөгөөд үүний 14.1 сая ам.долларыг Өмнөговь аймгийн ханган нийлүүлэгчдэд зарцуулсан байна.

-Ил уурхайн олборлолтыг 2015 оны төлөвлөгөөний дагуу явуулж, 2015 оны хоёрдугаар улирлаас баяжуулах үйлдвэрт өндөр агуулгатай хүдэр боловсруулах төлөвтэй байна. Туркойз хилл компанийн зүгээс үйлдвэрлэлийн хувьд энэ онд 2014 оны үзүүлэлттэй ижил төстэй буюу 2015 оны хоёрдугаар улиралд үйлдвэрлэлийн хэмжээ харьцангуй нэмэгдэх төлөвтэй байгааг мэдэгдээд байна. Одоогийн мөрдөж буй уурхайн төлөвлөгөөнд тулгуурлавал "Оюу толгой” компани 2015 онд 175-195 мянган тонн зэс, 600-700 мянган унци алтны агуулгатай баяжмал үйлдвэрлэх төлөвлөгөөтэй байна.

-2015 онд үйлдвэрлэхээр төлөвлөсөн баяжмалыг 100 хувь борлуулах борлуулалтын гэрээг байгуулсан болно.

-Монгол Улс өнгөрсөн онд нийт 2.5 тэрбум ам.долларын хэмжээний зэсийн баяжмал экспортолсон байна. Үүний 45 хувийг зөвхөн Оюутолгойн экспорт бүрдүүлжээ.

-2015 оны эхнээс өнөөдрийг хүртэл "Оюу толгой” компани Монгол Улсад татвар, хураамж, болон ашигт малтмалын нөөц ашигласны төлбөрт нийтдээ 78.5 сая ам.доллар төлөөд байна. (Үүнд 20 сая ам.долларын урьдчилгаа төлбөрийг оруулж тооцсон болно.)

                                     Оюутолгой ямар татвар төлдөг вэ?

 "Оюутолгой” компани Монгол улсын хууль тогтоомжийн хүрээнд доорх татвар, төлбөрийн үүрэг хүлээдэг

• Аж ахуйн нэгжийн орлогын албан татвар;

• Ашигт малтмалын нөөц ашигласны төлбөр;

• Нийгмийн даатгалын шимтгэл;

• Автомашины онцгой албан татвар;

• Газар, ус, элс болон замын хураамж, төлбөр;

• Гаалийн албан татварь хураамж;

• Үл хөдлөх хөрөнгийн албан татвар;

• Нэмэгдсэн өртгийн албан татвар;

• Бусад татвар, хураамж, төрийн үйлчилгээний төлбөр