Монгол улсыг 200-300 жил тэжээж, тэтгэх ёстой гэх Тавантолгойн нүүрсний ордыг ашиглахтай холбоотой хэрүүл, маргаан, тэмцэл сүүлийн хоёр сар гол шуугианыг дагуулж байгаа. Энэ дунд хэнийх нь зөв, хэнийх нь бурууг ялгах аргагүй болтол төөрөгдөв бид.

Ийм байдалд хүргэсэн буруутан нь манай хууль тогтоох засаглал болох УИХ, мөн Гүйцэтгэх засаглал болох Засгийн газар бас Монгол улсын эв нэгдлийн баталгаа гэгддэг Ерөнхийлөгч нар.

Эдэн дээр мэдээж Тавантолгой дээр үйл ажиллагаа явуулж байгаа төрийн өмчийн "Эрдэнэс Тавантолгой” ХК-ий захирал асан, ҮЭ-ээрээ удирдуулсан ажилчид, тус ордыг гадныхантай хамтарсан консорциум байгуулан авах гэж байгаа "Энержи ресурс” компанийхан нэмэгдэнэ.

Эдгээр хүмүүсийн ярьж байгаагаас харахад нөгөө хөдөөгийн олон салаа замаар ороод төөрчихсөн хүн "Хөдөөгийн энэ олон замын алинаар нь явах вэ таминь ээ” хэмээн дуулж байх шиг санагдаж байгаа юм.

Тэгэхдээ хөдөөгийн тэр олон салаа зам шиг зүйл дундаас зөв замаа олох нь уг нь манай УИХ, Засгийн газрын гишүүдийн сэтгэлийн чин зориг л мэдэх явдал болоод байгаа юм.

Засгийн газар, түүн дундаа Ерөнхий сайд Ч.Сайханбилэг болон консорциумтай хэлэлцээ хийсэн сайд М.Энхсайхан нарын хүмүүс болон УИХ-ын зарим гишүүд өөрсдийн хувилбарыг зөв хэмээн мэтгэж улмаар "Эрдэнэс Тавантолгой”-г нэг их хол явж чадахгүй дампуурна гэж байгаа. Мэдээж энэ талд "Энержи Ресурс” болон МСS зогсож байгаа нь тун ойлгомжтой.

"Энержи Ресурс” бол өөрийн ажиллагааг сурталчлахдаа хийсэн бүтээснээ өмнөө барьж байгаа ч тэдгээр нь бүгд гадаад, дотоодын барьцаанд хэдэн тэрбум ам.долларын өрөнд байгааг нь ярьж байна.

Харин нөгөө талд УИХ-ын дарга З.Энхболд болон түүний тушаалаар байгуулагдсан УИХ-ын Ажлын хэсгийнхэн зогсож байна. З.Энхболдын хажууд Тавантолгойгоос урагш нь төмөр зам тавихыг 7-8 жил саатуулсан гэгдэх УИХ-ын гишүүн "Женко” Х.Баттулга болон түүний хамтрагч А.Гансүх зөвлөх нь байна.

Эдгээр хүмүүс бол асуудлыг хууль зөрчсөн гэрээ хийсэн болон өрөнд баригдаж, өтөнд идэгдэх шахсан компанид Тавантолгойг өгөх гэж байна гэж байгаа. Эднийг "Эрдэнэс Тавантолгой”-н захирал асан Я.Батсуурь болон тус компаний ажилчид дэмжиж байгаа юм.

Харин Ерөнхийлөгчийн хувьд эхнээсээ Засгийн газар асуудлыг шийдэх ёстой хэмээж ирсэн ч сүүлийн сар гаруй хугацаанд чимээгүй суугаад байна. Ийнхүү Тавантолгой хэрхэх нь мэдэгдэхээ байх энэ цагт "дайн”-ы гал асаж байгааг олон хүн ярих боллоо.

Гэхдээ тэд нэгэнтэйгээ хэвлэлээр л чулуу шидэлчээд байхаас хэтрэхгүй байна. Тэгвэл асуудлыг ингэж завааруулж суухын оронд нэг танхимд урд урдаасаа харж суугаад хэлэлцэж шийдэх нь хамгийн боломжит арга мэт.

Биднийг хүүхэд байхад нэг нэгнийгээ өдсөн, сөдсөн хүүхдүүд сайхан нүүр нүүрээ харж байгаад "үзчихдэг” үе зөндөө л байдагсан.

Тэгвэл манай УИХ, Засгийн газарт талцаад байгаа гишүүд, сайд нар маань олон нийтийг ийн бухимдуулж өөр өөрсдийн үнэн зөвд итгүүлэх гэж чармайж байснаас УИХ-ынхаа чуулганы хуралдааны танхимд бүрэн бүрэлдэхүүнээрээ цуглаж бас дээр нь хоёр талын гол дайсагнагчдаа цуглуулж байгаад сайхан "үзээд” эцсийн шийдвэрээ гаргачихмаар байна.

Тэгээд ч УИХ-ын цөөнгүй гишүүд аливаа асуудлыг УИХ-аар хэлэлцэж байж цааш хэлэлцэх, эсэхээ шийддэг болохоос наана нь Ажлын хэсэг байгуулж, шалгаж ийн бужигнуулдаг асуудал байхгүй. Асуудлыг хурдан УИХ-аар оруулж ирэн шийдэх ёстой гэлцэж буй.

Ингэхгүй бол одоо байдал арай дэндлээ. Уг нь УИХ асуудлыг өөр дээрээ татаж авсных танхим дотроо оруулж ярилцаад эцсийн шийдвэрээ хурдхан гаргамаар байна.

Тэгэхгүй бол бас нөгөө өөх ч биш, булчирхай биш ингэж явахаар улстөрийн байдал ч тогтворгүйтэх шинжтэй болж эхлээд байна.

Г.Самбаа

gereg.mn