Тавантолгойн хөрөнгө оруулалтын гэрээ УИХ-ын чуулганаар  хэлэлцэгдэхээр ажлын хэсгийн дүгнэлтийг хүлээж буй энэ үед Эрдэнэс Тавантолгой компанийн "Эв саналын нэгдэл” үйлдвэрчний эвлэлээс уг гэрээг эсэргүүцэж байгаагаа илэрхийлэн, хэвлэлийн бага хурал зарлалаа.

Мэдээллийн үеэр Эрдэнэс Тавантолгой компанийн "Эв саналын нэгдэл” үйлдвэрчний эвлэлийн гишүүд "Манай байгууллага өдийг хүртэл хэвийн ажиллаж байгаа. Гэтэл тодорхой зорилго бүхий хүмүүс эх орныхоо баялагийг гадныханд эзмшүүлэх зорилгоор  төр муу менежер гэх нэрийн дор манай байгууллагын нэр хүндийг санаатайгаар унагаж байна”  хэмээн онцолсон юм.

Түүнчлэн тус үйлдвэрчний эвлэлийн зүгээс УИХ-ын дарга З.Энхболд болон бүх гишүүдэд Эрдэнэс Тавантолгой компанийн үйл ажиллагааг төрийн анхааралд авч, Тавантолгойн гэрээнд тус компанийг дотоодоосоо сонгох замаар Монгол ажилчид, үндэснийхээ баялагийг бодлогоор дэмжихийг хүсэж буйгаа илэрхийллээ.

Тус мэдээллийн үеэр Эрдэнэс Тавантолгой компанийн "Эв саналын нэгдэл” үйлдвэрчний эвлэлийн гишүүдээс авсан  дараах тодруулгыг хүргэж байна.

"Эв саналын нэгдэл” үйлдвэрчний эвлэлийн тэргүүн С.Эрдэнэ: лицензийн талбай руугаа оруулахгүйн төлөө л тэмцэнэ

- Та нэлээд хэд хоногийн өмнө хэвлэлийн бага хурал зарлаж, Энержи Ресурс бодлогоор угаасан нүүрснийхээ үнийг хямдруулж, танай компанийг шахалтад оруулах бодлого барьж байгаа тухай мэдээлэл хийсэн. Уг асуудал бодлогын түвшинд шийдвэрлэгдсэн үү?

- Нүүрсний борлуулалт зургаа, долдугаар саруудад дэлхийн зах зээл дээр унадаг. Харин наймдугаар сараас хэрэглээгээ дагаад сэргэнэ. Манай компанийн үйл ажиллагаа яг энэ зах зээлийн хэлбэрээр л үргэлжилж байгаа. Бид Энержи Ресурс комданийн бодлогоор шахсан үйлдлийн эсрэг борлуулалтаа  хэвийн  хадгалах  нөөц бололцоогоо шавхан ажиллаж байгаа л гэж хэлье.

- Тавантолгойн хөрөнгө оруулалтын гэрээ танай компанид ашиггүй шийдэгдсэн тохиолдолд та бүхэн ямар алхам хийх бэ?

- Шулуухан хэлэхэд бид лицензийн талбай руугаа оруулахгүйн төлөө л тэмцэнэ.

- Удирдлагын зүгээс та бүхний энэхүү мэдээлэл хийх шийдвэрийг дэмжсэн үү?

- Удирдлагуудын зүгээс бидний энэ үйлдлийг ямар нэгэн байдлаар хориглоогүй. Тодорхой түвшинд дэмжиж байгаа.  Гэхдээ бас шуудхан санхүү болоод бусад зүйлээр дэмчихээгүй. Бид үйлдвэрчний эвлэлийнхээ гишүүдийн хандиваар Нийслэлд ирж, мэдээлэл хийж байгаа.

- Та бүхэн  энэхүү эл захидлаа УИХ-ын дарга З.Энхболд болон бусад гишүүдэд албан ёсоор хүргүүлсэн үү?

- Бид уурхайчид болохоор хэрхэн хүргүүлэх нарийн учрыг сайн мэдэхгүй байна. Тиймээс л хэвлэл мэдээллийнхэнд хандан, нээлттэй мэдээлж өгөхийг хүсэж байгаа юм. Гэхдээ хүргүүлэх тал даар бид анхаарал хандуулж байгаа.

- Одоогоор танай компанийн үйл ажиллагаа хэвийн үргэлжилж байгаа юу?

- Манай компанийн үйл ажиллагаа хэвийн үргэлжилж байгаа. Манай компанид одоо уурхайгаас гаргаад овоолчихсон 2.1 сая тонн нүүрс борлуулахад бэлэн байна. Борлуулалт бага хэмжээгээр ч гэсэн явж байгаа. Мөн уурхайдаа 2 сая.тонн орчим нүүрс нээчихсэн, олборлоход бэлтгэж байна. Энэ дөрвөн сая тонн орчим нүүрсээ зах зээлд шууд борлуулчих юм бол бүрэн өрнөөсөө гарна.

Уурхайн ээлжийн инженер Б.Түмэндэлгэр:Жолооч нар 14 хоног ажиллаад 1.5-1.7 сая төгрөг гар дээрээ авдаг

- Та бүхэн Чалкогийн өрийг компани тань төлж буйд ямар сэтгэгдэлтэй байдаг бэ?

- Зүүн цанхиас олборлох нүүрсийг  Сү.Батболдын засгийн газрын үед өр тавьж аваад, Монголын ард түмэнд бэлэн мөнгөөр тараагаад өгчихсөн. Тэр өрийг манай компани төлдөг гэдгийг хүн бүр мэдэх байх. Өөрөөр хэлбэл бид анх ажиллаж эхэлсэн цагаасаа хойш төрийн өр дарж байгаа. Тэр их мөнгийг компанийн үйл ажиллагаанд зарцуулсан бол бид өнөөдөр үнэхээр өндөр түвшинд ажиллаж чадахаар байсан.

- Чалкогийн өрийн үлдэгдэл 140 сая ам.доллар болсон талаар нэлээд эртнээс яригдсан. Өр төлөлт үргэлжилж байгаа юу?

- Манай компани одоогийн бүрэн хүчин чадлаараа дөрвөн сар ажиллахад л энэ мөнгийг төлчих ёстой. Гэхдээ он гарснаас хойш Чалкогийн өрийг төлж байгаа эсэхийг бид нэгж ажилтны хувиар нарийн мэдэхгүй байна.

- Цалин хангамжийн хувьд хэвийн олгогдож байгаа юу?

- Манай компанийг цалингаа тавьж чадахаа байгаад, дампуурчихсан хэмээн яригдаж байгаа. Гэтэл харин ч эсрэгээрээ уул уурхайн компаниудаас хамгийн тогтвортой байдлаар цалингаа олгосоор ирсэн. Одоо ч хэвийн үргэлжилж байна.

- Бусад уул уурхайн компаниудаас танайх цалин өндөр авдаг талаар эл  захидалдаа дурджээ. Тухайлбал, танай жолооч нар сард хичнээн төгрөг гар дээрээ авч байна?

- Уухайн ажилчдын үндсэн цалин 1.2 сая төгрөг байдаг. Жолооч нарын хувьд бол бусад нэмэгдлүүд нь ороод 15-17 сая төгрөгийн цалинг гар дээрээ авч байгаа. Бүх татваруудаасаа төлөөд ийм мөнгө үлддэг гэсэн үг. Энэ нь тухайн ажилтны 14 хоногийн хөдөлмөрийн хөлс.

- Уул уурхайн бусад компаниуд ч бас ийм жишиг цалинтай байгаа биз дээ?

- Тийм ээ. Энержи Ресурсын жолооч нар яг бидэн шиг цалин авдаг. Гол ялгаа уртын амралтын хоногийн тоонд байгаа юм.  Ухаандаа манайх 14 ажиллаад, 14 амардаг бол Энержи Ресурс болон бусад компани 28 хоног ажиллаад, 14 хоног ажиллагда.

Бүр ойлгомжтойгоор тайлбарлах юм бол манайхан сард 168 цаг ажиллаж байхад бусад компанийнхан 240 цаг ажиллаж байна. Зөрүү нь 72 цаг мөртлөө таны хэлсэнчлэн яг бидний авдаг хэмжээний цалинг авч байгаа. Энэ бол хөдөлмөрийн мөлжлөг. Тиймээс ч бусад компанийн ажилчид манайд ажилд орох хүсэлтээ үргэлж илэрхийлдэг.

Ж.Мядагбадам