ОХУ-ын Санкт-Петербург хотод 19 дахь удаагийн Олон улсын эдийн засгийн чуулга уулзалт өчигдөр /06.18/ эхэлсэн.

Санкт-Петербургийн олон улсын эдийн засгийн форумын эхний өдөр ОХУ болон гадаадын томоохон компаниуд хамтын ажиллагааны гэрээ, хэлэлцээрт гарын үсэг зурлаа.

"ГАЗПРОМ"

"Газпром", Их Британийн E.ON, Их Британи-Германы хамтарсан "Shell” болон Австрийн OMV зэрэг  газрын тос, байгалийн хийн олборлогч томоохон компаниудтай хамтран ажиллах, ОХУ-ын байгалийн хийг Европ руу дамжуулах арга замыг хөгжүүлэх зэрэг асуудлуудаар тохиролцсон байна. Дээрх дөрвөн компанийн удирдлага Европын хэрэглэгчдэд ОХУ-ын байгалийн хийг шууд нийлүүлэх, байгалийн хийн нийлүүлэлтийн тээврийн дэд бүтцийг бий болгоход хамтран ажиллах тухай санамж бичигт өчигдөр /06.18/ гарын үсэг зурсан юм.

Түүнчлэн "Газпром" Вьетнамын Petrovietnam компанитай уул уурхай, газрын тосны салбарт хамтран ажиллагаа өргөжүүлэх санамж бичигт талууд гарын үсэг зурсан байна.

"РОСНЕФТЬ"

Тус чуулга уулзалтын хүрээнд Оросын төрийн өмчит "Роснефть" компани Венесуэлийн талд нийлүүлэх Уралын газрын тосны гэрээ үндсэн нөхцөлийг хэлэлцэн Венесуэлийн PDVSA компанитай гэрээ байгуулав.

Сануулахад сүүлийн жил түүхий нефтийн үнэ эрс буурч байгааг зогсоохын тулд харилцаагаа бэхжүүлэхээр ОХУ-ын Ерөнхийлөгч Владимир Путин, Венесуэлийн Ерөнхийлөгч Николас Мадуро энэ оны нэгдүгээр сард Москвад хотод уулзсан.

Хоёр улсын удирдагч нар олон салбарт, тухайлбал, эрчим хүчний салбарт хамтран ажиллаж, хоёр талын худалдааны хэмжээгээ нэмэгдүүлэхээр зөвшилцжээ.

Орос нь дэлхийн түүхий нефтийн хоёр дахь том үйлдвэрлэгч юм. Харин Венесуэл нь Нефть экспортлогч улсуудын байгууллага буюу ОПЕК-ийн гишүүн улс билээ.

Түүхий нефть нь Оросын нийт экспортын бүтээгдэхүүний 70 хувийг эзэлдэг бол, Венесуэлийн хувьд 90 хувийг нь эзэлдэг.

Нефтийн ханш эрс унаж байгаагийн улмаас тус хоёр улс эдийн засгийн байдал хүндхэн байна.

ОРОСЫН ТӨМӨР ЗАМ

ОХУ-ын олон улсын консорциумтай хамтран Энэтхэгт 400 км төмөр зам барьж байгаа талаар Оросын төмөр замын дарга Владимир Якунин хэлсэн юм.

Санкт-Петербургийн олон улсын эдийн засгийн чуулга уулзалтын хүрээнд "ОХУ-Энэтхэг: хамтын хөрөнгө оруулалтын боломж” сэдэвт дугуй ширээний уулзалт боллоо. Энэ үеэр Энэтхэгийн эрчим хүчний асуудлыг хэлэлцсэн юм.

Энэтхэг улсын хувьд нийт хүн амын 20 гаруй хувь нь ямар ч тог цахилгаангүй амьдардаг бөгөөд гадаад улс орнуудтай эрчим хүчний салбарт хамтран ажиллах сонирхолтой байгаа юм. Өнгөрсөн жил тус улс Австралитай цөмийн эрчим хүчний салбарт хамтран ажиллах, уран импортлох хэлэлцээр хийсэн билээ.

ОХУ-БНХАУ-ЫН ЗАСГИЙН ГАЗАР ХООРОНДЫН КОМИСС

Энэ удаагийн форумын үеэр Орос-Хятадын Засгийн газар хоорондын комиссын чуулганы үеэр 29 шинэ төслийг баталжээ. "20 гаруй тэрбум ам.доллараар үнэлэгдэж буй 29 шинэ төсөл батлагдсан" гэж Засгийн газар хоорондын комиссын Оросын талын тэргүүн Станислав Воскресенский хэлсэн байна.

Нийт төслийн тоо 58. Эдгээр нь өндөр хурдны төмөр замын шугам, аж үйлдвэрийн тоног төхөөрөмж, тоног төхөөрөмж, барилгын материал, автомашин, уул уурхайн үйлдвэрлэл, химийн үйлдвэр, хөдөө аж ахуй, ойн аж ахуйн үйлдвэр барих зэрэг салбарт хамтран ажиллах төслүүд аж. 

Эх сурвалж: ИТАР ТАСС