"Rio Tinto” группийн найдвар нь "Оюутолгой” төсөл

Уул уурхайн топ 40 компанийн зах зээлийн нийт үнэлгээ өнгөрсөн жил 156 тэрбум ам.доллараар буурсан талаар "PwC” зургадугаар сард танилцуулж байлаа. Уул уурхайн компаниуд түүхэнд хараар тэмдэглэгдэх амаргүй цаг хугацааг туулж буйг илтгэх хангалттай үзүүлэлт юм. Дэлхийн зах зээл дэх түүхий эдийн үнийн уналт үүнд голлон нөлөөлж буй. Үнийн уналт энэ онд ч үргэлжилж, компаниудын тогтвортой үйл ажиллагаанд дарамт учруулсаар байна. Ийм нөхцөлд зардал багатай компаниуд хүндрэлийг даван гарах боломжтой гэж шинжээчид үзэж байна.

Мөн сайн активтай компани дээрх уналтыг давж гарна хэмээн зарим олон улсын санхүүгийн байгууллагууд тэмдэглэжээ. Тодруулбал, "Rio Tinto” групп сайн активтай компанийн тоонд орж байгаа юм. Монголын эдийн засагт "Оюутолгой” төсөл ихээхэн найдвар төрүүлж байгаа бол "Rio Tinto” группийн хувьд ч мөн адил итгэл үзүүлж буй. Тус групп 40 гаруй улсад үйл ажиллагаа явуулж байгаа бөгөөд үүнээс хамгийн ирээдүйтэй төсөл нь "Оюутолгой” хэмээн тус группийн гүйцэтгэх ерөнхий захирал Сэм Уолш онцолсон удаатай. Нэг үгээр хэлбэл, зөвхөн Монголын эдийн засагт бус "Rio Tinto” группийн хувьд ч хямралаас гэтэлгэх найдвар нь "Оюутолгой” төсөл болоод байгаа аж.

"Оюутолгой” төслийн далд уурхайн бүтээн байгуулалтын бэлтгэл ажил ид өрнөж буй. Энэ хүрээнд ирэх арваннэгдүгээр сард ханган нийлүүлэгчдийн форумыг зохион байгуулахаар товложээ. Үүнээс гадна жил гаруйн хугацаанд хаалттай байсан далд уурхайг нээсэн байна. Ингэснээр уурхайн гүнд цөөн тооны ажилчид орж ажиллаж эхэлжээ. Одоогоор уурхайд зөвхөн аюулгүй ажиллагааг хангах хүрээнд л зарим ажлыг эхлүүлсэн байна.

Урьдчилсан байдлаар 6.2 тэрбум ам.долларын өртөгтэй далд уурхайн бүтээн байгуулалт ирэх оны хоёрдугаар хагаст эхэлсэн байхаар хувь нийлүүлэгчид төлөвлөж байгаа юм. Одоогоор далд уурхайн шинэчилсэн ТЭЗҮ-ийг Эрдэс баялгийн мэргэжлийн зөвлөл хүлээн авч танилцсан байна. Шинжээчдийн дүгнэлт гарсан бөгөөд удахгүй "Оюутолгой” компанийн Төлөөлөн удирдах зөвлөлд /ТУЗ/ танилцуулах аж. Үүнээс гадна ордын нийт нөөцийн 80 хувийг агуулах далд уурхайтай ирэх өдрүүдэд төслийн хөрөнгө оруулагч талын зарим гишүүн танилцах юм байна. Тодруулбал, "Rio Tinto” группийг төлөөлж Төлөөлөн удирдах зөвлөлд ажиллах, компанийн дүрмийн дагуу шинээр томилогдсон гурван гишүүн түр хугацаагаар төсөлтэй биечлэн танилцах тов гарчээ.

Далд уурхайг нээсэнтэй холбоотойгоор Европын сэргээн босголт, хөгжлийн банкны төлөөлөгчид төслийн санхүүжилт олгох үүднээс уурхайн үйл ажиллагаатай танилцсан юм. Энэ нь далд уурхайн санхүүжилт нааштай шийдэгдэж буйн дохио гэж зарим эдийн засагч үзэж байна. Олон улсын санхүүжүүлэгч банкуудаас Европын сэргээн босголт, хөгжлийн банк голлон ажиллаж байгаа аж. Харин Дэлхийн банк санхүүжилт олгох банкуудад баталгаа гаргаж өгнө гэдгээ урьдчилсан байдлаар мэдэгдсэн.

"Rio Tinto” групп 4.2 тэрбум ам.долларын төслийн санхүүжилтийн багцыг олон улсын 20 орчим банк санхүүгийн байгууллагуудаас босгохоор хэлэлцээ хийж байна. Тэднээс АНУ-ын Экспорт, импортын банк санхүүжилт өгөх, эсэхээ эцэслэн шийдээгүй байгаа юм. "Оюутолгой” компанийн Төлөөлөн удирдах зөвлөлийн гишүүн Ч.Отгочулуу "Зээлийн хүү ойролцоогоор дөрөв орчим хүү байна” хэмээн хэвлэлд өгсөн ярилцлагадаа дурдсан байна. Нийт 6.2 тэрбум ам.долларын 4.2 тэрбумыг нь бүтээн байгуулалтад зарцуулах бол үлдсэнийг нь төслийн урсгал зардал болон зээлийн хүүнд төлөх аж.

Монголын Засгийн газрын зүгээс санхүүжилтэд шаардлагатай зөвшөөрлүүдийг гаргаж өгсөн. "Rio Tinto” групп банкуудтай хоёр жилийн өмнө гэрээний үндсэн нөхцөлөө тохирч байсан учраас энэ удаагийн хэлэлцээ илүү нааштай, үр дүнтэй байгаа аж. "Оюутолгой” компанийн ТУЗ-ийн шинэхэн гишүүн Б.Бямбасайхан "Төслийн санхүүжилтийг олон улсын банкуудтай хэлэлцэж, зээлийн гэрээ хийх шатанд ирээд байна” гэж мэдэгдсэн юм. Энэ нь далд уурхайн санхүүжилт шийдэгдэхэд сар хүрэхгүй хугацаа үлдээд байгаа гэсэн мэдээллийг тодотгож байна. Тодруулбал, ирэх сард далд уурхайд санхүүжилт олгох банкуудтай гэрээ байгуулах хүлээлттэй байгаа.

"Rio Tinto” группийн Монгол Улсыг хариуцсан захирал С.Мөнхсүх "Санхүүжилтийн яриа хэлэлцээр хийж байгаа. Энэ оны сүүлчээр эцэслэх төлөвтэй байна. Бэлтгэл ажлуудын зэрэгцээ хөрөнгийн тооцоог шинэчилсэн. Бүтээн байгуулалтын ажлыг эхлүүлэхэд шаардлагатай зөвшөөрлийг аваад байгаа” гэж мэдэгдсэн юм.

Б.Баяртогтох

Засгийн газрын мэдээ