Аж үйлдвэржилтийг герман туршлагаар...

"Германд үйлдвэрлэв хэмээх үг чанар гэсэн утгыг илэрхийлдэг. Ийм итгэл үнэмшлийг төрүүлэхийн тулд бид 50 жил зүтгэсэн” гэж ХБНГУ-аас Монгол Улсад суугаа Онц бөгөөд Бүрэн эрхт Элчин сайд Герхард Тийдеманн мэдэгдэв. Тэгвэл тэр чанарын нууц буюу ноу-хауг эх орондоо нутагшуулах нь Монгол Улсын хөгжлийн гарц гэдгийг Аж үйлдвэрийн сайд онцолж байна.

Зүүн Европын Герман, төв Азийн Монгол хоорондоо дэндүү хол. Гэвч хоёр улс соёл, боловсрол, улс төрийн түвшиндээ ойрхон гэдгийг хагас зууныг элээж буй дипломат харилцаа гэрчилнэ. "Хоёр орны соёл, улс төрийн харилцаа өргөжсөн. Харин бизнесийн харилцаа хэлцлээс хэтрэхгүй байна” гэж Германы олон улсын хамтын ажиллагааны нийгэмлэгийн Эрдэс баялаг, түүхий эдийн иж бүрэн санаачилга хөтөлбөрийн дэд захирал О.Батболд хэлсэн юм.

Монголд Германы хөрөнгө оруулалттай 70 гаруй компани байна

Тэгвэл үүнийг ажил хэрэг болгох нь Улаанбаатар хотноо болж буй "Германд үйлдвэрлэв” уулзалтын гол сэдэв байлаа. Энэ уулзалт, үзэсгэлэнд Германы 50 гаруй аж ахуйн нэгж оролцож байна.

Хоёр улсын худалдааны эргэлт өнгөрсөн онд 173 сая ам.доллараар хэмжигдсэн ба Германы хөрөнгө оруулалттай 70 гаруй компани Монголд бий. Эдгээр аж ахуйн нэгжийн дийлэнх нь тоног төхөөрөмжийн чиглэлээр үйл ажиллагаа явуулдаг.

ТЭРГҮҮН ТУРШЛАГААС СУРАЛЦАХУЙ

Германы Канцлер Ангела Меркель 2011 онд Монгол Улсад айлчлах үеэр хоёр улс ашигт малтмал, аж үйлдвэр, технологийн салбарт хамтран ажиллахаар тохирчээ. Өөрөөр хэлбэл, хөгшин тивийн тэргүүлэх эдийн засаг манай гол салбарын түнш болох юм. "Гурван сая хүнтэй, хоёр их наяд ам.долларын түүхий эдийн нөөцтэй Монгол Улс эрдсээ ашиглан хөгжилд хүрэхэд Германы туршлага тусална” гэж Германы олон улсын хамтын ажиллагааны нийгэмлэгийн Эрдэс баялаг, түүхий эдийн иж бүрэн санаачилга хөтөлбөрийн захирал Др.Штефан Ханселманн мэдэгдсэн. Үүний бэлгэдэл болгож Монгол, Германы ашигт малтмал, технологийн их сургуулийг байгуулаад байна.

Германчууд манай ашигт малтмал, эрчим хүч, хөдөө аж ахуй, аялал жуулчлалын салбарт хамтран ажиллах сонирхолтой байгаа. Тэр дундаа сэргээгдэх эрчим хүчний салбарт, газрын дулаан ашиглах чиглэлээр шинэ технологи нэвтрүүлэх хүсэлтэйгээ илэрхийлсэн. Үүгээр ч зогсохгүй хөдөө аж ахуйн салбарт герман технологи нэвтрүүлж, үр ашигтай үйлдвэрлэл хөгжүүлэхээр төлөвлөжээ. Энэ хүрээнд хоёр улсын Засгийн газар "Тогтвортой хөдөө аж ахуй” төсөл хэрэгжүүлж, герман сортын үр, тоног төхөөрөмжийг нэвтрүүлж байгаа. "Германд үйлдвэрлэв” уулзалтад оролцож буй төлөөлөгчид Монголоос ноос ноолууран бүтээгдэхүүн импортлох боломж байгааг хэлсэн. Мөн тус улсад мах, махан бүтээгдэхүүний хэрэгцээ их байдаг ажээ.

Сүүлийн хоёр жилд Зүүн, Өмнөд Азийг чиглэсэн хөрөнгө оруулалтаараа Европын холбоо тэргүүлж байна. Энэ дунд Германы хөрөнгө оруулалт жин дарж байгаа аж. Тодруулбал, Филиппин, Индонез зэрэг улсыг чиглэсэн хөрөнгө оруулалт эрс нэмэгджээ. Харин Монгол Улсын тухайд энэ үзүүлэлт сул байгааг мэргэжилтнүүд хэлж байна. Ашигт малтмалын салбарт л гэхэд Германтай хамтарсан нэг ч хайгуул, олборлолтын төсөл хэрэгжээгүй байна. "Германы хашир хөрөнгө оруулагчид санхүүжилт хийхээсээ өмнө нарийн судалгаа, хийдэг. Харин манай тогтворгүй бодлого хөрөнгө татахад саад болдог” гэж О.Батболд хэлж байлаа.

Үүнээс гадна "Тогтвортой бодлого нь бизнесийн үндэс. Хоёр тал улс төрийн түвшинд хэлэлцэж болно. Гэхдээ энэ хэлэлцээг ажил хэрэг, бизнес болгоход итгэлцэл чухал. Тэр итгэлийг тогтвортой харилцаа, бодлого бий болгодог. Хэрэв итгэлийг бий болгож чадвал бизнес хил хязгаар үл харгалзан хөгждөг” гэж Германы Заарланд муж улсын парламентын гишүүн, Байгаль орчин, хэрэглэгчдийн эрх ашгийг хамгаалах болон хууль зүйн сайд Райнхольд Йост онцолсон юм.

Г.Байгал

Засгийн газрын мэдээ