Нийлүүлэлтээ бууруулах Засгийн газрын бодлогын хүрээнд Хятадын нүүрс, гангийн салбарын бараг хоёр сая ажилчин цомхтголд орохоор боллоо. Тус улсын Хүний нөөц ба нийгмийн аюулгүй байдлын яамнаас хийсэн энэхүү мэдээлэл Хятадын ажиллах хүчнийхэнд хүндээр туслаа.

Өмнөд хөршийн эдийн засгийн удаашрал бодит амьдралд нөлөөлж, айдас улам бүр өсөн нэмэгдэж буйтай холбоотойгоор тогтворжоод байсан салбаруудад ажлын байргүй болсон ажилчид жил бүр ажиллах хүчний зах зээлд элсэн ордог 15 сая шинэ боловсон хүчинтэй өрсөлдөхөөс аргагүй болж байна. Цаашлаад нийгмийг хамарсан ажилгүйдэл, ажил хаялт, олон нийтийн эмх замбараагүй байдал нүүрлэхэд хүргэв.

Хүний нөөц, нийгмийн аюулгүй байдлын сайд Ин Вэймин даваа гарагт олон нийтийн мэдээллийн хэрэгслээр тус улсын нүүрсний салбараас 1.3 сая, гангийн үйлдвэрлэлээс 500 мянган хүн ажилгүй болох тооцоотойг мэдээлсэн. Цомхтголд орох ажилчдын зонхилох хэсэг нь төрийн өмчийн аж ахуйн нэгжид хамаарч буй аж. Хөдөлмөрийн зах зээлд гарч болзошгүй эмх замбараагүй байдлыг хязгаарлахын тулд зохих арга хэмжээг Засгийн газраас авч хэрэгжүүлэх болно гэдгийг Хүний нөөцийн сайд онцоллоо.

Ажлын байргүй болсон ажилчдыг дахин ажлын байраар хангах, шилжүүлэхэд 100 тэрбум юань буюу 15 тэрбум ам.долларын сан байгуулсан байна. Түүнээс гадна, ажлын байрны шилжих хөдөлгөөнийг дотооддоо зохицуулахын тулд компаниудад дэмжлэг үзүүлэх, ажилчдыг дахин сургах, тэтгэвэр тогтоох журмыг уян хатан болгохоор төлөвлөсөн байна.

Дэлхийн нийт гангийн үйлдвэрлэлийн талаас илүү хэсгийг дангаараа бүрдүүлдэг Хятад улс өнгөрсөн онд гангийн үйлдвэрлэлийн гарцаа 1981 оноос хойш анх удаа бууруулсан. 2020 он хүртэлх таван жилийн хугацаанд нийт 150 сая тонноор хорогдуулахаар Засгийн газар зорилт тавьсан байна. Бээжин дэх Lange Steel мэдээлэл судалгааны төвийн судалгаа хариуцсан захирал Ван Гуочин ган үйлдвэрлэлийн салбарт хөдөлмөр эрхэлж буй 10 хүн тутмын нэг нь ажлын байргүй болох тооцоотой байна гэв. Гэхдээ Засгийн газар 2013 он дууссанаас хойш энэ салбарын ажил эрхлэлтийн тухай мэдээллийг танилцуулахаа больсон нь дан ганц статистик мэдээнд тулгуурлан мэдээлэл боловсруулахад хэцүү байсныг хатагтай Гуочин учирлажээ.

Хятадын хөрөнгө оруулалтын банк болох Олон улсын хөрөнгийн корпораци өнгөрсөн сард ажлын байраа алдах эрсдэл 10 ажилчин тутмын гуравт ногдож буй бөгөөд нийт бараг гурван саяд хүрнэ хэмээн тооцоолсон байна. Гэхдээ энэ цомхтгол зөвхөн нүүрс, гангийн салбараар хязгаарлагдахгүй, цемент, шил, хөлөг онгоц үйлдвэрлэлийг ч хамрах аж.

Ажлын байрны тоог бууруулах асуудал өнгөрсөн сард Хятадын төмөр, гангийн нийгэмлэгийн үндэсний зөвлөлийн уулзалтын үеэр ч албан тушаалтнуудыг ч мөн түгшээжээ. Хятадын металлургийн үйлдвэрлэл төлөвлөлт, судалгааны хүрээлэнгийн тэргүүн Ли Шинчуан гангийн үйлдвэрлэлийн гарцыг бууруулснаар 400-500 мянган хүн ажлын байргүй болно хэмээн Хятадын эдийн засгийн долоо хоног тутмын сонинд ярьжээ. Хөдөлмөрийн зах зээлд их хэмжээний ажлын байр хорогдож байгаагийн зэрэгцээ энэ жил шинээр 15 сая залуу боловсон хүчин хөдөлмөрийн зах зээлд орох төлөвтэй байгаа нь өмнөх жилүүдээс өссөн үзүүлэлт аж.

Хятадын хөдөлмөр эрхлэлтийн тогтмол хэвлэлд бичсэнээр үйлдвэрлэлийн осол, ажил хаялт ихэссэн нь салбарын дарамтыг нэмэгдүүлж байгаа гэнэ. Хөдөлмөр эрхлэгчийн эрхийг хамгаалах Хонконгийн нэгэн байгууллагын олж тогтоосноор нэгдүгээр сард Хятадад үйлдвэрийн 503 осол тэмдэглэгдсэн нь жилийн өмнөх 272-оос бараг хоёр дахин нэмэгдсэн үзүүлэлт байна. "Нийгмийн нэн тулгамдсан асуудал хүмүүсийн аюулгүй байдлын талаарх ойлголтод нөлөөлж байна. Манай улс бол социалист тогтолцоотой. Ажиллах хүчнийхээ амь нас, аюулгүй байдлыг хамгаалах ёстой” хэмээн хатагтай Ван байр сууриа илэрхийлэв.

Юань Янг