Харин ингэхийн оронд түүнтэй холбоотой хүмүүсийг авлига, албан тушаалын хэрэгт ээлж дараалан сэжиглэх нь угтаа Х.Баттулгыг гарах гарцгүйгээр шаварт унагааж байгаагаас өөрцгүй юм.

Хамгийн гол нь УИХ-ын гишүүн Х.Баттулгын эсрэг хөдөлж буй нүүрсчин бүлэглэлд одоохондоо бүхий л эрх мэдэл байна. Учир нь тэд Женкогийн эсрэг Цагдаа, АТГ, шүүх гэх мэт хүчний байгууллагуудыг хөдөлгөж чадаж байгаагаас үүнийг мэдэж болно.

Х.Баттулгын зүгээс дээрх байдлыг өөрийн өмгөөлөгч Д.Пүрэвбаатараар дамжуулан хэвлэлд дуулгасан. Тэрбээр ашиг сонирхолын зөрчилтэй байж болзошгүй ЦЕГ-ын дарга Р.Чингисийг албан тушаалаас буулгаж, шалгах хэрэгтэй гэснээс үүнийг харж болно.

Тавантолгой ордыг Энержи ресурс болон Хятадын Шинхуа компанийн мэдэлд өгч ашиглуулах сонирхол хэн хэнд байгаа вэ, байсан бэ гэдэг асуултад одоо хариулт хайцгаая. Сайд М.Энхсайхан, Ерөнхийлөгч Ц.Элбэгдорж, Ерөнхий сайд Ч.Сайханбилэг нарт ийм сонирхол байсан уу. Мэдээж байсан.

Ч.Сайханбилэг, М.Энхсайхан нарын тухайд Шийдлийн гэх засаг байгуулагдсан цагаас эхлэн Тавантолгой ордыг ямар нэг аргаар хөдөлгөх нь эдийн засагт эерэг үр дүн авчирна гэдэг мессэжийг нийгэмд өгсөөр байв. Улмаар тус ордыг Хятадын "Шинхуа", Японы "Сүмитомо", Монголын "Энержи ресурс"-ийн консорциумд өгч ашиглуулах гэрээг өнгөрсөн оны дөрөвдүгээр сард Засгийн газраар батлуулах гэж оролдсон боловч бүтэлтэй болоогүй. Товчхондоо дээрх төлөвлөгөөг Х.Баттулга өөрийн хамтрагч З.Энхболдын гарт буй УИХ-ын даргын алхаар амжилтай тас цохиулж, гацааж чадсан юм.

Харин Ерөнхийлөгч Ц.Элбэгдоржийн зүгээс Тавантолгойг гацаасан энэхүү алхамыг төдийлөн сайшааж үзэхгүй байгаа гэдгээ алхам тутамдаа илэрхийлж, өнгөрсөн цагаан сараар 25 дугаар суваг телевизэд ам нээхдээ, "Таван толгой одоо өнгөрсөөн. Хайран сайхан алдагдсан боломж" хэмээн халаглаад авсан. Ерөнхийлөгчийн энэ мэт маш олон байр суурийг хөндлөнгөөс ажиглахад М.Энхсайхан нарын боловсруулсан анхны гэрээгээр тус ордын хувь заяаг шийдсэн бол дээр байсан юм гэдэг санаа цухалзаж буйг төвөггүй ойлгож болно.

Харин олон нийтийн өмнө ил гарахгүй байгаа ч, хөшигний цаанаас байж болох бүхий л лоббиг хийж буй нууц эзэд бол мэдээж УИХ-ын гишүүн Л.Энх-Амгалан, Г.Батхүү, Сү.Батболд, МCS группын Ж.Од, түүний төрсөн дүү Ж.Оджаргал, Петровисийн Ж.Оюунгэрэл тэргүүтэй хүмүүс. Тэдний зүгээс Тавантолгойг "Энержи ресурс"-т өгөхгүй гэвэл үндэсний хэмжээний томоохон компани дампуурлаа зарлаж ч болзошгүй хэмээн хямралд өртсөн монголчуудын хоосон ходоод, өрөвч сэтгэл дээр тоглолт хийсээр ирсэн.  

Эдгээр хүмүүс Тавантолгойг өөрсдийн талд шийдүүлэхийн тулд цаашид Х.Баттулгыг улс төрөөс арчин хаях, тойрон хүрээлэгчдийг нь  баривчилж нийгэмд түүнийг Н.Энхбаяраас хойш төрсөн авлигын II загалмайлсан эцэг, аюултай этгээд гэж итгүүлэх хангалттай шалтгаан бий. Энэхүү шалтгаан нь нам дамжсан олигархи бүлэглэлийн дундын хэтэвчинд ирээдүйд орж ирэх толгой эргэм мөнгөний тоо, түүнтэй нягт холбогдсон албан тушаал, эрх мэдэлтэй эцэстээ нягт уялдана. Энэ мэт эрх ашгийнх нь эсрэг Х.Баттулга зогссоор байгаа цагт тэд хэзээ ч бууж өгөхгүй нь тодорхой.

Товчхондоо, Тавантолгойн төлөөх бүлэглүүлүүдийн зодооны гуравдугаар үед "Эх оронч" Х.Баттулга нар хүнд цохилтод орж буланд шахагдчихаад байна. Гэхдээ түүнд нүүрсчдийн намыг илчилж, энэ байдлаас өөрийгөө аварч гарах нэг хөзөр бий гэсэн. Үнэхээр тийм бол яриад байгаа нууц хөзрөө удахгүй дэлгэх биз. Тэр үед нүүрсний төлөөх зодооны учир шалтгааныг эрэлхийлсэн энэ мэт яриагаараа эргэн уулзацгаая.

Х.Онон