Таваарын үнийн уналтын нөлөөг багасгаж, хөрөнгө оруулагчдын дунд үүссэн түгшүүрийг намжаах зорилгоор дэлхийн голлох олборлогчид олон тэрбум ам.доллараар хэмжигдэх өрөө эргүүлэн худалдаж авах боллоо.

Barrick Gold, Anglo American зэрэг олборлогч энэ сард 2.5 тэрбум ам.долларын бондоо эргүүлэн худалдаж авав. Уг арга хэмжээ нь сүүлийн хэдэн сард гаргасан өрөө эргүүлэн авч буй Vedanta Resources, Glencore, Fortescue Metals Group зэрэг олборлогчийн жишээг дагаж буй хэрэг.

Таваарын үнэ унаснаас шалтгаалан хуучин өрөө барагдуулах нь түвэгтэй болж буйтай уялдан олборлох үйлдвэрлэл эрхлэгчдийн өр зээлд хөрөнгө оруулагчид сэтгэл түгших нь ихэслээ. Төмрийн хүдэр, зэс зэрэг таваарын эрэлт ихэссэн үед олборлогчид төрөл бүрийн төслүүдэд мөнгө цутгаж байсан нь өр зээлийн хэмжээг их хэмжээгээр өсгөсөн. Тухайн үед бага хүү зээл авах таатай нөхцөл болж байсан юм.

Өрөө эргүүлэн худалдаж авах нь таваарынхтай зэрэгцэн хувьцааных нь үнэ буурсан зарим олборлогчийн хувьд шинэ бонд гаргалгүйгээр тайлан тэнцэл хадгалж үлдэх арга. Жишээ нь, Anglo-ийн хувьцаа 2015 онд үнээ 75 хувиар алдсан удаа бий. Өрөө эргүүлэн худалдаж авах хэмжээгээр Barrick тэргүүлж байна.

Алт олборлолтоор дэлхийд тэргүүлдэг Канадын компани 750 сая ам.долларын бондоо эргүүлэн худалдаж авчээ. Тус компани 2015 онд 2.1 тэрбум ам.долларын өрөө буцаан худалдаж авсан. Өнгөрсөн онд 13 тэрбум ам.доллараар хэмжигдэж байсан өр зээлээ 10 тэрбум хүртэл багасгах үүднээс Barrick Gold хөрөнгөө зарж, олсон бэлэн мөнгөөр бонд худалдан авч эхлэв. Энэ онд тус компани өрөө дахиад хоёр тэрбум ам.доллараар багасгах зорилт тавьжээ.

"Хувьцаа эзэмшигчдээс тавьж буй шаардлага учраас өрөө багасгах нь бидний гол зорилго. Манай компани 2018 оноос өмнө өрөө багасгаж, эргэлтийн хөрөнгөө нэмэгдүүлэн, улмаар 2032 он гэхэд үндсэндээ өрийнхөө тэн хагасыг төлж дуусгана” хэмээн Barrick мэдэгдэж байна.

Компаниуд ижил арга хэмжээ авч байгаа нь хоёр шалтгаантай хэмээн Societe Generale-ийн хөрөнгийн зах зээлийн мэргэжилтэн Жонатан Вайнбергер үзэв. "Нэгдүгээрт, тайлан тэнцэл сайжирна. Хоёрдугаарт, орлого ихэснэ” хэмээн тэрбээр тайлбарласан юм. Бондыг нэрлэсэн үнээс нь доогуур арилжиж байгаа нөхцөлд л бэлэн мөнгөөр эргүүлэн худалдаж авах ажиллагаа нь тухайн компанийн цэвэр өрийг багасгана. Энэ нь мөн хүүгийн төлбөрийг ч бууруулна.

Anglo 2018 он хүртэлх хугацаатай 7.5 тэрбум ам.долларын бондынхоо нэг хэсэг болох 1.83 тэрбумын үнэлгээтэй өрийг 1.7 тэрбум ам.доллараар эргүүлэн худалдаж авсан тухайгаа энэ сард мэдэгдсэн. Уг арилжаанаас 130 сая ам.долларын ашиг олсон тус компани ирэх хоёр жилд хүүгийн төлбөрөөс дахиад 60 саяыг хэмнэх боломжтой.

"Өрөө эргүүлэн худалдаж авах чадвартай олборлогчдын хувьд энэ бол хийх ёстой алхам. Хувьцаа эзэмшигчдэд хүндхэн байгаа одоогийн нөхцөлд энэ нь Anglo-д өр, хөрөнгийн харьцаагаа тэнцүүлж, тайлан тэнцлээ сайжруулан, материал хэмнэх боломж болно” хэмээн Лондон дахь Investec-ийн Уул уурхайн салбарын шинжээч Жереми Врэтхол тайлбарлав.

Мөнгөн хөрөнгийн хэмжээгээ багасгасан, шаардлагатай нөхцөлд гурван банкнаас хоёр жилийн хугацаатай зээл авах замаар 1.5 тэрбум ам.долларын эргэлтийн нэмэлт хөрөнгө үүсгэхээр Anglo төлөвлөж байгаагаа мэдэгдсэн. "Өрийнх үнэ буурсан үед эргүүлэн худалдаж авсан нь Аnglo-ийн хувьд гярхай бөгөөд самбаатай арга хэмжээ болсон. Түүгээр зогсохгүй урт хугацааны зээлд нь сөрөг нөлөө үзүүлэхгүй байх сайн талтай” хэмээн Investec-ийн өөр нэг шинжээч Марк Эллиот өгүүллээ.

Жэймс Уилсон, Гэвин Жэксон

Засгийн газрын мэдээ