УИХ-ын өнгөрсөн намрын чуулганаар Гацууртын ордод төрийн эзэмших хувийг тогтоох тухай тогтоолын төслийг баталж, Монголын төр 34 хүртлэх хувийг эзэмшихээр болсон билээ. Гэтэл сүүлийн өдрүүдэд Гацууртын ордын лицензийг шүүхээс түтгэлзүүлсэн гэх мэдээлэл олоннийтийн сүлжээнд мэр сэр харагдах болсон юм. Тэгвэл уг мэдээлэл нь ор үндэслэлгүй бөгөөд чухамдаа шүүх дээр яригдаж байгаа асуудал нь өөрөө "Гацуурт”-ын ордыг ашиглах тухай УИХ-ын шийдвэртэй ямар ч холбоогүй юм.

Үйл явдлыг эргэн сөхвөл Гацууртын ордыг Монголын төртэй хамтарч ашиглахаар болсон "Сентерра гоулд Монголия” компани нь одоогоос 15 жилийн өмнө буюу 2001 онд "Камеко гоулд Монголия” нэртэй байсан юм байна. "Камеко гоулд Монголия” компани нь 2004 онд Торонтогийн хөрөнгийн биржид олон нийтэд нээлттэй хувьцаат компани болохдоо нэрээ "Сентерра гоулд Монголия” ХХК болон нэрээ өөрчилж, улмаар тусгай зөвшөөрлүүдээ шилжүүлэн авчээ. Чухам энэ асуудлаас болж "Ноён уулаа аврах хөдөлгөөн” гэх төрийн бус байгууллагаас "Сентеррагоулд Монголия” компани нэрээ өөрчилсөн тухай 2004 оны шийдвэрийг хүчингүй болгуулахаар шүүхэд хандсан байдаг.

Уг асуудалтай холбоотойгоор нийслэлийн Захиргааны хэргийн шүүх хэрэг үүсгэж, энэ хэрэгт хариуцагчаар нь Ашигт малтмалын газрын кадастрын хэлтэс, харин гуравдагч этгээдээр лиценз эзэмшигч "Сентерра гоулд Монголия” ХХК оролцож байгаа юм байна.

Нийслэлийн Захиргааны хэргийн шүүх хуралдаж, анхан шатны шүүхээс "Камеко гоулд Монголия” нэрээ "Сентерра гоулд Монголия” болгож өөрчилсөн 2004 оны шийдвэрийн үйлчлэлийг түр зогсоох "акт” гаргасныг өлгөж аваад "УИХ-ын тогтоолын төслийг шүүх хүчингүй болголоо, бид яллаа. Гацууртын тусгай зөвшөөрлийг цуцаллаа” хэмээн сошиалаар худлаа шоудах "Ноён уулаа хамгаалъя” хөдөлгөөнийхөн эндээс гарах сөрөг үр дагаварыг нь тооцож үзсэн үү?

Ингэж асуух шалтгаан нь Гацууртын ордод төрийн эзэмших хувийг тогтоох УИХ-ын тогтоолын төслийг шүүхээс түдгэлзүүлсэн гэх буруу мэдээлэл цацсанаас болж Монголын төрийн мэдэлд 34 хувь нь байгаа Гацууртын орд дахиад л нинжа нарын гарт сүйдлэгдэх дээрээ тулаад байгааг сануулах нь зөв биз. Өнгөрсөн зунжингаа тус орд нинжа нар хөлд нэрвэгдэж, цагдаа, цэргийн хүчээр асуудлыг арай гэж шийдвэрлэснийг Иргэний хөдөлгөөний нөхдүүд ингэхэд мартаагүй байлтай. 

Нэр сольсон гэх асуудлаар анхан шатны шүүх хурал өнөөдрийг хүртэл болоогүй байгаа юм. Харин нийслэлийн Захиргааны хэргийн шүүхээс гаргасан "акт”-ыг Иргэний хөдөлгөөнийхөн энэ мэтээр буруу ташаа тайлбарласнаас болоод Гацууртын орд дээр дахин замбараагүй байдал үүсвэл хариуцлагыг нь хэн үүрэх вэ. Хохирлыг нь хэн барагдуулах вэ. Гацууртын орд бол эзэнгүй орд биш. Монголын төр тодорхой хувь эзэмшиж байгаа орд. Тэгээд ч энгийнээр бодоход хувь хүн хүртэл нэрээ өөрчилсөн тохиолдолд шинэ нэр дээрээ хөрөнгөө дахин бүртгүүлэх, шилжүүлэх шаардлагатай болдог. Гэтэл нэр өөрчилсөн гэх асуудлаар далим гаргаж, шүүхийн шийдвэр эцэслэгдээгүй байхад илтэд худлаа мэдээлэл цацаж байгаа Иргэний хөдөлгөөнийхний цаад зорилго чухам юу вэ гэсэн асуулт тавихад хүргэж байна.

Б.ХОНГОР