Азийн хөгжлийн банкнаас дэлхийн улс орнууд болоод Монгол улсын эдийн засгийн нөхцөл байдлын ойрын хугацааны төлөвийн талаар мэдээлэл хийлээ.

ДЭЛХИЙН ЭДИЙН ЗАСАГ: ХЯТАДЫН ХӨГЖЛИЙН ХУРД СААРНА

БНХАУ-ын эдийн засгийн өсөлтийн хурдац буурах төлөвтэй байна гэж Азийн хөгжлийн банк үзэж байна.

Харин Азийн хөгжиж буй орнуудын өсөлт 2014 онд тогтвортой байхаар байна. АХБ-ны жил тутмын голлох хэвлэл болох "Азийн хөгжлийн төлөв 2014” тайланд Азийн хөгжиж буй орнуудын ДНБ-ний өсөлт 2014 онд 6.2 хувь, 2015 онд 6.4 хувь байна гэж төсөөлжээ.

Голлох аж үйлдвэржсэн орнуудын эдийн засгийн сэргэлт улам бүр эрчимжиж байна. АНУ, евро бүс хийгээд Японы ДНБ-ний өсөлт дунджаар 2013 онд 1 хувь байсан бол 2014 онд 1.9 хувьд хүрч улмаар 2015 онд 2.2 хувьд хүрнэ гэжээ.

БНХАУ-ын хувьд зээлийн өсөлтийг сааруулж, аж үйлдвэрийн илүүдэл хүчин чадлыг хумиж эхэлсэн, орон нутгийн засаг захиргааны өр ихсэж буй асуудал, цалингийн зардал өссөн, юаний ханш чангарсан, улсын хөгжлийн бодлогыг тооноос чанар руу хандуулах болсон зэрэг шалтгаанаар эдийн засгийн өсөлт нь өнгөрөгч онд 7.7 хувь болж буурсан байна. Дээрх хүчин зүйлсийн нөлөө үргэлжилсээр байх тул БНХАУ-ын ДНБ-ний өсөлт 2014 онд 7.5 хувь, 2015 онд 7.4 хувь болж тус тус буурах төлөвтэй аж.

Олон улсын эдийн засгийн эрсдэл харьцангуй намжаад байгаа хэдий ч дараах гурван нөхцөл байдлыг анхааралдаа байлгах нь чухал байна. Нэгдүгээрт, БНХАУ-д зээл олголтыг хязгаарлах зорилготой арга хэмжээг маш огцом бөгөөд эдийн засгийн өсөлтийг сааруулахуйц хэмжээнд авсан тохиолдолд, эдийн засгийн өсөлт нь удааширна. Ингэвэл манай улс болон бусад худалдааны түнш орнуудад хүчтэй нөлөөлөх магадлалтай. Хоёрдугаарт, голлох аж үйлдвэржсэн орнуудын эдийн засгийн сэргэлтийн талаарх мэдээлэл алаг цоог байгаагаас үүдэн Азийн бараа бүтээгдэхүүний эрэлт тэдгээр улс орнуудад хүлээсэн хэмжээнд хүрэхгүй байх магадлалтай. Гуравдугаарт, АНУ-ын мөнгөний бодлогод орох өөрчлөлтөөс үүдэн дэлхийн санхүүгийн зах зээлд дахин цочрол үүсч болзошгүйг анхаарах нь чухал.

МОНГОЛ УЛС: ЭДИЙН ЗАСАГ ӨСӨХ МАГАДЛАЛТАЙ Ч ТУН ЭМЗЭГ

Монгол улсын хувьд "Оюу толгой” төслийн зэсийн баяжмалын үйлдвэрлэл 2013 онд эхэлсэнтэй холбоотойгоор эдийн засгийн өсөлт энэ онд 9.5 хувьд хүрч, харин 2015 онд 10 хувь болно гэж үзжээ.

Гадаадын шууд хөрөнгө оруулалт хурдацтай буурч, нүүрсний экспорт унаж байгаагийн зэрэгцээ төсөв, мөнгөний тэлэх бодлого хүчтэй явуулсан нь төлбөрийн тэнцлийн дарамт бий болгоод байна.

Төгрөгийн сулралын нөлөөгөөр урсгал дансны алдагдал тогтворжоод байгаа бол төлбөрийн тэнцлийн дарамтыг бууруулах, төгрөгийн ханшийг тогтворжуулах, инфляцыг хазаарлахын тулд нь эдийн засгийн бодлогыг чангатгаж, дотоод эрэлтийн өсөлтийг бууруулах шаардлага бий болж байна гэлээ.

Монгол улсын эдийн засгийн цаашдын төлөв БНХАУ-ын болон дэлхийн эдийн засгийн төлөв байдлаас ихээхэн хамааралтай хэвээр бөгөөд болзошгүй гадаад цочролоос хамгаалах "зөөлөвч”-ийг одоо баримталж буй бодлого нь бүрдүүлж чадахааргүй байна гэж Азийн хөгжлийн банкнаас үзэж байна.

gogo mn