Тавантолгой

Өмнөговь аймгийн Цогтцэций суманд байрладаг. Зургаан тэрбум тонн чулуу нүүрсний нөөцтэй. Түүнээс нэг тэрбум гаруй нь коксжсон нүүрс. Тус ордыг "Таван толгой" ХК, "Энержи ресорс" ХХК, "Дайцуки" ХХК эзэмшдэг.

Өнөөгийн илэрсэн нөөц тусгай зөвшөөрлийн хүрээний хэмжээ ба цаашид нөөц нэмэгдэх магадлал өндөр. Нүүрсээ Зүүн өмнөд Азийн зах зээлд гаргах бэлтгэл хийж байгаа. Оросын "Восточный" боомт хүртэлх нүүрсний тээврийн туршилт амжилттай болсон. Хятадын Тяньжин боомтоор далайд гаргах боломжтой. Өнөөдөр дэлхийн зах зээл дээр нэг тонн коксжсон нүүрс 120-150, чулуун нүүрс 70-90 ам.доллар байна.

Оюутолгой

Өмнөговь аймгийн Ханбогд суманд байрладаг тус орд 16 сая тонн зэс, 600 гаруй тонн алтны нөөцтэй. Тус ордын 34 хувийг Монгол Улсын Засгийн газар, 56 хувийг Канадын "Айвехоу" майнз, арван хувийг Английн "Рио Тинто" компани эзэмшиж байна. Гадаадын хөрөнгө оруулагч нар Монгол Улсын Засгийн газартай тогтвортой байдлын гэрээний ашиглалт явуулах ба Монголд зэсийн үйлдвэр байгуулсан тохиолдолд эхний ээлжинд баяжмалаа өгөх үүрэгтэй. Дэлхийн зах зээлд нэг тонн зэсийн үнэ. 8300 орчим, нэг тонн алт 44 сая ам.доллар байна.

Асгат

Баян-Өлгий аймгийн Ногооннуур суманд байрладаг. 2247 тонн цэвэр мөнгөний нөөцтэй. Монгол, Оросын хамтарсан "Монголросцветмет" нэгдэл тусгай зөвшөөрлийг нь эзэмшдэг. Одоогоор ашиглалтгүй байгаа. Олборлох зардал өндөр гэж үздэг. Дэлхийн зах зээлд нэг тонн мөнгөний үнэ 800 гаруй мянган ам.доллар байна.

Улаан-Овоо

Сэлэнгэ аймгийн Түшиг суманд байрладаг 80 орчим сая нүүрсны нөөцтэй Канадын "Професи ресурс" компани эзэмшдэг

Эрдэнэт

Орхон аймгийн Баян-Өндөр суманд байрладаг. 3.2 сая тонн зэс, зуу шахам тонн молибдений нөөцтэй. Орос Монголын хамтарсан үйлдвэр.

Багануур

Улаанбаатар хотын Багануур дүүрэгт байрладаг. 510 сая тонн нүүрсний нөөцтэй "Багануур" ХК эзэмшдэг.

Шивээ овоо

Говьсүмбэр аймгийн Шивээговь суманд байрладаг. 560 сая тонн нүүрсний нөөцтэй. "Шивээ овоо" ХК эзэмшдэг.

Бороо

Сэлэнгэ аймгийн Баянгол суманд байрладаг. 22 тонн алтны нөөцтэй. Английн "Сентерра гоулд" компани Монгол Улсын Засгийн газартай тогтвортой байдлын гэрээ байгуулсан.

Бүрэнхаан

Хөвсгөл аймгийн Алаг-Эрдэнэ суманд байрладаг. 40 сая тонн фосфоритын нөөцтэй.

Төмөртэй

Сэлэнгэ аймгийн Хүдэр суманд байрладаг. 230 сая тонн төмрийн хүдрийн нөөцтэй.

Цагаан суварга

Дорноговь аймгийн Мандах суманд байрладаг. 1.3 сая тонн зэс, 43 мянган тонн молибдений нөөцтэй. Улсын төсвийн хөрөнгөөр хайгуул хийгдсэн.

Төмөртэйн овоо

Сүхбаатар аймгийн Сүхбаатар суманд байрладаг. 800 гаруй мянган тонн цайрын нөөцтэй. Монгол Улсын Засгийн газрын тогтвортой байдлын гэрээтэй.

Мардай, Дорнод, Гурванбулаг

Дээрх ордууд бүгд Дорнод аймгийн Дашбалбар суманд байрладаг. Нийтдээ 30 мянган тонн ураны нөөцтэй. Улсын төсвийн хөрөнгөөр хайгуул хийгдсэн. Нөөц нэмэгдэх магадлалтай. Хайгуул үргэлжилж байгаа.

Нарийн сухайт

Өмнөговь аймгийн Гурван тэс суманд 90 сая тонн нүүрсний нөөцтэй. Засгийн газрын тогтвортой байдлын гэрээтэй.