Төрийн өмчийн бод­лого зохицуулалтын дарга Ц.Ням-Осор өчиг­дөр мэдээлэл хийж "Эрдэнэт” үйлдвэрийн ТУЗ хуралдаж даргаа сонгон ажилдаа орсон талаар мэдээлэл хийлээ.  "Эрдэнэт” үйлдвэрийн 51 хувийг эзэмшигч Зас­гийн газар ТУЗ-ийн ги­шүүдээр У.Бямбасүрэн, Г.Нандинжаргал, Б.Доржсэмбэд, Д.Дэмбэрэл нарыг томилоод байсан бол 49 хувийг нь эзэмшигч "Монгол зэс" корпорац Да.Ганболд, О.Орхон, М.Мөнхбаатар нарыг томилжээ. ТУЗ-ийг есөн хүний бүрэлдэхүүнтэй байлгах тухай ярьж байсан ч эцэстээ ийнхүү долоон хүний бүрэлдэхүүнтэй байхаар тогт­жээ. Шинээр бүрдсэн ТУЗ анхны хурлаа хийж Засгийн газрын Хэрэг эрхлэх газрын дэд дарга У.Бямбасүрэнг даргаараа сонгосон байна. Харин үйлдвэрийн даргын томилгоогоо хэлэлцээгүй гэд­гийг Төрийн өмчийн бод­лого зохицуулалтын газрын дарга Ц.Ням-Осор онцол­лоо. ТУЗ-ийн даргаа томилсноос гадна дүрмээ баталжээ. 

"Монгол зэс” корпорац ТУЗ-ийн дарга болон үйлд­вэрийн даргыг хоёр талаас хоёр хоёр жилийн хугацаатай томилох санал гаргасан байна. Гэвч уг саналыг нь 51 хувийг эзэмшигч тал хүлээж аваагүй бө­гөөд дөрөв дөрвөн жилийн хугацаатайгаар Засгийн газар санал болгон томилуулдаг бай­хаар дүрмээ баталжээ. Компанийн тухай хуулийн дагуу үйлдвэрийн захирал нь ТУЗ-ийн гишүүдийнхээ 66-гаас дээш хувийн саналаар сонгогдох ёстой юм байна. Өөрөөр хэлбэл, Засгийн газар "Эрдэнэт” үйлдвэрийн захирлаар  хэ­нийг  томилуулахаа ший­дэх ч цөөнхийн төлөөл­лийн дэмжлэгийг заавал хүлээж байж томилогдох юм байна. ТУЗ-ийн баталсан дүрмийн дагуу "Эрдэнэт” үйлдвэр дэргэдээ Аудит, Нэр дэвшүүлэх, Цалин, урам­шууллын гэсэн гурван хороотой байх аж. Уг гурван хорооны Аудит, Нэр дэвшүүлэх гэсэн хоёр хорооны даргыг "Монгол зэс" корпорац, Цалин, урамшууллын хорооны даргыг Засгийн газар томилж байхаар болжээ.
"Эрдэнэт” үйлдвэрийн ТУЗ-ийн гишүүдээр томи­­логдсон хүмүүсийг танил­цуулъя.

Засгийн газрын Хэрэг эрхлэх газрын дэд дарга У.Бямбасүрэн

ТУЗ-ийн дарга У.Бямба­сүрэн нь одоо Засгийн газрын Хэрэг эрхлэх газрын дэд даргаар ажиллаж байгаа юм. Тэрээр Хүмүүнлэгийн ухааны их сургууль, Итали улсын Бокконийн их сургуулийг тус тус төгсчээ. Мөн БНСУ, Их Британид менежмент, Малайзад даатгал, Тайванд хөгжлийн бодлогын чиглэлээр мэр­гэжил дээшлүүлж байжээ. Багш мэргэжилтэй бөгөөд бизнесийн удирдлагын магистр зэрэгтэй аж. Ажил­ласан байдлын тухайд 1994-1997 онд "Монгол даатгал” төрийн өмчит улсын үйлдвэрийн газар мэргэжилтэн, ме­нежер, 1999-2004 онд "Монгол даатгал” ХХК-д ерөнхий менежер, 2004-2007 онд Хүнс, хөдөө аж ахуйн сайдын зөвлөх, 2007-2010 онд Монголын ардчилсан социалист залуу­­чуудын холбоонд ерөнхий нарийн бичгийн дарга, 2010-2012 онд Нийг­мийн хамгаалал, хөдөлмөрийн яамны төрийн нарийн бичгийн дарга, 2012-2015 онд "Миг даатгал” компанид зөвлөх, ТУЗ-ийн даргаар ажиллаж байжээ. 2015 оноос хойш Засгийн газрын Хэрэг эрхлэх газрын дэд даргаар томилогдтолоо МАН-ын ерөнхий нарийн бичгийн дарга Ж.Мөнхбатын зөв­лөхөөр ажиллаж байв.

Уул уурхай, хүнд үйлдвэрийн яамны төрийн нарийн бичгийн дарга Г.Нандинжаргал

Хариуцсан ажлынхаа чиг үүргийн дагуу "Эрдэнэт” үйлдвэрийн ТУЗ-ийн гишүү­нээр томи­логдсон дараа­гийн хүн бол Уул уурхай, хүнд үйлдвэрийн яамны тө­рийн нарийн бичгийн дарга Г.Нандинжаргал. Тэрээр 1996 онд нийс­лэлийн нэгдүгээр дунд сургууль, 2003 онд ОХУ-ын Москва хотын Олон улсын харилцааны дээд сургуулийг эдийн засагч мэргэжлээр төгссөн бө­гөөд бизнесийн ухааны магистр зэрэгтэй юм байна. Мөн 2010 онд Синга­пурын "Ли Куань Ю” институтэд төрийн захиргааны удирдлагын чиглэлээр мэргэш­жээ. Г.Нандинжаргал нь 2003 оноос хойш төрийн албанд ажиллажээ. Тодруулбал, 2003-2010 онд Монгол банкны Мөн­гө­ний бодлого судалгааны га­зарт эдийн засагч, 2010-2013 онд нийслэлийн Засаг даргын тамгын газрын Хотын хөгжлийн бодлогын хэлтсийн дарга, 2013 онд нийслэлийн Эдийн засгийн хөгжлийн газ­рын орлогч дарга, 2013-2014 онд Үйлдвэр, хөдөө аж ахуйн яамны Төрийн захиргааны удирдлагын газрын дарга, 2014-2015 онд Үйлдвэр, хөдөө аж ахуйн яамны Хүнсний бод­логын хэрэгжилтийнг зохи­цуулах газрын дарга, 2015-2016 онд "Эрдэнэс Монгол” ком­п­анийн дэд захирлын багт төслийн захирлын алба хашсан байна.

Сангийн яамны нягтлан бодох бүртгэлийн газрын дарга Б.Доржсэмбэд

Засгийн газраас "Эр­дэнэт” үйлдвэрийн ТУЗ-ийн гишүүнээр то­ми­логд­сон дараагийн хүн бол Сан­гийн яам­ны Нягтлан бодох бүрт­­гэлийн газрын дарга Б.Доржсэмбэд. Өмнөх Засгийн газрын үед  байгуулагдсан хууль бусад тооцогдоод буй ТУЗ-д гишүүнээр томилогдоод байсан юм. Өөрөөр хэлбэл, түүнийг эрхэлж буй ажлынх нь үүрэг чиглэлийн дагуу ТУЗ-ийн ги­шүүнээр улираан томилсон нь энэ. Тэрээр Сангийн яаманд удаан ажиллаж байгаа бөгөөд Нягтлан бодох бүртгэлийн газрын даргаар ажиллахаасаа өмнө Нэгдсэн төсвийн бодлого, төлөвлөлтийн хэлтэс, Орлогын хэлтэс, Төсвийн хяналт, эрсдэлийн удирдлагын газар, Хөгж­лийн санхүүжилт, өрийн удирд­лагын газрын даргаар ажиллаж байжээ. Мөн өмнөх Засгийн газрын үед Эгийн голын усан цахилгаан станцын төслийн удирдах хорооны гишүүнээр ажиллаж байв. Одоо "Эрдэнэт” үйлдвэрээс гадна Төрийн банкны ТУЗ-ийн гишүүнээр давхар ажилладаг юм.

УИХ-ын гишүүн асан Д.Дэмбэрэл

Дээрх нэр бүхий гурван эрхэм одоо эрхэлж буй үндсэн ажлынхаа чиг үүргийн даргуу "Эрдэнэт” үйлдвэрийн ТУЗ-ийн даргаар томилогдсон бол УИХ-ын гишүүн асан Д.Дэмбэрэлийг төрд удаан ажил­ласан туршлагыг нь үндэс­лэн томилсон гэхэд болно. Тэрээр УИХ-д зургаа дараалан сонгогдсон туршлагатай улс­төрч. Ийнхүү зур­гаан удаа тас­ралтгүй сонгогдохдоо Нийгмийн хамгаалал, хөдөл­мөрийн сайд, УИХ-ын даргаар ажилласан юм. Тэрээр 1941 оны дөрөвдүгээр сарын 15-нд Ховд айм­гийн Манхан суманд төрсөн. 1964 онд Эдийн засгийн дээд сургуулийг Худалдааны эдийн за­саг, технологи зохион байгуулалт мэргэжлээр, 1977 онд ОХУ-ын Москва хот Нийгмийн ухааны академид улс төрийн дээд боловсрол эзэмшсэн. 1992 онд УИХ-ын гишүүнээр сонгогдох хүртлээ 28 жил төрийн болон улс төрийн албан тушаал ха­шиж байжээ. Тодруулбал, 1964-1968 онд Ховд аймгийн Ху­далдаа бэлтгэлийн удирдах газрын орлогч дарга, 1968-1970 онд Ховд аймгийн МАХН-ын хо­роонд улс төр, гэгээрлийн ка­бинетэд эрхлэгч, лектор, 1970-1972 онд Ховд аймгийн ХЗЭ-ийн хорооны нэгдүгээр нарийн бичгийн дарга, 1972-1975 онд МХЗЭ-ийн Төв хороо­ны эвлэлийн байгуул­лагын хэлт­сийн эрх­лэгч, 1977-1984 онд МАХН-ын Төв хороонд зохион байгуулагч, 1984-1990 онд МАХН-ын Төв хороонд зохион бай­­гуулагч, группын ахлагч,  1990-1992 онд Завхан аймгийн МАХН-ын хороо­ны нэгдүгээр на­рийн бич­гийн даргаар ажил­ласан байна.

"Эрдэнэс-оюутолгой” компанийн гүйцэтгэх захирал асан Д.Ганболд

"Эрдэнэс-Оюутолгой” ком­панийн гүйцэтгэх за­хир­­лын ажлаа өгөөд удаагүй байсан Да.Ганболдод "Эрдэнэт” үйлдвэрийн 49 хувийг эзэмшигчид санал тавьж ТУЗ-ийн даргаар томи­­лоод байв. Гэвч энэ­хүү шийдвэрийг нь Засгийн газар хүчингүй болгосон юм. Улмаар "Монгол зэс” кор­порац Да.Ганболдыг ТУЗ-ийн гишүүнээр ажиллуулахаар шийдвэрлэжээ. Түүний төр, хувийн хэвшилд ажилласан туршлага, Оюу­толгой хэмээх томоо­хон төслийн удирд­лагын багт ажиллаж байсан зэрэг нь ТУЗ-ийн гишүүнээр сонгох шалтгаан болсон биз ээ. 
Тэрээр эдийн засагч мэргэжилтэй бөгөөд Шадар сайд, нийслэлийн Засаг даргын орлогч зэрэг томоохон албан тушаал хашиж байсан юм.

Худалдаа хөгжлийн банкны гүйцэтгэх захирал О.Орхон

"Монгол зэс" корпорац "Эрдэнэт” үйлдвэрийн 49 хувийг худалдаж авахдаа Худалдаа хөгжлийн банк­наас санхүүжилт ав­сан байдаг. Тиймээс тус банкны гүйцэтгэх захи­рал О.Орхонг ТУЗ-ийн гишүүнээр томилжээ. О.Орхон 1993 онд ОХУ-ын Ярославль хотын есдүгээр дунд сургууль, 1997 онд МУИС-ийн Эдийн засгийн сургуулийг төгсөж банкны эдийн засагч, санхүүч мэргэжил эзэмшсэн нэгэн. 
Мөн 2003 онд Их Британийн Уэльсийн их сургуульд Банк санхүү­гийн бизнесийн удирд­лагын магистр цол хамгаалжээ. Түүнийг банк, санхүү, бизнесийн сал­барт 17 жил ажиллаж буй туршлагатай банкир гэж салбарынхан нь үнэлдэг бөгөөд Худалдаа хөгжлийн банкны гүйцэтгэх захир­лаас гадна "Ти Ди Би капитал” болон "Ти Ди Би Лизинг” ХХК-ийн гүйцэтгэх захирал, 2014 оноос Монголын банкны холбооны ерөнхийлөгчөөр ажиллаж байгаа юм. Тэрээр өмнө нь Мянганы сорилтын санд санхүүгийн зөвлөх, Улаанбаатар хо­тын банкинд гүйцэтгэх захирал, Хүнс, хөдөө аж ахуйн сайдын зөвлөх, Хөрөнгийн биржийн ТУЗ-ийн гишүүн, Эдийн зас­гийн хөгжлийн сай­дын зөвлөх, Худалдаа хөгж­­лийн банкны гүйцэт­гэх захир­лын тэргүүн ор­логчоор ажиллаж байжээ.

"Монгол зэс” корпорацийн  ТУЗ-ийн дарга М.Мөнхбаатар

"Эрдэнэт” үйлдвэрийн ТУЗ-ийн дараагийн ги­шүүн нь "Монголын зэс” корпорацын ТУЗ-ийн дарга М.Мөнхбаатар юм. Түүний тухай мэдээлэл тун ховор ажээ. "Эрдэнэт” үйлдвэрийн 49 хувьтай холбоо­той асуудал олны анхаарлын төвд орсны дараа хэвлэлд ярилц­лага өгснөөс нь хойш л түүнийг олон нийт таньдаг болсон гэхэд болно.   

Эх сурвалж: "Ардын эрх" сонин