Сар шинийн баяр дөхсөн энэ өдрүүдэд бензиний үнэ 100-150 төгрөгөөр нэмэгдсэн нь иргэдийг гайхшруулж бас бухимдахад хүргэлээ. Тодруулбал, өнгөрсөн амралтын өдрүүдээр Шатахуун түгээх станциуд литр тутмынхаа үнийг нэмсэн нь өргөн хэрэглээний бараа бүтээгдэхүүний үнэ өсөх шалтгаан болжээ. Сонгинохайрхан дүүрэгт байрлах нэгэн хүнсний дэлгүүрээр ороход худалдагч нь "Бензиний үнэ нэмэгдсэн бөөн шуугиан болж байна аа. Яана аа дагаад бараа бүтээгдэхүүний үнэ нэмэгдэх байх даа, хэцүү юм. Саяхан долларын өсөлтөөс болж бараагаа нэмэхээс өөр аргагүйд хүрсэн. Бараа бүтээгдэхүүний үнэ улам л нэмэгдээд байдаг” хэмээн ярьж байсан юм.

Мэдээллийн дагуу "МТ, "Шунхлай”, "Сод Монгол”, "Жаст ойл”, "Тэс петролиум” зэрэг газраар очиход "МТ” , "Шунхлай” ШТС 90-100 төгрөгөөр нэмжээ. Харин "Жаст ойл” , "Сод Монгол” "Тэс петролиум” үнээ нэмээгүй байна. Тухайлбал, "МТ” АИ 92-1530 байсан бол 1630, АИ 95-1810, АИ 98-1920 болжээ. Мөн "Шунхлай” АИ 92-1530-1625 болсон байв. Энэ талаар холбогдох шатахуун түгээх газрын ажилтнаас тодрууллаа.

н.Батболд: Шатахууны үнэ нэмэгдсэнд иргэд бухимдалтай байна

"Шунхлай ” ШТС-ын ажилтан н.Батболд:"Манайд шатахууны үнэ литр тутам нь 92-95 төгрөгөөр нэмэгдсэн. АИ 92-95 төгрөг, түлш 90 төгрөгөөр өссөн. Үнэ нэмэгдээд гурав хонож байна. Иргэдийн зарим нь ууртай хүлээж авч байгаа. Цаанаасаа нэмэгдэж байгаа үнийг одоо яахав дээ. Бид нарт илүү мэдээлэл байхгүй. Манайхаас өөр газруудад 5 төгрөгөөр илүү нэмэгдсэн харагдсан” гэв. Энэ бол зөвхөн захын хорооллоор байгаа үнэ юм. Хотын төв дэх "Шунхлай” шатахуун түгээх станц АИ92-1510, АИ98-1790, АИ95-1720, дизел түлш 1620 төгрөгөөр, "Сод Монгол” АИ92-1530, АИ95-1730, дизел түлш 1640 төгрөгөөр борлуулж байна.

н.Анхаа: Шатахууны үнэ нэмэгдэх нь өргөн хэрэглээний бараа өсөх гол шалтгаан болж байна

Шатахууны үнэ нэмэгдсэн нь таксины жолооч нарт хамгийн хүндээр тусч байгаа юм. Энэ талаарСХД-ийн 1-р хорооны иргэн, жолооч н.Анхаа" Бензиний үнэ нэмэгдэх сургаар амжиж хэдэн литр бензин машиндаа хийлээ. Шатахууны үнэ нэмэгдсэн нь дагаад юмны үнэ өснө. 500 төгрөгрөөр дөрвөн хүн зөөдөг байсан бол 1000 төгрөг болгочихоор машинд сууж гар өргөх хүнгүй л болно шүү дээ. Үнээ нэмэхгүй хүн суулгахаар ямар ч ашиггүй. Амьдралд хүндээр л нөлөөлж байна. Чамд ч бас би 1000 төгрөг гэвэл чи гайхна биз дээ. Энэ байдлаараа ирэх жил дахиад бензиний үнэ нэмэгдэх нь тодорхой. Засгийн газраас шатахууны үнэ буулгана гэж яриад л нэмээд байх юм” гэлээ. Түүнчлэн зарим жолооч нар онцгой албан татварыг тэглэчихээд байхад шатахууны үнийг ийнхүү нэмсэнд гайхаж, цаашдаа буурна гэсэн хүлээлт үүсээд байна. Тэд сар шинийн баяр дөхөж байхад үнээ нэмсэн нь тоогүй байна гэдэгт санал нэг байсан юм. Улсын хэмжээнд өнгөрсөн сарын 26-наас литр тутамдаа 150 хүртэлх төгрөгөөр өсгөжээ.

Т.Чулуунбат: Өнөөг хүртэл онцгой албан татварт ямар нэг зохицуулалт хийгээгүй

Нефть импортлогч компаниудын дээрх шийдвэрт холбогдох байгууллагынхан ямар байр суурьнаас хандаж, хэрхэн хяналт тавьж байгаа талаар Уул уурхай хүнд үйлдвэрийн яамны Түлшний бодлогын газрын дарга Т.Чулуунбатаас зарим зүйлийг тодрууллаа.

-Шатахуун түгээгч компаниуд шатахууныхаа үнийг литр тутамдаа багагүй төгрөгөөр нэмчлээ. Баяр ёслолтой уялдуулан үгсэн хуувилдаад нэмчихсэн юм болов уу?

-Засгийн газраас онцгой албан татварын хэмжээг удаа дараа багасгаж, зохицуулалт хийсэн боловч шатахууны энэ сарын импортын үнэ өнгөрсөн сартай харьцуулахад төрөл тус бүр дээр тонн тутамдаа дахин 22-26 орчим ам.доллараар өсөөд байгаа юм. Үүнээс шалтгаалан импортлогч компаниуд үнээ өсгөсөн гэж бид харж байна. Шатахууны худалдаа эрхлэгч аж ахуйн нэгжүүд өнгөрсөн сарын 26-наас эхлэн улсын хэмжээнд бүс нутаг, шатахууны төрлөөс хамааран литр тутамдаа 150 хүртэлх төгрөгөөр өсгөөд байна. Тиймээс Ашигт малтмалын газрын тосны газар болон ШӨХТГ руу албан тоот хүргүүлж, ямар үндэслэлээр үнээ нэмсэн, юу нөлөөлсөн, үнэхээр 50-150 хүртэлх төгрөгөөр нэмэх нь зүйтэй юу гэдгийг судалж, хяналт, шалгалт хийн дүгнэлт гаргах үүрэг бүхий ажлын хэсгийг байгуулан ажиллаж байна. Ажлын хэсгийн дүнг энэ долоо хоногийн сүүл эсвэл ирэх долоо хоногийн эхээр олон нийтэд танилцуулна.

-Засгийн газраас шатахуун, дизел түлшний онцгой албан татварын хэмжээг удаа дараа бууруулан энэ талд зохицуулалт хийсэн нь шатахууны үнийн өсөлтийг тогтвортой барихад нөлөөлж чадахгүй байна уу?

-Газрын тос экспортлогч ОПЕК-инй гишүүн орнууд энэ оны эхний хагас жилд олборлолтынхоо хэмжээг өдөрт 1.2 сая баррелиар, гишүүн бус ОХУ тэргүүтэй орнууд өдөрт 600 хүртэлх мянган баррелиар тус тус бууруулсан. Үүнтэй холбоотойгоор газрын тосны үнэ дэлхийн зах зээлд 20 гаруй хувиар өссөн. Энэ нь манай улсад нийлүүлж байгаа газрын тосны бүтээгдэхүүний үнэд шууд хамааралтайгаар нөлөөлж байна. Энэхүү үнийн өсөлтөөс хамааран шатахууны энэ оны нэгдүгээр сарын импортын үнийг өнгөрсөн оны арванхоёрдугаар сартай харьцуулахад төрөл тус бүр дээр тонн тутамдаа 41-60 орчим ам.доллараар өссөн. Энэ нь шатахууны жижиглэн борлуулалтын үнэд нөлөөлж эхэлсэн. Тиймээс энэхүү үнийн өсөлт болон Монгол төгрөгийн ханш зэргээс хамаарсан тооцооллыг хийж, "Газрын тосны бүтээгдэхүүний хангамж, үнийг тогтворжуулах асуудлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн байгууллагуудын хамтарсан зөвлөл”-ийн гуравдугаар хуралдааныг энэ оны нэгдүгээр сарын 13-нд хуралдуулж, холбогдох зөвлөмжийг Засгийн газарт хүргүүлсэн. Ингэснээр Засгийн газрын өнгөрсөн сарын 25-ны өдрийн 34 дүгээр тогтоолоор төвийн бүсээр импортолж буй дезил түлш, шатахууны онцгой албан татварын тоо хэмжээг 110-130 мянга, зүүн бүсээр импортолдог шатахууын онцгой албан татварыг 30-50 мянган төгрөгөөр буулгаж, зохицуулсан. Харин баруун бүсийн импортын хувьд 2015 оны арваннэгдүгээр сараас хойш ямар нэгэн байдлаар өнөөг хүртэл онцгой албан татварын зохицуулалт хийгээгүй. Энэ нь тухайн үед онцгой албан татварыг тэгээр тогтоосонтой холбоотой гэлээ. Аливаа бараа бүтээгдэхүүн болон тэр дундаа стратегийн гол нэрийн бүтээгдэхүүнийн үнэ ханш богино хугацаанд багагүй хэмжээгээр нэмэгдэж буйд хяналт тавих, үндэслэлийг нь тогтоох ёстой газар бол ШӨХТГ юм.

Тус байгууллагын Өрсөлдөөний бодлого зохицуулалтын газрын дарга Ч.Цоодолоос утсаар зарим зүйлийг тодруулхад "Нийслэлд "Шунхлай”, "Магнай трейд”, "Петровис” компани зарим шатахуун түгээх станцынхаа үнийг нэмсэн гэсэн мэдээлэл байна. Тиймээс үнэхээр ийм төгрөгөөр шатахууны үнийг нэмэх шаардлага бий болсон уу эсвэл далимдуулаад хэт өндрөөр нэмсэн үү гэдгийг тогтоохоор хяналт шалгалтын ажлыг хийж эхэлсэн. Шалгалтын эцсийн дүн гарахаар олон нийтэд мэдээлнэ” гэлээ.

Өнгөрсөн оны сүүлчээр шинэ жилийн баяр дөхсөн өдрүүдэд мөн л долларын ханш түүхэнд байгаагүйгээр өсч 3000 төгрөгт хүрсэн. Энэ нь Засгийн газрыг сандаргаж иргэдийг модоо барихад хүргэсэн билээ. Түүх дахин давтагдаж ийнхүү шатахууны үнэ нэмэгдсэн нь иргэдийн нуруун дээр хүнд ачааг үүрүүлсэн хэрэг боллоо.

Б.Дэлгэрцэцэг