Сибирийн Байгаль нуурын эрэг тольдсон жуулчлалын унтаа бяцхан хотыг хятад хөрөнгө оруулагч нар сонирхож байгаа нь үндсэрхэг үзэлт оросуудын хилэнг дэгдээлээ.

Листвянка сууринтай холбоотой олон нийтийн уур хилэн орос сонинуудыг хамарч, Хятадын "түрэмгийлэл”, "булаан эзлэлт” тэр ч байтугай дундад зууны Монголын байлдан дагуулалтай холбоотой "дарлал” гэсэн үг бүхий гарчигтай мэдээллээр дүүрлээ. Тус бүс нутгийг Бээжин мужаа болгон хувиргах арга эрэлхийлж байгаагаас газрыг хятадуудад зарахыг хориглох тушаал гаргахыг ОХУ-ын Ерөнхийлөгч Владимир Путинээс хүссэн утгатай өргөх бичигт 55 мянган хүн (Листвянка суурин 2000 үл хүрэх оршин суугчтай) гарын үсэг зуржээ. Өргөх бичгийг "Московский Комсомолец” зэрэг нийт ОХУ-ын хэмжээний сонинууд дамжуулан нийтэлсэн байна.

"Ард түмэн түгшүүрт автлаа! Гэтэл эрх баригчид хөдөлж өгөхгүй нь. Байдал хэвээрээ үргэлжлэх юм бол та бид ариун дагшин зүйлээсээ, хөрөнгөнөөсөө хагацах нь” хэмээн Change.org сайтад байршуулсан өргөх бичигт Юлия Иванец тайлбарлав.

Дээрх бичлэг нь илүү хөгжин дэвшсэн, илүү олон хүн амтай хөршөөсөө оросууд түгшдэгийн илрэл юм. ОХУ-ын хүн ам харьцангуй сийрэг, эдийн засгийн хувьд буурай дорнод хэсгийн иргэд өөрсдийгөө хятадуудын өргөн цар хүрээтэй цагаачлалд эмзэг гэж үздэг.

Гэтэл орон нутгийнхны дургүйцэл хоёр улсын удирдагчдын дипломат хүчин чармайлттай зөрчилдөж буйн зэрэгцээ Орос-Хятадын эхлэл төдий заримдаг холбооны аварга төслүүдийг хэрэгжих аргагүйд хүргэх аюултай. Украиныг түрэмгийлснээс болж өрнөдийн хориг арга хэмжээнд өртсөн ОХУ-ын эдийн засагт Хятадын хөрөнгө оруулалт хэрэгтэй. Хятад улс ч бүс нутгийн хэмжээнд дэд бүтэц байгуулах "Нэг бүс, нэг зам” санаачилгын хүрээнд ОХУ зэрэг Евразийн улсуудад хөрөнгө оруулах сонирхолтой.

Гэвч орон нутгийн түвшин дэх иргэдийн хардлага, соёлын зөрөө нь хоёр улсын удирдагчдын дипломат хүчин чармайлтыг талаар болгож болзошгүй. Хятадуудын үл хөдлөх хөрөнгө хөгжүүлэх ажил уугуул оршин суугчдын уур хилэнг хөдөлгөж байгааг Листвянкагийн орон нутгийн захиргааны хуулийн хэлтсийн захирал Виктор Синьков тайлбарлав.

"Хятадууд хаа сайгүй хөрөнгө худалдан авцгааж байгаад иргэд сэтгэл зовдог. Хятадууд л том зочид буудлууд байгуулж байгаа. Бүгдийг нь нураагаад, өнгө төрхийг нь өөрчилж орхидог” хэмээн тэрбээр өгүүлсэн юм.

Тус хотын гол үл хөдлөх хөрөнгийн 10 хувийг хятадууд худалдан авсан талаарх хатагтай Иванецын өргөх бичгийг ноён Синьков хэтрүүлэг хэмээн үзлээ. Хятадын групп жуулчид Байгаль нуурыг үзэж сонирхохдоо дэлхийн хамгийн гүн цэнгэг уст нуур нь Тан, Хан гүрний үед хятадуудынх байсан талаар тайлбарладгийг ноён Синьков анхааруулав. "Энэ хүмүүс нуураа буцааж авах сан гэх гээд байгаа хэрэг” хэмээн захирал өгүүлэв.

Үнэхээр ч Хятадын жуулчлалын компанийн вэбсайтад Байгаль нуур цагтаа Хятадынх байсныг тайлбарлажээ. "Эртнээс Хятадын нутаг дэвсгэр байж ирсэн энэ нуурыг Хан гүрний үед Умард тэнгис хэмээн нэрлэдэг байлаа...” гэсэн тайлбарыг Хятадын жуулчлалын Cassia агентлагийн сайтаас уншиж болно.

Гэхдээ Сибирьт гаднын зочдын хөл татардаг өвлийн цагаар хийдэг аяллын гол хэсгийг бүрдүүлэгч хятад жуулчид орос хүлээн авагч нараа ихэвчлэн сайнаар үнэлдэг. Шанхайн видео зураглаач, өнгөрсөн сард Байгаль нуураар аялсан Шэнь Жөфань зах хязгааргүй цагаан цасан дундах аварга хөлдүү нуур үзэхээс түгшиж байжээ. Гэтэл Байгаль нуурын аялалд санаа зовох хэрэг байсангүй. "Намайг очиход жуулчид бараг бүгдээрээ хятадууд байсан даг” хэмээн тэрбээр дурсаж байна.