Байгалийн баялаг хүссэн хүн бүрт олдоод байдаггүй зүйл. Өөрөөр хэлбэл, өвөг дээдсээс нь өвлөж үлдээсэн тэрхүү орчин тойрон, нутаг дэвсгэрт нь тэр бүр баялаг нуугдаад байх нь ховор.

Нөгөө талаасаа тэрхүү баялагийг хэрхэн жинхэнэ баялаг болгож улс орон, ард түмнийхээ аж амьдралыг өөд нь татах вэ гэдэг хамгийн чухал зүйл юм. Эртнээсээ Португаль, Их Британи зэрэг орнуудын эрхшээлд явж ирсэн персийн булан дахь Кувейт улс хожим 1960 оны эхээр Их Британийн колончлолоос гарч өнөөдрийн эрх чөлөө тусгаар тогтнолоо олж авсан түүхтэй байдаг.

Ингээд газрын тос, байгалийн хий гэсэн байгалийн баялагаа зүй зохистойгоор ашиглаж эхэлсэн боомт хот өдөр ирэх тусам өсөж дэвжсээр өнөөдрийн хэмжээнд хүрчээ. Энэ хугацаанд Кувейт улс "Хар алт”-ны хараал буюу дайны хөлд хүртэл нэрвэгдэж байв. Үүний улмаас хөрш болох Иракийн эзлэн түрэмгийлэлд 1990 онд автаж улмаар долоон сарын дараа АНУ-ын цэргүүд Кувейтийг чөлөөлсөн байдаг юм. Иракийн цэргүүд хот, тосгоныг нь сүйдлэж, газрын тосны цооногуудыг нь бараг бүгдийг нь шатааж, дэлбэлсэн түүхтэй. Гэхдээ дайны хөлд нэрвэгдсэн Кувейт улс туйлын хүнд байдалтайгаар сэргээн босголтын ажлаа эхлүүлсэн ч байгалийн баялагаа зүй зохистой ашиглаж байсныхаа хүчээр маш амархан давж гарсан гэдэг. Тодруулбал, тэд газрын тосны олборлолтоосоо олсон маш их хэмжээний мөнгөн хөрөнгөө тусгайлан байгуулсан санд хуримтлуулж байсан нь сэргээн босоход хэрэг болсон байна. Тус сангийн хөрөнгөнийхөө гуравны хоёроос илүүг нь бараг ашиглаж байж өнөөдрийн Кувейт орон сүндэрлэжээ. 

Иракт эзлэгдсэн хэцүү цаг үед нь Иракийг буруутгаж, Кувейтийн талд бат зогсож мэдэгдэл нь гаргасан хамгийн эхний бөгөөд цөөхөн хэдэн орны нэг нь Монгол Улс юм. Энэ цагаас эхлэн хоёр орны харилцаа илт сэргэж, тус улсын Эмир 1995 оноос хойш манай оронд жил бүр зочлон ирдэг уламжлалтай болжээ. 

Хоёр орны найрсаг харилцаа, хамтын ажиллагаа одоо ч хэвээрээ. Үүний үр дүнд Монгол Улсын хэвлэл мэдээллийн байгууллагын сэтгүүлчид Кувейт улстай танилцахаар тав хоног аялалаа. Шинэ цагийн Кувейт улс ямар ч техник, технологи, өндөр барилга, хүний хөгжлийн индексээрээ аль ч улсаас дутахааргүй хэмжээнд хөгжиж чадсан гэдэг нь бидний хэд хоногийн аялалын турш ажиглагдаж байв.

Кувейт бол газрын тосны олборлолтоороо дэлхийд эхний 10-т тогтмол ордог улс. Баялагийн хамааралтай байх нь зарим талаараа баялагийн хараал болж улс орнуудад хүндрэл учруулдаг. Энэ хүндрэлийг л давж гарсан учраас Кувейтүүдийг "Хар алт”-аа "Шар алт" болгож чадсан гэж байгаа юм. Тэд өдөрт 3 сая баррель газрын тос олборлож байна. ОПЕК-аас газрын тосны экспортод нь хязгаарлалт тавьсан байгаа. Энэ хязгаарлалтыг арилгавал өдөрт 4 сая баррель газрын тос олборлоно. Нэг секунд тутамд 600 литр газрын тос олборлодог гэдгийг Кувейтийн газрын тосны компанийн Олон нийттэй харилцах мэргэжилтэн Мухаммед Аль Басри онцоллоо. 

Сонирхолтой жишээ дурдвал, Газрын тосны олборлолтын хэмжээг харьцуулж үзвэл, дэлхийн хамгийн өндөрт тооцогддог 832 метрийн өндөртэй, 163 давхар бүхий Бурж Халифа цамхагийг ердөө 27 секундэд, Малайзын хоёр цамхаг гэж нэрлэдэг тус бүртээ 452 метрийн өндөртэй, 88 давхар цамхгийг 15 секундын дотор дүүргэж байна. 

Тус улсын батлагдсан нөөц нь 104 тэрбум баррель.  Энэ нөөц нь дэлхий дээрх газрын нөөцийн 9 хувь юм байна. Мөн Бургон хэмээх газрын тосны орд нь дэлхийн 4 дэх их нөөцтэй орд аж. Кувейт улс газрын тосны олборлолтын хэмжээгээрээ дэлхийд 11, экспортын хэмжээгээрээ 7-д багтаж байна.

Газрын тосны нөөц нь одоогийн байдлаар 200 жил хэмээн тооцоологдоод байгаа ч газрын тосны үнэ, олборлолтын хэмжээнээс шалтгаалаад яг хэзээ дуусахыг тодорхойлох боломжгүй гэж албаны хүмүүс хэлж байв.

Тэд энэ том салбараасаа орж ирж буй мөнгөө маш зөв зарцуулдаг. "Кувейтийн хөрөнгө оруулалтын сан”, "Хойч үеийн сан” гэж хоёр тусдаа сантай. Газрын тосноос олсон орлогынхоо 10 хувийг "Хойч үеийн сан”-даа байршуулдаг. Энэ сангийнхаа ачаар л өнөөдрийн Кувейт улс, өнөөдрийн Эль Кувейт хотын тэнгэр баганадсан барилга байгууламжууд дайны дараа арав гаруйхан жилийн дотор сүндэрлэн босчээ. Магадгүй газрын баялгаа түшиглэж буй улс орнууд энэ туршлагыг судлаж үзэхэд илүүдэхгүй мэт санагдлаа.

Харин "Хөрөнгө оруулалтын сан" нь олсон орлогоо төсөвт хуваарилаад үлдсэн орлогоо дэлхийн том компанийн хувьцааг худалдаж авах замаар ноогдол ашиг хүртдэг. Тодруулбал, Apple, Microsoft, Torres bank, Mercedes Benz, Wolkiswagen зэрэг томчуудыг энд нэрлэж болох юм.