Тайланд нь Лаосоос худалдан авч Малайзид борлуулдаг эрчим хүчнийхээ хэмжээг гурав дахин нэмэгдүүлж, хил дамнасан эрчим хүчний худалдаанд шаардлагатай Камбожоос Мьянмар хүрдэг цахилгаан сүлжээний дэд бүтцээ сайжруулахаар шийдвэрлэснийг Эрчим хүч  бодлого, төлөвлөлтийн хэлтсийн дарга Ваттанапон Куроват мэдэгдлээ. Уг арга хэмжээ нь Тайландын эрчим хүчний тогтолцоог "ногоон”, хямд төсөр, үр ашигтай болгох Эрчим хүчний сайд Сонтират Сонтижиравоны хүчин чармайлт байна.

Эрчим хүчний худалдаа энгийн хэмээн Ваттанапон тайлбарлав. Тайланд нь өөрийн түгээх сүлжээнд шаардлагатай эрчим хүчийг Лаосоос аль болох их худалдан авна. Учир нь Меконг мөрөн, түүний салаа цутгалангуудад байгуулсан олон далангаас үүсгэдэг Лаосын эрчим хүч хэрэгцээнээсээ илүү гардаг. Лаосоос худалдан авсан эрчим хүч Тайландын хэрэглээнээс мөн илүү гарч байгаа болохоор цааш Малайз, Камбож, Мьянмарт худалдах юм.

"Бид аль болох шуурхай бүс нутгийн эрчим хүч түгээх, хуваарилах сүлжээний төв болох зорилт тавиад байгаа”-г Бангкок хотноо Ваттанопон ярилцлага өгөхдөө тайлбарласан юм. Тэрбээр "бүс нутгийн эрчим хүчний зангилаа болох зорилтыг хэрэгжүүлэхэд шаардлагатай дэд бүтэц, хүчин чадал угаасаа бидэнд бий” хэмээн тэрбээр нэмж өгүүлэв.

Зүүн өмнөд Азийн бүс нутаг дахь цахилгаан станцууд, эрчим хүч хэрэглэгчдийг холбох энэ санаа 20 гаруй жилийн тэртээгээс яригдсан ч санхүүжилт, засгийн газар хоорондын уялдаа холбоотой бэрхшээлээс шалтгаалан хэрэгжиж чадахгүй өдий хүрчээ.

Зохицуулалтын асуудал нэг мөр болоогүйн зэрэгцээ дэд бүтэц байгуулах өртөг зардлын улмаас эрчим хүч түгээх олон улсын сүлжээ Европоос бусад бүс нутагт ховор үзэгдэл юм. Нэгдсэн сүлжээ байгуулснаар эрчим хүчний аюулгүй байдал дээшилж, сэргээгдэх эрчим хүчний эх сурвалжийг хамтран ашиглах нөхцөл бүрддэгийг олон улсын Эрчим хүчний агентлаг (IEA) тайлбарлаж байна.

Өдгөө Тайланд нь эрчим хүч түгээх сүлжээгээ Лаос, Малайзтай хэдийн холбосон. Өнгөрсөн оноос хойш Тайландаар дамжуулан лаосоос 100 мВт (мегаватт) эрчим хүч худалдан аваад байгаа Малайз улс цаашид хэмжээг нь 300 мВт-д хүргэх арга эрэлхийлж байгааг Ваттанапон өгүүлсэн юм. Камбож Мьянмарын хилийн хотууд ч тайландаас бага хэмжээний эрчим хүч худалдан авдаг. Худалдан авах хэмжээг цаашид нэмэгдүүлж Лаос, Малайзын түвшинд хүргэхийн тулд дэд бүтцийг сайжруулах шаардлагатай аж.

Эрчим хүч түгээх, хуваарилах сүлжээний зангилааны үүрэг гүйцэтгэх нь Тайландад ч өгөөжтэй гэж Ваттанапон онцлон дурдаж байлаа. Тайланд улс эрчим хүчний шугамаараа Лаост цахилгаан дамжуулсны хөлс-нэмэлт орлого олохын зэрэгцээ хааяа үүсдэг эрчим хүчний илүүдлээ борлуулж, цахилгаан станц, дэд бүтцээ одоогийнхоос илүү үр ашигтай ашиглах юм. Эрчим хүчний сүлжээ ашиглалт сайжирснаар алсдаа тайландад цахилгаан эрчим хүчний өртөг буурна хэмээн Ваттанопон үзэж байна.

Улс дамнасан нэгдсэн сүлжээ байгуулснаар хөгжиж буй Лаос, Вьетнам зэрэг улсад хэрэгжүүлсэн усан, салхин эрчим хүчний томоохон өртөг ихтэй төслүүдийн үр өгөөж ч сайжирна хэмээн олон улсын Эрчим хүчний агентлагийн 2017 оны тайланд тайлбарлажээ.

Тайландын Эрчим хүч хөгжүүлэх төлөвлөгөө гэдэг үндэсний хөтөлбөртөө шинэ чиг шугамд нийцүүлсэн өөрчлөлт оруулахаар Эрчим хүчний шинэ сайд Сонтират Сонтижиравон төлөвлөж байна. Шинэчилсэн төлөвлөгөөгөөр тус улс жижиг оврын генератороос гаргасан сэргээгдэх эрчим хүч, цахилгаанаа ахиу ашиглах юм.

Тайланд улс 2037 он гэхэд эрчим хүчнийхээ хэрэглээний 25 хувийг эрчим хүчний маш жижиг үүсгүүр гэгдэх эх үүсвэрээс хангах аж. Тус улс нийтийн хэрэглээний цахилгааныг биомасс, нарны цахилгаан станцаас гарган авч, илүүдлээ эрчим хүчний сүлжээгээр дамжуулан борлуулна. Мөн нүүрс, шатдаг хийнээс үүсгэдэг эрчим хүчний үйлдвэрлэлийн хувь хэмжээг бууруулах болно. Байгалийн шатдаг хий нь одоо ч тайландын эрчим хүчний гол эх сурвалж юм.