Нүүрсний хэрэг мандаж, 40 их наядын хулгайн эрэлд улсаараа гарснаас хойш дөрвөн жил өнгөрөхөд хуулийнхан нь МАН-ын цагаан байрнаас нарийн бичгийн даргыг нь барьснаас өөр ажил хийсэнгүй.

Ерөнхий сайд Г.Занданшатарын хэлснээр бол 328 нүүрсний хулгайтай холбогдох хэрэг өнөөдрийг хүртэл шийдвэрлэгдээгүй байна.

Хуулийнханд дээрх хэргийг илрүүлэх сонирхол байсангүй юу, илрүүлэхээр ажиллах бүрийдээ асуудалтай тулж өнөөдрийг хүрсэн үү, бүү мэд. Засгийн газар солигдож, эрх баригч нам дотор тамганы зодоон өрнөснөөр нүүрсний хэрэг дахин сөхөгдөж, энэхүү хэргийг шалгах даалгаврыг хуулийн байгууллагынхан аваад байна.

Олон нийтэд ил болоод буй хэрэг явдлаар бол Засгийн газар "Эрдэнэс Тавантолгой" компанид шалгалт хийснээр нүүрсний хулгайн маш олон арга хэлбэр ил болсон.  Тухайлбал, дээрх компани нэг их наяд төгрөг зарцуулан байж нүүрс баяжуулах үйлдвэр барьсан ч уурхайгаасаа 13 км зайтай.  Нүүрсээ уурхайгаас баяжуулах үйлдвэр хүртэл зөөхөд тээврийн өртөг нь 1.5 сая төгрөг болдог.  Ажлын хэсэг ажилласнаар тээврийн өртгийг 400 мянган төгрөг болгож бууруулсан. Ил болсон нь энэ, үүнээс ч олон ноцтой ”но”-той асуудлууд дуудлддаг.

Техник, тоног төхөөрөмжийг зах зээлийн үнэ ханшаас хэт давсан үнээр “шахах”-аас эхлээд оффтейк гэрээ байгуулж, нууцад оруулан маш хямд үнээр нүүрсийг бусдад өгч, дундаас нь “цавчаа” хийсэн асуудлууд хөндөгддөг.

Засгийн газраас нүүрсний 33 оффтейк гэрээтэй холбогдох бүхий л баримтуудыг олон нийтэд ил болгосон ч цаана нь дахиад ч ил болгох шаардлагатай оффтейк гэрээ бий талаар УИХ-ын гишүүн Ж.Золжаргал мэдэгдээд буй.  Иймээс оффтейк гэрээг бүгдийг ил болгох.

Хуулийнхан нүүрсний хэргийг дахин шалгаж эхэлснийх холбоо сүлбээтэй хүмүүсийг бүгдийг шалгаж, мухарлах.  Мөн энэ хэрэгт нэр холбогдсон УИХ-ын гишүүд  нь бүрэн эрхээрээ далайлгалгүй шалгуулмаар байна.  Хуулийн байгууллагаас … хэрэгт яллагдагчаар татсан” гэж мэдээлэхээр л  “Гүтгэж байна, нэр төрд халдлаа. Шударга бусын хонгилоор чирж байна” гэдэг тайлбар хийдэг боллоо.  Мэдээлэл муутай нэг хэсэг нь дээрх үгэнд нь итгэнэ, тэгсгээд энэ хэрэг мартагдана, хуулийнхан нь ч хэргийг мухарладаггүй. Түүнд нь ч эрэмшдэг үү, нүүрсний хэрэгт нэр холбогдсон олон улстөрч өөрсдийгөө хэлмэгдсэн улстөрч болгон зарлаад удав.

Жишээ татвал, УИХ-ын гишүүн Х.Баттулгын Төгрөг нуурын ордыг оффшор бүсээр дамжуулан 250 сая ам.доллароор зарсан асуудлыг Авлигатай тэмцэх газар/АТГ/-т шалгуулахаар холбогдох материалуудыг өгснөөс хойш таван сар өнгөрсөн ч мартагдсан хэргийн нэг болж байна.

Харин УИХ-ын дарга асан, УИХ-ын гишүүн Д.Амарбаясгаланг нүүрсний хэрэгт холбогдуулан яллагдагчаар татсан ч тогтоолоо гардаж авахгүй байгаа тухай мэдэгдсэн. Яллагчдаар татах тогтоолыг нь гардуулах болохоор улстөрчид хүлээж авдаггүй, мөрдөгч нар өөрсдийн арга техникийн хүрээнд Төрийн ордон руу нэвтрээд гардуулах болохоор “АТГ Төрийн ордонд гүйцэтгэх ажиллагаа явууллаа. Бүрэн эрхэд халдлаа” гэхчлэн худал PR цацах нь бий. Ийм худал сенсацыг УИХ-ын гишүүн С.Ганбаатар өнгөрсөн аравдугаар сард цацаж байв. Эсвэл ардчилсан парламентын бүрэн эрхэд халдлаа гэхчлэн сүрийг үзүүлдэг. Эцэстээ парламент хэрэгт холбогдогчдыг хамгаалдаг “цайз” болж хувираад байна.

Г.ХОРОЛ

https://news.mn/r/2831805/