Мөн тус сумын малчин Х.Төмөрхуяг хэлэхдээ, "Эндээс гарахдаа уран хортой л гэж бодож байсан. Харин уран олборлож байгаа газар дээрээс нь ажил хэрэгч байдлаар асууж лавлаад, судалж мэдээд ирэхээр хортой биш юм байна гэж ойлголоо. Энэ ойлголтоо бусад хүмүүст үнэн зөв байдлаар нь хүргэж, уулзаж ярилцахдаа ойлгуулж хэлэхийг зорино” гэж ярьж байсан юм.

Харин аялалд оролцсон эмэгтэйчүүд уран олборлолтын нөлөө болон нийгмийн салбарт оруулж байгаа хөрөнгө оруулалтын талаар илүү сонирхож,тодорхой мэдээлэл авсан байлаа. Улаанбадрах сумын малчин Д.Цэдэв хэлэхдээ, "Анх би ураныг хортой, ундны усны судлаар гүйж байдаг байх гэж боддог байсан. Харин очиж үзээд, тодорхой танилцаад ирэхээр өөр юм байна. Газар дор уусган олборлох технологид хэрэглэж байгаа хүхрийн хүчлийг хааш хаашаагаа үл нэвчих шавран давхаргаар хүрээлэгдсэн орчинд шахдаг учраас орчин тойрныхоо ундны усанд хор хохирол учруулдаггүй юм байна. Би энэ талаар КАТКО-гийн аюулгүй ажиллагааны зааварлагч багшаас ганцаарчилж асуугаад мэдэж авсан. Бас олборлолт дуусаад орхисон газар дээр нь очиход нэг настай заг ургаад, байгаль өөрөө сэргэж байгааг нүдээрээ үзсэн. Тэгэхээр нөхөн сэргээж чадах л юм бол уран олборлох нь хор хөнөөлгүй юм байна гэдгийг харж, ойлгож ирлээ.Бас КАТКО-д ажилладаг жирийн казах ажилчидтай уулзаж байхад тэдний олонхи нь ураны үйлдвэрт 10 гаруй жил ажилласан, эрүүл саруул 3-4 хүүхэдтэй гэж ярьж байна.Тийм болохоор аюулгүй ажиллуулж чадах л юм бол ураны олборлолт хоргүй юм байнагэж ойлгосон. Зөв ашиглавал нутаг орны хөгжилд, улс орон нутгийн төсөвт ч хэрэгтэй л юм байна гэж бодож байна” гэсэн юм.

Мөн аялалд оролцсон Улаанбадрах сумын иргэн Б.Оюунцэцэг ураны уурхайгаас олж байгаа ашгаар нийгмийн салбарыг хэрхэн дэмжиж байгаа талаар онцолж байлаа. Тэрээр, "Казахстаны уран олборлогч КАТКО компанийн хөрөнгө оруулалтаар хүүхдийн сурах, амьдрах тухтай орчныг бүрэн хангасан, өдөр өнжүүлэхтэй маш сайхан сургууль барьж өгснийг очиж үзсэн. Ер нь ураныг олборлож, шар нунтгийг экспортолж ашиг олсноор нийгмийн салбарын олон асуудлаа шийдэхэд зориулж хөрөнгө гаргаж чадаж байгаа нь сайхан санагдлаа. Манайд ч бас энэ байдлаар уранаа олборлож, боловсрол, эрүүл мэндийн салбартаа хөрөнгө оруулдаг болох нь зөв юм байна гэсэн бодолтой буцаж ирсэн” гэж ярьж байв.

Энэ уулзалтын дараагаар "АРЕВА Монгол” компанийн төлөөлөл тус сумын Засаг даргаБ.Ганзоригтой уулзаж бизнес эрхэлж байгаа нутгийн зарим иргэдийн төслийг дэмжих, өөрийн хайгуулын ангийн хэрэгцээнд суурилан тэдгээр иргэдийг зах зээлээр хангах талаар ярилцаж тохиролцжээ. Мөн "АРЕВА Монгол” компанийн санхүүжилтээр хэрэгжүүлж байгаа Улаанбадрах сумын дунд сургууль, цэцэрлэгийн хүүхдүүдийншүдийг эмчлэх, үзлэгт хамруулах ажилтай танилцсан байна.Энэ төслийн хүрээнд Улаанбадрах сумын дунд сургуулийн бүх сурагчид болон цэцэрлэгийн насны нийт 160 гаруй хүүхэд нийслэлээс очсон "Смайл дент” эмнэлгийнхэнд шүдээ үнэ төлбөргүй эмчлүүлсэн байна. Мөн АРЕВА Монгол компанийн ерөнхий захирал Тьерри Плэзант Сайншанд сумын Зүүнбаян багийн дунд сургуулийн 60 жилийн ойн баярт оролцож, баяр хүргэн үг хэллээ. Энэ үеэрноён Т. Плэзант тус багийн Соёлын төвд 3 жилийн хугацаанд жил бүр 25 сая төгрөгийн дэмжлэг үзүүлэх тухай хамтын ажиллагааны санамж бичигт Зүүнбаян багийн Засаг дарга Б.Эрдэнэбат болон Соёлын төвийн захирал Э.Баярбилэг нарын хамтаар гарын үсэг зуран баталгаажуулсан байна.