Шийдлийн гэж нэрлэгдээд байгаа Засгийн газрын тэргүүн шийдвэрлэх алхам хийхийн тулд Монгол Улсын 2015-2016 оны хөгжлийн замаа хамтдаа сонгох олон нийтийн санал асуулга явуулж байна. Нөгөөдөр гэхэд монголчууд урагшлах замаа өөрсдөө сонгосон байх болно.

Урагшлах замд нь саад болох популистуудаас ингэж урьдчилан сэргийлэх арга хэмжээ авахгүй бол урьд, урьдны Засгийн газруудын адил хөлд нь хөндөлсөөд, чөдөр шиг тушаад явуулахгүй байх магадлалтай. Тиймээс Ерөнхий сайд "бүгдээрээ хэлэлцвэл буруугүй, бүлээн усаар угаавал хиргүй” гэгчээр ард нийтээс асуухаар шийдсэн хэрэг. Салаа замын уулзварт хоёр саналынхаа төлөвлөгөөг халаасандаа хийчихээд зогсож байгаа гэнэ. Угаасаа ч Ерөнхий сайд өнгөрсөн долоо хоногт МүОНТ-ээр өгсөн ярилцлагадаа "Засгийн газрын гаргаж байгаа шийдвэр бол 100 хувь алга ташуулах нь их ховор доо.” гэдгийг хэлсэн.

Тиймээс ардчиллын алтан зарчим олонхыг хүндэтгэх үүднээс сонголт хийх замыг тодорхойлчихоод хүлээж байгаа нь энэ.

Мэдээж олон нийтээс асууж байхад нь нүдээ аниад аль нэг тоог нь дугуйлаад өнгөрөх бус ирээдүйдээ хэрэгтэйг сонгох нь чухал гэдгийг санах хэрэгтэй. үнэндээ бол бид эхнийх буюу "Оюутолгой болон бүтээн байгуулалтын том төслүүдийг шийдэх замаар ханшаа тогтоох” хувилбарыг сонгох нь хэд, хэдэн талын ач холбогдолтой. Хамгийн энгийнээр бодоход дээрх төслүүдийг хөдөлгөөд эхэлсэн цагт "тэнгэрт гарчихаад” бууж ирэхгүй байгаа ноён долларыг угз татан унагах боломж гарч ирэх юм. Тэгэхээр зарим хүн "Оюутолгойн гэрээ гэж шал буруу эд” гээд гоочилж эхлэх биз.

Гэхдээ энэ талаар, бидэнд бүхий л боломж нь байгаа гэдгийг УИХ-ын дарга З.Энхболд маш тодорхой хэлээд өгсөн. Тэрбээр "Монгол Улс нэгэнт өрөнд орсон нь үнэн. Одоо энэ өрнөөсөө цэвэрхэн л гарах хэрэгтэй. үүсээд байгаа гацааны тухайд 34 хувьдаа биш, "Рио Тинто” компанидаа асуудал байгаа юм. "Рио Тинто” компани Монголын өмнө хүлээсэн үүргээ биелүүлэхгүй байгаа юм. Монголын Засгийн газар бол гэрээгээр хүлээсэн бүх үүргээ биелүүлсэн. Одоо "Рио Тино” ажлаа л хийх ёстой. Яах вэ, сонгуулийн дараа 34 хувь бага байна, нэмэгдүүлнэ гэж шинэ Засгийн газар гэрээ өөрчлөх санал явуулсан. Тэд "үгүй” гэсэн. Одоо бидний зүгээс тавьж байгаа тээг байхгүй.

Харин "Рио Тинто”-гийн зүгээс "бид энэ гэрээг байгуулахдаа алдсан байнаа, Монголд ашигтай гэрээ болчихсон учраас ингэж ингэж өөрчилье” гээд баахан санал тавьчихаад байгаа юм. Тэрийг нь Н.Алтанхуягийн ч, Ч.Сайханбилэгийн ч Засгийн газар зөвшөөрөөгүй. Гэрээ бол гэрээ, та нар ажлаа хий, далд уурхайн санхүүжилт бидэнд хамаагүй, бидэнд баялаг байна, та нарт мөнгө технологи байна гэсэн, одоо гэрээгээр хүлээсэн ажлаа л хий гэж байгаа. Хэрвээ тэд ажлаа хийхгүй бол Монголын Засгийн газар олон улсын арбитрт хандаж "Рио Тинто” гэрээгээ биелүүлэхгүй байна гэсэн гомдол гаргах эрх үүсэх боломжтой. Товчхон хэлэхэд асуудал бидэнд биш, тэдэнд байгаа юм.” гээд тайлбарлаад өглөө.

Энэ бол зөвхөн Оюутолгойн талаар ярихад ийм. Өөрөөр хэлбэл одоо бид "юмны эзэн сумны занги” шиг зангарагатай байх хэрэгтэй.

Харин хоёрдахь замыг буюу "Зардал хэрэглээгээ бууруулж эдийн засгаа сахилга батжуулах замаар ханшаа тогтоох” гэсэн замыг сонгоно гэвэл үнэндээ итгэл үнэмшил төрөхгүй байна шүү. Хэзээнээсээ тарган, цатгалан амьдралд умбаж ирсэн монголчууд "нэрэлхээд нэрээ идэх биш” гээд хамаг байдгаа барсаар ирсэн. Тиймээс хоёрдахь замыг сонголоо гэхэд тансаг хэрэглээ тэгээд цаашилбал халамжийн бодлоготоо ч анхаарлаа хандуулах шаардлага тулгарна. Тэгээд ирэхийн цагт олон нийт өгсөн саналынхаа хойноос амаа барина. Буруу сонголт хийснээ ухаарна. Хэмнээд, хэмнээд валютын ханшийг тогоон барьсан ч хаанаасаа нэмж оруулж ирэх вэ дээ. Харин ч импортын бараа голлодог болохоор хэмнэснийгээ буцаагаад гадагш нь цацна гэсэн үг.

Тиймээс "НЭГ” нь нэрэлхүү монголчуудад хамгийн зөв шийдэл болох биз. Ерөнхий сайдын халаасыг тэмтэрсэн ч төлөвлөгөөг нь гаргаж, уншиж, танилцаагүй болохоор хар ухаанаар бодоход л хамгийн зөв нь "НЭГ” болж таарах нь. Тиймээс сонголтоо хийгээд салаа зам дээр зогсох Ерөнхий сайдад визийг нь олгоод кабинеттай нь хурдны замд нь оруулах л үлдээд байна.

Эх сурвалж: