Эд Крук, Эндрю Вард Компаниуд хайгуулынхаа зардлыг танасны улмаас газрын тос, байгалийн хийн ордын нээлт сүүлийн 60 жилийн доод үзүүлэлт рүүгээ унаж, том орд олдох нь нэн ховордов. Өнгөрсөн ийм орд 174-ийг нээсэн нь 2013 он хүртэлх дундаж 400-500 байсантай харьцуулахад нэлээд доошилсон тоо гэж IHS Markit судалгааны бүлэг мэдээллээ. Хайгуулын амжилт багассанаас зах зээл ирэх арван жилд занарын нефть, хий гэх мэт уламжлалт бус эх үүсвэрээс хамаарах явдал нэмэгдэх аж. Нээлтээс олборлолт хүртэлх хэвийн хугацаа таваас долоон жил байдгийг тооцвол ирэх арван жилд нефть, хийн орд хомсдож, нийлүүлэлт багасах дохио юм.

Гэхдээ энэ жил хайгуулын ажил нэмэгдэх төлөв ажиглагдаж буй агаад Нервегийн Statoil зэрэг зарим компани өрөмдлөгөө идэвхжүүлэхээр төлөвлөжээ. 2015 онд ордын нээлтийн тоо 60 жилийн доод хэмжээ рүү унасан боловч 2016 онд дахин доошилж, 8.2 тэрбум баррель нефть, хийн эквиваленттай тэнцсэн байна.

Энэхүү удаашрал нь 2014 онд нефтийн үнэ унаснаас хойш компаниудад тулгарсан санхүүгийн бэрхшээл болон ялангуяа Хойд Америкт занарын олборлолтыг даган үйлдвэрлэлд өөрчлөлт гарч буйтай холбоотой. Одоо хайгуулын ихэнх нь эргээс зайтай далайн усанд хийгдэж буй тул нэг цооногийн өртөг 150 сая ам.доллар хүрсний дээр амжилт олох магадлал тавны нэг байгаа.

2014 онд 100 тэрбум ам.доллар байсан хайгуулын зардал өнгөрсөн онд 40 болтлоо буурсныг Wood Mackenzie судалгааны фирм мэдээлэв. Жишээ нь, Америкийн Chevron компани 2016-2017 онд хайгуулын зардлаа өмнөх жилээс хоёр тэрбумаар танаж, нэг тэрбум ам.доллар болгосон бол ConocoPhillips гүний усны хайгуулаа бүрэн зогсоов. Сүүлийн 10 жилд Хойд Америкийн нөөцийн хэмжээ 190 тэрбум баррель нефть, хийн эквивалентаар арвижсан нь юуны өмнө занарын олборлолтын боломжийг нээсэн шинэ технологиос шалтгаалсан юм.

Эх газар дахь занарын цооног 4-10 сая ам.долларын өртөгтэй бөгөөд хэдхэн долоо хоногт ашиглалтад оруулж болдог. Харин гүний усны олборлолтыг орд нээгдсэнээс хойш таваас дээш жилд хийж эхлэх боломжтой. IHS Markit-ийн шинжээч Боб Фриклунд "Бид асуудлаа занарын хийн ачаар шийдэж байна” гэжээ. Харин Wood Mackenzie фирм энэ жил хайгуул жаахан өсөж, 2016 онд дэлхий даяар 430 өрөмдлөг хийсэн бол 2015 онд 500-д хүрнэ хэмээн таамагласан байна. Statoil-ын Баренцын тэнгис дэх, ExxonMobil-ийн Гайана дахь, BP-ийн Мавритан дахь өрөмдлөгүүд амжилтад хүрэх хамгийн өндөр магадлалтай.

Wood Mackenzie дэх дэлхийн хайгуулын шинжээч Эндрю Латам нэг цамхагаар өрөмдөх хугацааг богиносгох гэх мэт хэмнэлтийн үр дүнд компаниуд бага зардлаар илүү үр дүнд хүрэх боломж олгодог гэжээ. Тэрбээр

"Тэдний маш болгоомжтой зарцуулж байгааг ажиглаж болно. Гэхдээ зарцуулалтаас гарах үр дүнг үзвэл хамаагүй өөдрөг дүр зураг харагдана” гэжээ. Ноён Латам хайгуулын боломж капиталын хүрэлцээнээс илүү байгаа учир хөрөнгө оруулалтын төлөөх өрсөлдөөн хурцадна гэж анхааруулаад

"Татвараа хэт чангатгасан улсуудад хөрөнгө оруулалт ирэхгүй. Учир нь компаниудад сонголт олгож бий” хэмээн тайлбарлав. Өмнөх оны хоёр том нээлт хоёулаа АНУ-д илэрсэн. Аляскийн хойд эрэг дэх гүехэн уснаас илэрсэн Caelus Energy- ийн орд дөрвөн тэрбум хүртэл баррелийн нөөцтэй бол мөн тэр хавиас олдсон ConocoPhillips-ын ордын нөөцийг 300 сая баррель гэж тооцоолжээ.

Түүнчлэн Сенегалд Kosmos Energy, Ангалд Cobalt International Energy-ийн нээсэн хийн ордууд томоохонд тооцогдоно. Хайгуулын ажилд өнөө үед тулгарч буй өөр нэг бэрхшээл бол сүүлийн үеийн нээлтүүд шинэ том бүс нутагт бус хуучны илэрцтэй цөөн газарт хийгдэж байгаа явдал. Жишээ нь, хамгийн сүүлд илэрсэн хийн томоохон нөөц, 2015 онд Eni компанийн Египетэд нээсэн хийгээр баялаг сав газарт нээгджээ.