"Эрдэнэс-Тавантолгой” компани олон улсын хөрөнгийн бирж дээр хувьцаагаа гаргахаар олон жилийн турш төлөвлөж байгаа. Тус компанийн энэхүү төлөвлөгөө одоо л нэг ажил хэрэг болох нь гэсэн итгэл үнэмшил саяхнаас олон нийтэд бий болсон. Учир нь, "Эрдэнэс-Тавантолгой” компани ашигтай ажиллаж байгаагийн зэрэгцээ, Уул уурхай, хүнд үйлдвэрийн сайдаар ахлуулсан ажлын хэсэг IPO гаргахаар идэвхийлэн ажиллаж байгаагаа мэдээлсэн. Хамгийн сүүлд л гэхэд өчигдөр Санхүүгийн зохицуулах хороо "Эрдэнэс-Тавантолгой” компанийг хаалттай хувьцаат компаниар бүртгэж, хувьцааг хадгаламжид бүртгэн авахыг Үнэт цаасны төвлөрсөн хадгаламжийн төвд зөвшөөрлөө. Ийнхүү ажил нь амжилттай урагшилж буй "Эрдэнэс-Тавантолгой" компани энэ онд олон улсын хөрөнгийн  бирж дээр хувьцаагаа арилжаалахаар төлөвлөж үүнийхээ санхүүжилтэд 283 тэрбум төгрөг зарцуулахаар төсөвлөсөн.

Ийнхүү хоёрдогч зах зээл дээр хувьцаагаа гаргах хувьсгалын тохироо нь бүрдэв үү гэтэл ҮАБЗ-өөс хувьцаа гаргах шаардлагагүй гэх зөвлөмж гаргажээ. Ерөнхийлөгчийн Тамгын газрын дарга З.Энхболд энэ сарын 7-нд мэдээлэл хийхдээ энэ талаар байр сууриа илэрхийлсэн. Харин Уул уурхайн хүнд үйлдвэрийн сайд Д.Сумъяабазар энэ сарын 15-нд мэдээлэл хийхдээ "Эрдэнэс-Тавантолгой” компанийн хувьцааг олон улсын хөрөнгийн бирж дээр гаргахаар ажиллаж байгаа гэдгээ хэлсэн юм. Энэхүү хоёр байр суурийн хэнд нь итгэх ёстой вэ гэдэг анхаарал татаж байна. Магадгүй улс төрийн шийдвэрээс болж "Эрдэнэс-Тавантолгой” компанийн олон улсын хөрөнгийн бирж дээр хувьцаагаа арилжаалах төлөвлөгөө нурахыг үгүйсгэхгүй. Ингэвэл монголчууд л хохирно. 

Дээр дурдсан эсрэг тэсрэг байр суурийг хүргэе.

З.Энхболд: -Түрүүчийн долоо хоногийн хоёр дахь өдөр ҮАБЗ хуралдаж эдийн засгийн аюулгүй байдлын талаар ярилцсан. Зөвлөмж нь нууц байдаг учраас би дэлгэрэнгүй ярих боломжгүй. Сайншандын төмөр замыг энэ онд, Гашуунсухайтын төмөр замыг ирэх онд барьж дуусгах талаар зөвлөмж гаргасан. Ингэхдээ "Эрдэнэс-Тавантолгой” компанийн Засгийн газарт ногдох хувийн ашгаар төмөр зам тавихыг үүрэг болгож байгаа. "Эрдэнэс-Тавантолгой” нэг тэрбум ам.долларын борлуулалт хийж, татварын дараах байдлаар 800 орчим тэрбум төгрөгийн ашигтай ажилласан. Энэ мөнгөнийхөө иргэдэд ногдох 15 хувиас бусдаар нь төмөр зам тавих шийдвэрийг ҮАБЗ-өөс гаргасан. "Эрдэнэс-тавантолгой”-н өмнө нь гаргасан IPO гаргахад 283 тэрбумыг зарцуулна гэх мэт шийдвэрүүдийг хүчингүй болгоод зөвхөн төмөр замын ажлаа хийхээр болсон.

Д.Сумъяабазар: -"Эрдэнэс-Тавантолгой” компанийн хувьцааг олон улсын хөрөнгийн бирж дээр гаргахаар олон улсын хөрөнгө оруулалтын банк санхүүгийн байгууллага, хөрөнгийн биржүүдтэй уулзаж нөхцөлүүдийг нь сонсож ирсэн. Ер нь гадаад тал биднийг хувьцаагаа гаргахыг хүлээж байгаа. Тиймээс бид өндөржүүлсэн бэлэн байдал зарлаж нэмэлт цагаар ажиллах гэх мэт зайлшгүй шаардлагууд бий. Эдийн засгаа тогтворжуулах, ард иргэдийнхээ амьдралыг сайжруулахын төлөө "Эрдэнэс-Тавантолгой” компанийнхан бүх хүчээ дайчлан ажиллах ёстой гэсэн чиглэл өгсөн. Зохион байгуулалтын хувьд сайн ажиллаж байгаа. Зөвлөх компаниудаа эхнээс нь сонгочихсон. Санхүүгийн болон техникийн зөвлөхүүд ажилдаа орчихсон байгаа. Хуулийн зөвлөхөө сонгохоор ажиллаж байгаа. Тендерийн хуулийн шинэчлэлтэй холбоотойгоор зарим ажил жаахан хойшилж байгаа. Ээлжит бус чуулганаар энэ хуульд өөрчлөлт оруулсны дараа ажил улам эрчимжинэ. Хамгийн сайн банк санхүүгийн байгууллагуудтай хамтарч байж хувьцаагаа амжилттай арилжаалах болно.

Салбар хариуцсан сайд нь ийм байр суурьтай байгаа болохоор "Эрдэнэс Тавантолгой"-н IPO хийх ажил урагшлах нь ойлгомжтой болов уу. Нөгөөтэйгүүр, ҮАБЗ бол зөвхөн зөвлөмж гаргадаг. Үүнийг заавал хэрэгжүүлэх ёстой гэсэн зүйл байхгүй. Тиймээс ч Монгол Улсын бараг бүх иргэн хувьцааг нь эзэмшиж байгаа "Эрдэнэс Тавантолгой" ХК олон улсын хөрөнгийн зах зээлд гарч, хөгжлийн дараагийн шат руугаа орох нь зөв биз ээ. 

С.Шийлэгтөмөр