Канад улсын Гадаад хэргийн сайд ноён Жон Рассэл Бэйрд манай оронд энэ өдрүүдэд айлчилж байгаа. Түунийг Эдийн засгийн хөгжлийн сайд Н.Батбаяр хүлээн авч уулзжээ.

Уулзалтын үеэр Монгол Улс нь Канад Улсын Засгийн газраас хөгжлийн албан ёсны дэмжлэг үзүүлэх орнуудын жагсаалтад анх удаа багтсан тухай яригдсан байна.

Тус улсын Засгийн газар хөгжиж буй орнуудад дэмжлэг үзүүлэх зорилгоор таван жил тутам 20-25 улсыг сонгон, хөгжлийн тусламж үзүүлдэг ажээ. Энэ хүрээнд Канад Улсын Засгийн газраас 2014-2019 онд хөгжлийн тусламж үзүүлэн, хамтран ажиллахаар сонгосон 25 орныг өнгөрсөн долоо хоногт албан ёсоор зарлажээ. Тэрхүү жагсаалтад Монгол Улс анх удаа сонгогдсон байна.

Жагсаалтад багтсан орнуудад Канадын Засгийн газар жил бүр баталдаг гадаад оронд үзүүлэх хөгжлийн тусламжийнхаа дийлэнхийг зарцуулдаг гэнэ.

2013   онд тус улсаас гадаад оронд үзүүлсэн нийт тусламж болох 5.2 тэрбум ам.долларын 80 гаруй хувийг өмнөх жагсаалтын 20 орон авчээ.

Энэ удаагийн жагсаалтад багтсан 25 орон Канад Улсын Засгийн газраас ирэх таван жилд гадаад оронд үзүүлэх хөгжлийн нийт тусламжийн 90 орчим хувийг авах юм байна.

2014  онд баталсан 25 улсын жагсаалтад Ази тивээс дараах улсууд багтжээ. Үүнд:
Афганистан
Бангладеш
Индонез                /шинээр
нэмэгдсэн/
Монгол Улс           /шинээр
нэмэгдсэн/
Мьянмар               /шинээр
нэмэгдсэн/
Филиппин             -/шинээр
нэмэгдсэн/
Вьетнам
Уулзалтын үеэр мөн харилцан санал солилцсон нэг сэдэв нь хоёр орны харилцан ашигтай эдийн засгийн хамтын ажиллагааны асуудал байжээ.

Эдийн засгийн хөгжлийн сайд Н.Батбаяр ноён Жон Рассэл Бэйрдэд хандан газар нутгийн өргөн уудам, харьцангуй цөөн хүн ам, уур амьсгал төдийгүй хөрсний бүтэц зэрэг хоёр орны адил төстэй шинжүүдийг нэрлээд эдгээр нь харилцан ашигтай хамтрахад хамгийн том давуу тал болохыг тодотгосон.

Улмаар монгол хонины ноосоор хийсэн барилгын дулаалгын материал нь хүйтэн уур амьсгал бүхий Канад улсад манайхаас нийлүүлж болох хамгийн боломжтой экспорт хэмээн санал болгов. Ноён Жон Рассэл энэ боломжийг ажил хэрэг болгох хэрэгтэй гээд нэмээд ноолууран бүтээгдэхүүн худалдан авах боломж бүрэн бий гэж мэдэгдсэн байна.

Харин манай орны хувьд "Чингис" бондын санхүүжилтээр баригдаж буй хурдны замын технологид Канад стандартыг авахаар баталгаажуулаад буй гэдгээ хэлжээ. Мөн канад технологийн карказан барилга манайхны ам сайтай байдаг брэнд үйлдвэрлэл болоод байгааг Эдийн засгийн хөгжлийн сайд хэлээд ийм технологийн орон сууцны хороолол байгуулахад хамтран ажиллахыг урьсан байна.
Цаашлаад гэр хорооллын инженерийн шугам сүлжээ, газар доорх байгууламжийн бүтээн байгуулалт, барилга, замын стандартдаа канад технологийг нутагшуулахад хамтран ажиллах хүсэлтэи буйгаа ч илэрхийлсэн.

Ноён Рассэл хамтран ажиллах саналуудыг таатай хүлээн авч буйгаа илэрхийлээд, санал солилцсон тодорхой яриаг ойрын хугацаанд ажил хэрэг болгох чиглэлээр хоёр талын хариуцсан яамд болох Канад улсын Гадаад хэрэг, худалдааны яам, Монгол Улсын Эдийн засгийн хөгжлийн яам энэ сараас эхлэн хамтран ажиллахаар тохиролцсоноор уулзалт өндөрлөлөө.

2013 оны эцсийн байдлаар манай улсаас Канадад 135.5 сая ам.долларын бараа, бүтээгдэхүүн экспортолж, 80.3 сая ам.долларын үнэ бүхий машин, тоног төхөөрөөмж, тэдгээрийн эд анги зэрэг бүтээгдэхүүнийг тус улсаас импортоор авчээ.

2013 оны 10 дугаар сарын байдлаар 1990 оноос хойш Монгол Улсад Канадын дагнасан болон хамтарсан хөрөнгө оруулалттай нийт 136 компани үйл ажиллагаа явуулж, манай улсад орсон хөрөнгө оруулалтын 3.53 хувь буюу 498.05 сая ам.долларын шууд хөрөнгө оруулалт хийсэн нь Монгол Улсад хөрөнгө оруулсан гадны орнуудаас зургадугаарт бичигдэж байна.

Канадын хөрөнгө оруулалтыг салбараар нь авч үзвэл геологи, уул уурхайн эрэл хайгуул, олборлолтын салбарт 89.15 хувь, банк, санхүүгийн салбарт 1.76 хувь, худалдаа, нийтийн хоолны салбарт 8.2 хувийн хөрөнгө оруулалт тус тус ногдож байна.

ГЕОЛОГИ УУЛ УУРХАЙН МЭДЭЭ