Оюутолгойн II шатны бүтээн байгуулалтыг эхлүүлэх шийдвэр энэ долоо хоногт гарч магадгүй” гэсэн сайн мэдээгээр шинэ долоо хоног эхлэв. Өнгөрсөн сарын 5-нд "Оюутолгойн "түгжээг” мулталлаа” хэмээн мэдэгдсэн Ерөнхий сайд Ч.Сайханбилэг энэ удаад "Вloomberg” телевизэд өнгөрсөн баасан гарагт өгсөн ярилцлагадаа "Бид том төслүүдээ хөдөлгөх хэрэгтэй. Мэдээж хүн бүр "Оюутолгой” төслийг харж байгаа. Ирэх долоо хоногт "Рио Тинто” группээс өргөн бүрэлдэхүүнтэй баг Монголд ажиллана. Энэ үеэр одоогоор хэлэлцээний шатанд байгаа бүх асуудлаа эцэслэн шийдвэрлэнэ.

Үндсэн асуудлуудаараа хэдийнэ тохиролцоонд хүрсэн. Одоо багахан хэмжээний техник, процедурын асуудал л үлдсэн” гэв. Үүний өмнөхөн "Рио Тинто” группийн ерөнхий захирал Сэм Уолш "Монгол Улсын Засгийн газартай Оюутолгойн гүний уурхайн бүтээн байгуулалтыг эхлүүлэх асуудлаар хэлэлцээ үргэлжилж байна” хэмээн цохон тэмдэглэжээ. Далд уурхайн бүтээн байгуулалтыг зогсоосноос хойш хоёр жилийн турш үргэлжилж буй Оюутолгойн хэлэлцээ одоо л нэг эцэслэн шийдэгдэх нь гэсэн хүлээлт хаа хаанаа үүсээд байгаа. Түүнчлэн сүүлийн үед хөрөнгө оруулагч талаас энэ төсөлд ач холбогдол өгч буй хэмээн дүгнэж байгаа нэг эерэг мессеж нь Оюутолгойн ТЭЗҮ-ийн тодотгол урагштай байгаа явдал. Тодруулбал, өнгөрсөн долоо хоногт хөрөнгө оруулагч талын ТЭЗҮ-ийн тодотгол хийхэд голлон ажилласан удирдах албаны төлөөлөгч, мэргэжилтнүүд шинжээчдийн багийнханд дэлгэрэнгүй тайлбар, мэдээлэл өгсөн. Энэ нь хөрөнгө оруулагч ТЭЗҮ-д ихээхэн ач холбогдол өгч байгаагийн нотолгоо гэдгийг албаныхан хэлэв. ТЭЗҮ-ийн тодотголд хийсэн дүгнэлтээ шинжээчдийн багийнхан энэ сарын 29-нд, Эрдэс баялгийн мэргэжлийн зөвлөлд зургаадугаар сарын 10 гэхэд танилцуулахаар байгаа билээ.

Ерөнхий сайд Ч.Сайханбилэг дээрх ярилцлагынхаа үеэр "2015 оныг их өөдрөгөөр харж байна. Бид ажилдаа орсон. Монгол Улс бүх бизнест нээлттэй. Дотоодын хөрөнгө оруулагчдад онцгойлсон давуу тал гэж байхгүй. Хөрөнгө оруулалтын тухай шинэ хуулиараа гадаад, додоодын хөрөнгө оруулагчдад ижил боломж бий болгосон. Бид харилцан ашигтай ажиллах гэсэн зарчим баримтална” хэмээсэн. Ийнхүү гадаад орчинд Ерөнхий сайд Ч.Сайханбилэг давхар эерэг мессеж өглөө. Оюутолгойн далд уурхай болон Тавантолгойн бүтээн байгуулалт эхэлбэл энэ ондоо багтаж манай улсад 350 сая ам.долларын хөрөнгө оруулалт ирэх боломжтой хэмээн олон улсын байгууллагууд тооцоолжээ. Гэхдээ өгөөж нь бодит эдийн засагтаа ирэх жилээс нөлөөгөө үзүүлж эхлэх юм байна. Дээрх мэдээлэл, Ерөнхий сайдын ээлжит мэдэгдэл хэр бодитой болохыг холбогдох албаны хүмүүсээс тодрууллаа.

Да.Ганболд: Хэлэлцээнд зарим нэг томоохон ахиц гарсан

"Оюутолгой ”-н Монголын талын Төлөөлөн удирдах зөвлөлийн гишүүн

-Энэ долоо хоногт "Рио Тинто” группээс манайд өргөн бүрэлдэхүүнтэй баг ирж хэлэлцээгээ дуусгана гэсэн. Үнэн үү?
-Зарчмын хувьд бид хэлэлцээгээ сүүлийн хоёр жилд нэг ч өдөр зогсоогоогүй. Лондонд, Улаанбаатарт гэх мэтээр газар, цаг хугацаа товлож хийдэг. Энэ удаад хөрөнгө оруулагчдын төлөөллүүд Улаанбаатарт ажиллана.

-Оюутолгойн төслийн II шатны санхүүжилтийг энэ долоо хоногт шийдвэрлэнэ гэсэн утгатай мэдээллийг Ерөнхий сайд Ч.Сайханбилэг хийлээ. Шийдвэр эцэслэн гарах юм уу?
-Ерөнхий сайд Ч.Сайханбилэг тавдугаар сард багтааж "Оюутолгой” төслийг гацаанаас гаргана гэж хэлж байсан амандаа багтаж ингэж хэлсэн байх аа. Надад яг тодорхой мэдээлэл одоогоор алга. Ер нь бол сүүлийн үед хэлэлцээнд зарим нэг томоохон ахиц гарсан.

-Энэ долоо хоногт Оюутолгойн асуудал шийдэгдэнэ гэдэг ер нь баттай болов уу?
-Баттай, эсэхийг нь мэдэхгүй. Өмнө нь ч гэсэн баттай гэж байгаад л Оюутолгойн асуудлыг гурав, дөрвөн удаа хойшлуулсан шүү дээ.

 Н.Энхбаяр: ТЭЗҮ-д өгөх дүгнэлтийг хүлээлгүйгээр хувьцаа эзэмшигчид асуудлаа шийдэх боломжтой

Оюутолгойн ТЭЗҮ-ийн тодотголд ажиллаж байгаа шинжээчдийн багийн ахлагч

-Оюутолгойн хэлэлцээний шатанд байгаа бүх асуудлаа эцэслэн шийдвэрлэж, II шатны бүтээн байгуулалтыг энэ долоо хоногт эхлүүлнэ гэсэн мэдээлэл байна. Эрдэс баялгийн мэргэжлийн зөвлөл, шинжээчдийн багийнхан ТЭЗҮ-ийн тодоттолд дүгнэлт өгоөгүй байхад ийм шийдвэр гаргаж болдог юм уу?
-"Оюутолгой” компани гурван жилд нэг удаа ТЭЗҮ-дээ тодотгол хийх ёстой. Энэ үүргийнхээ дагуу л бидэнд бичиг баримтаа өгсөн. Хувьцаа эзэмшигчдийн хоорондох асуудал тусдаа. Хэрэв тохиролцоонд хүрвэл шийдвэр гаргах боломжтой. Ерөнхий сайдын мэдэгдлийг хараагүй болохоор тодорхой зүйл хэлж мэдэхгүй байна.

-Тэгэхээр ТЭЗҮ-ийн тодотголд өгөх Эрдэс баялгийн мэргэжлийн зөвлел болоод шинжээчдийн дүгнэлтийг хүлээх шаардлагагүй гэсэн үг үү?
-Шаардлагагүй гэхээсээ илүүтэйгээр заавал хүлээхгүйгээр шийдвэр гаргах боломжтой. Тусдаа асуудал шүү дээ.

Б.Ууганбаяр /ҮНДЭСНИЙ ШУУДАН/