Л.Эрдэнэчимэг нарын бэлэн болгосон Тавантолгойн хөрөнгө оруулалтын гэрээний талаарх дүгнэлт гарчээ. Араас нь залгуулаад АН эвлэрлийн засгийнхаа цусыг сэлбэхээр яарлаа. Энэ тохиолдол гэж үү. Тавантолгойг хөдөлгөнө гэж байгуулагдсан засаг ийнхүү Тавантолгойн шинэ хувилбар бэлэн болонгуут задрах болсон нь асуулт дагуулна. Энэ засгаас МАН гарах нь цаг хугацааны асуудал байсан. Харин юу ингэтэл нь их яаруулав.

Ер нь бол шийдлийн Засгийн газрын шийдэх гэсэн Тавантолгой дээр гинжин хэлхээтэй цуврал ажиллагаа явагдаад байгаа харагддаг. Гэрээний төслийг Их хурлаар заавал оруулах эхний алхам амжилттай хийгдсэн. Араас нь ажлын хэсэг байгуулж гацаасан. Ажлын хэсгийн дүгнэлт өөрийнх нь талд гармагц дараагийн хувилбарт шилжиж таарна. Тэр цагт "хүний” санаа өвөрлөсөн Ч.Сайханбилэгийн засгийн багтай дахин толхилцож цаг барах нь "том” хүний хийх ажил биш байх.  МАН-ын сайд нар сайн муу ажилласандаа хөөгдөх гээд байгаа бус Тавантолгойн төсөл дээр гардан суух санаа нийлсэн баг бүрдүүлэх шаардлага яаруу болсон байх талтай. Учир нь намрын эхэнд Тавантолгойг санаснаараа хийхгүй бол цаг байхгүй. Хүмүүс залхана. Төслийг хөдөлгөсний утга алдагдана.

Засгаас МАН гарснаар зургаан сайдын суудал онгойхын цаана Ч.Сайханбилэг ерөнхий сайдаараа үлдэх үү, дан дээлтэй даруухан гишүүн болох уу гэдэг шинэ тулгалтын өмнө тулж ирж болно. Дээрээс томилсон багийг нэгтгэж аваад шинэ Тавантолгойн төслийг Их хурал дээр аваад гарах нь түүнд тулгах эхний болзол болох байх. Үгүй бол яахав огцорч бас болно. Энэ нь нээлттэй байна. Дараагийн Ерөнхий сайд болж төрийн ордны хананд зургаа мөнхлөх хүсэлтэй аавын хүү АН-д олон бий. Том хүн өөрөө ЕС болоод нэг мөсөн ажлаа гардахыг ч үгүйсгэхгүй.

Танхимын зарчмаар ажиллах учир Засгийн газарт үг сөрөөд байхгүй гар нийлсэн багийг бүрдүүлээд өгвөл Ч.Сайханбилэг Тавантолгойн шинэ төслөөс бултах газаргүй болно. Үүгээр Тавантолгой тааллаар болох зам шуударна гэсэн үг. Намын дарга, Их хурлын даргын хүнд алхыг хамт барьсан хүн юу эсийг хийж чадахыг бид эндээс харж болох юм.

Энэ засгийг Тавантолгой зэрэг том төслүүд эвлүүлсэн бол эргээд бас задалж чадлаа.

МАН-ынхан өнгөрсөн саруудад Тавантолгойг хурдан хэлэлцэхийг яаруулдаг байсан. Ажлын хэсгийг ажлаа хийхийг шахаж нэг биш удаа дуугарсан. Эцэст нь наадмын өмнө Засгаас яаруу хөөгдөхийг бодоход анхны тогтоолын төслийн талд олонх нь байсан юм болов уу даа.

Бизнесийн зарчмаараа явах хувь дутаж улстөрчдийн идэш болохоор зурагдсан ТТ нэг намын олон эрх ашиг, бүлгүүдийн дунд олгойтой тос шиг тавигдаад хагас жил болоод ч задарсангүй. Харин ч Засгийн газрыг задалж чадлаа. Шинэ засаг эмхлэгдэх сургаар дараагийн хамтрагчид догдлоод эхэлжээ. ИЗН хуралдаж байна гэнэ. Засагт орох бас ТТ-д зохих үүргээ биелүүлэхээр яарч буй хэрэг. АН-ын шинэ сайдууд хэн байх талаар таавар бооцоо наадмын бөхийн таавраас өндөр авсан байна. Дээр бичсэн гаргалгаагаар харах юм бол хэн сайд нь болох нь бараг шийдэгдчихсэн байгаа даа. Сайдад горилогчдоос хэн Тавантолгойн тогтоолын эхний төслийг эрс хатуу тууштай эсэргүүцдэг вэ тэр хүн л шинэ сайдын тамгыг магнайдаа өргөх нь тодорхой. Эхнээсээ ингэж найруулсан бол жүжиг үүгээрээ л өрөгдөнө. Одоо төгсгөлийг нь яаж зурсныг харж дээ. Наадмын өмнө засгаа сэлбэх таван цулын хуушуурыг улстөрчид үнэхээр хурдан бэлэн болголоо. Тавантолгой дээр талууд овоо юмаа гаргаж байна даа гэхээс өөр юу хэлэхэв дээ. 

Ам.доллар арав давсан бөх шиг ханхалзаж байна. Тавантолгойн шинэ төсөл цаашаа явдаггүй л юм бол ноён долларын аархал, засаг төрийн толхилцоон дарагдах шинжгүй. Айраг чимчигнээд, намар наашлаад ирэхээр юмны үнэ дахиад л өсөх талтай. Тэр үед энэ бантанг хутгаад байгаа хэдэн улстөрчдийн зургийг хүүхдийнхээ цүнхэд хийгээд хичээлд нь явуулцгааж дээ. Багш нь ч гэсэн уул уурхай ба Тавантолгой гэсэн сэдвээр хичээлийн жилийн нээлтээ хийсэн нь дээр.

Тавантолгой гэдэг таван цулын хуушуур шинэ амтлагч хачиртай улс төрийн ширээн дээр дахиад тавигдлаа. Хэн нь том хазах нь яахав. Дахиад засгийг хөдөлгөх хүртлээ бүү даамжраасай. "Одоо болчихооч" гэсэн Ц.Нямдорж гишүүний эгдүүцллийн үгийг хэлмээр санагдлаа.

Пүрэвжавын Баярхүү /тоймч/

shuud.mn