Засгийн газраас Францын Парис хотын шүүхэд нэхэмжлэл гаргаж, олон улсын арбитрын шүүхээс Канадын "Хан Ресурс” компанид 104 сая ам.доллар төлөх шийдвэр гаргасныг эсэргүүцэж байгаа мэдэгджээ.

Олон улсын арбитрын шүүх өнгөрсөн хоёрдугаар сард манай талыг буруутай гэж үзэж Канадын талын Монголын Засгийн газраас 326 сая ам.доллар нэхэмжилснийг багасгаж 104 сая ам.доллар төлүүлэх шийдвэр гаргасан билээ. "Хан Ресурс” компани 2009 оноос хойш Монголд ураны хайгуулын чиглэлээр үйл ажиллагаа явуулж байсан. 

Маргаан дэгдээх болсон шалтгаан нь 2012 онд батлагдсан "Урт нэртэй” хуулийн үйлчлэлийн хүрээнд тус компанийн лицензийг хурааж авсантай холбоотой.

Ш.Гантулга тоймчийн олныг гайхшруулсан мэдээ

ОХУ-ын Уфа хотноо болсон Шанхайн хамтын ажиллагааны байгууллагын гишүүн орнуудын төрийн тэргүүн нарын зөвлөлийн 15 дугаар хуралдааны хүрээнд Монгол Улс, ОХУ, БНХАУ-ын Төрийн тэргүүн нарын хоёр дахь удаагийн ээлжит дээд түвшний уулзалтыг зохион байгууллаа.

Монгол Улсын Ерөнхийлөгч Ц.Элбэгдоржийн санаачлагаар үүсгэн байгуулагдсан гурван талын хамтын ажиллагааны механизмыг манай хөрш орнууд дэмжин, ийнхүү дээд түвшний уулзалтыг хоёр дахь удаагаа хийсэн юм.

Харин үүнийг олон улсын тоймч Ш.Гантулга TV-9 телевизээр "Өнгөрсөн жил анх эхэлсэн 3 улсын дээд хэмжээний чуулга уулзалт үргэлжилж саяхан Уфа хотод болсон билээ. Үр дүн нь Монгол Хятадаас асууж байж Орос улстай харилцах боллоо, ОХУ одоо Монгол Улсад ямарч тусламжийг үзүүлж чадахгүй. Орос Монголын цаашдын харилцаа бол 2015 оны 7 сарын 10-аас хойш зөвхөн Хятад улсын зөвшөөрөлтэйгээр болох боломжтой гэдгийг анхааруулсан байна” хэмээн тайлбарласан нь олны анхаарлыг ихээхэн татлаа. |Гэвч үүнийг зарим эх сурвалжууд үгүйсгэж тийм яриа хэлэлцээр огт болоогүй гэсэн юм. Ямартаа ч олон улсын тоймчийн алдаа байсан уу, үнэхээр манай  орон хоёр хөршдөө "мад”-луулсан уу гэдгийг сошиал медиагаар хэлэлцэж цэц булаалдсаар байна.

Уламжлал ёсоор уяачдын наадам болов

Баяр наадмын гурав дахь өдөр болж байгаа уяачдын наадам энэ жил уламжлал ёсоор Хүй долоо худагт боллоо. Энэ жилийн уяачдын наадамд улс, аймгийн цолтой бөхчүүд зодоглож, уран мэхийг уралдуулсан төдийгүй, наадамчин олны баяр бахдлыг төрүүлсэн жороо морьдын уралдаан болсон.

Энэ жилийн уяачдын наадамд уламжлал ёсоор  эрлийз морьдын уралдаан болж 52 эрлийз дээд насны морьд уралдсанаас Говь-Алтай аймгийн Жаргалан сумын уяач Ариунсайханы уяж хурдлуулсан хөөрхөн зээрд түрүүлсэн бол Төв аймгийн Сэргэлэн сумын уяач Ган-Очирын өсгий цагаан хүрэн, хатан сүйх аман хүзүүдсэн бол Төв аймгийн Батсүмбэрийн уяач Лувсанбалдангийн халтар, Завхан аймгийн Дөрвөлжин сум, Монгол Улсын алдарт уяач Баяраагийн зээрд дөрвөлжин дөрвөөр давхиж, Говь-Алтай аймгийн Баян-Уул сум,  "Макс” группын уяач Жамъянгийн халиун саран дэвсгэртэй хос арвай  айргийн таваар давхисан юм.

Харин эрлийз морьдын дунд насны уралдаанд 104 нас уралдсанаас Төв аймгийн Баян сумын уяач Анарын буган хээр түрүүлсэн бол Дундговь аймгийн Дэлгэрцогт сумын уяач Эрдэнэбаатарын хул морь хоёрт, Орхон аймгийн Баян-Өндөр сумын Бямбажаргалын хар ланзан гурваар давхиж, Архангай аймгийн Батцэнгэл сумын Монгол Улсын начин Батбаатарын халтар задгай дөрөвт, харин айргийн тавд Төв аймгийн Сэргэлэн сумын Батбилэгийн үзмэр бор айргийн таваар давхиж, унасан хүүхэд, үзсэн олноо баясгалаа.

Харин уяачдын наадмын хүчит бөхийн барилдаанд 96 хүчтэн зодоглож Хөвсгөл аймгийн Галт сумын харьяат аймгийн арслан А.Давааням түрүүлж, улсын начин Ш.Уламбаяр үзүүрлэсэн.

Алтай таван богдод 5 уулчин эрсдэв

Баян-Өлгий аймгийн Цэнгэл сумын Хар-Уул багийн "Алтай таван богд” ууланд авиралт хийж байсан 5 иргэн долддугаар сарын 12-ны өдөр сураггүй болсон. Харамсалтай нь хоёр өдрийн эрэл хайгуулын эцэст уулчдыг эндсэн байдалтай олсон юм.

Албаны хүний мэдээлж буйгаар уулчид нэг олсоор бэхлэгдсэн байсан гэнэ. Уулчдын баг хоёр эмэгтэй, гурван эрэгтэй гишүүдээс бүрдсэн бөгөөд тэдний хамгийн ахмад нь 50 настай эмэгтэй байжээ. Мөн уулчид мэргэжлийн бус уулчид байсан юм. Өчигдөр уулчдын шарилыг Улаанбаатарт авч ирсэн юм.

Өс хонзонгийн сэдлээр авга ахынхаа гэр бүлийг хөнөөсөн хэрэг

Үндэсний их баяр наадмын өмнөхөн Төв аймгийн Сэргэлэн сумын нутагт хүн амины ноцтой хэрэг гарсан талаар бид мэдээлсэн. Тодруулбал, тус сумын иргэн 52 настай  Б-г 11  настай охинтой нь хамт буудан хөнөөж, харин эхнэрийг нь хутгалж хөнөөсөн хэрэг гарсан.  Уг хэрэг энэ сарын 5-нд гарсан бөгөөд хохирогчдын цогцсыг хашаанд нь булсан байсныг Төв аймгийн Цагдаагийн газрын ажилтнууд 11-нд олж, Мөрдөн байцаах газрын Онц хүнд гэмт хэрэгтэй тэмцэх хэлтсийнхэнтэй хамтран шуурхай ажилласны дүнд сэжигтнийг тогтоон баривчилаад байгаа юм. Гэмт этгээд хэрэг үйлдсэнээсээ хойш нэгэн айлд бүгэж байсан гэнэ.

Энэ хэргийн сэжигтэн нь 34 настай, Б гэгч бөгөөд гэрийн эзний ахынх нь хүүхэд байжээ. Тэрбээр 2008 онд Эрүүгийн хуулийн 181 дүгээр зүйл анги буюу танхайн хэргээр Төв аймгийн Мөнгөнморьт сумын хорих ангид таван жил ял эдэлсэн нэгэн аж. Албаны эх сурвалжийн мэдээлснээр сэжигтэн Б энэ хэргийг өс хонзонгийн сэдэлтэйгээр үйлдсэн болохыг тогтоожээ.

 Г.Ган

zaluu.com