Гацууртын ордыг ашиглах Засгийн газрын тогтоолыг УИХ-ынхан хоёронтоо унагаж, хаврын чуулганы хугацаанд шийдсэн асуудлын гадна үлдээв. Намрын чуулганы босгонд дахин хэд тээглүүлэхийг бид бус эрхэм түшээд мэднэ.

Эрхэм хууль тогтоогчдыг эсрэг кноп дараад сууж байх хооронд Ноён уул хууль бусчуудын гарт сүйтгэгдээд эхэлсэн. Бүр тодруулбал зургаадугаар сард гишүүд Гацууртын ордын төслийг унагаасан баяраа тэмдэглэж, хөдөлгөөнийхөн тэдэнд талархлаа илэрхийлэн зургаар нь лоозон хийж,

төв талбайд цуглаж байхад Ноён ууланд 300 нинжа орж, гарч байв. Хууль хяналтынхны шаардлагыг ч үл тоомсорлож, хууль ёсоор байгуулагдсан төрийн бус байгууллага хэмээн хэрүүл хийж буй бичлэг ч олон нийтийн сүлжээгээр цацагдсан. Товчхондоо нинжа нар Ноён ууланд аль хэдийнэ эзэн суучихсан гэсэн үг. Үүнийг нэрээ нууцлахыг хүссэн нинжа хэлж байна. Түүний хэлж буйгаар одоо Ноён уулын хойд хэсэгт 100 гаруй нинжа байгаа гэнэ. Нинжа нар цөөрсөн мэт харагдавч үнэн хэрэгтээ тэд нарийн зохион байгуулалтад орсон сурагтай. "Аав”-ынд сууж байсан "атаман”-ууд нинжа нарт очер дараалал өгч, нүхэнд орж, шороо ухах хугацааг нь ч тогтоож өгч. Нинжа нарын нүхэнд ажиллах хугацаа 30 минут. Гарч ирээд малтаж авсан шорооныхоо талыг "атаман”-даа өгөх даалгавартай. Дараагийн ээлж мөн л энэ журмаар ажиллана. Ийн нарийн зохион байгуулалтад орсон нинжа нарыг нутгийн цагдаа нар яаж чаддаггүй гэнэ. Хууль хяналтынхныг ирэхээр нинжа нар мод руу орчихдог. Эсвэл чулуу мод шиднэ, заримдаа "атаман”-ууд нь шууд дарамталдаг байна. Энэ зохион байгуулалтад бөхчүүд ч оролцдог сураг бий. Өнгөрсөн намар хуучнаар Октьябрт алт гарсан сургаар газар газрын нинжа нар мөн л цугласан. Тэр үед гол зохион байгуулагчид нь Төв аймгийн том цолтой бөхчүүд байсан. Тэд "аав”-ынд байсан атамануудаар гар хөлөө хийж, нинжа нарыг командалж байсан аж.

Эх орны минь газар шороо, онгон дагшин байгаль, эртний түүх дурсгал гэх мэтээр гоё чамин үгсээр халхавч хийж, хууль ёсны үйл ажиллагааг гацааж байх хооронд Ноён уул хууль бусчуудын нарийн арга ажиллагаан дунд ухсан нүх, овоолсон шороо болоод үлдэж магадгүй нь.

Энэ мэдээллийг нутгийн удирдлага үгүйсгэж байна. Зургаадугаар сард байсан ч одоо Ноён ууланд нэг ч нинжа байхгүй гэсэн үгийг Сэлэнгэ аймгийн  Мандал сумын Засаг дарга Нямдаваа хэлж байна. Тэрбээр "80 тонн алтны нөөцтэй гэдгийг улс даяар зарлачихсан учраас нинжа нар яаж орох уу гэсэн аргыг хаяж байна. Энэ байдал нь орон нутагт маш хүндрэлтэй асуудал үүсгэж байна” хэмээн зовлонгоо тоочив. Мөн Засаг дарга энэ сарын 20-нд Ноён уулыг орчимд зөвшөөрөлгүй малтлага хийж байгаа иргэдийн үйл ажиллагааг таслаан зогсоох захирамж гаргасан гэнэ. Захирамжийн дагуу ойн нөхөрлөл, байгаль орчны байцаагч, цагдаа, хамгаалалтын албаны хамтарсан баг хоёр газарт пост гарган, ажиллах аж. Нэг ч хүнийг оруулахгүй гэсэн Засаг даргын үг хэзээнээс бодит ажил болох нь өнөөдөр бол тодорхойгүй байна.

Ноён уул руу нинжа нар дайрсан хоёр сарын хугацаанд ус балгасан мэт чимээгүй байсан сумын удирдлагууд ямартай ч захирамж гаргаж. Ер нь бол Гацууртыг хэдий чинээ зөв ашиглана Мандал суманд ирэх ашиг төдий чинээ нэмэгдэнэ. Ухсан нүх, овоолсон шороотой үлдэх үү, ашиглалтын орлогоос хувь хүртэж, сумаа, иргэдийнхээ амьдралыг дээшлүүлэхийн аль нь зөв зам болохыг ойлгох хэмжээний хүмүүс Мандал сумыг удирдаж буй биз. Нутгаа, иргэдээ гэсэн сэтгэл байгаа л бол зоригтой шийдвэр гаргаж, зоримог алхам хийх хэрэгтэй. Хожим нинжа нартай хамтарч нутгаа сүйтгэсэн, идсэн нэр зүүхгүй байхад ч тустай.

agshin.mn