Засгийн газрын тогтоолоор өнгөрсөн нэгдүгээр сарын 26-наас лизенз олголтыг дахин эхлүүлсэн. Монгол Улсын нутаг дэвсгэрийн 19.9 хувь буюу 31 сая гектар талбайд лиценз олгохоос 32.5 хувь буюу 10.15 сая гектар нь сонгон шалгаруулалтын журмаар, 67.5 хувь буюу 20.94 сая гектар талбай нь өргөдөл хүлээн авах журмаар хайгуулын тусгай зөвшөөрөл олгох талбай юм. Өнгөрсөн долоон сарын хугацаанд баруун аймгуудад хайгуулын тусгай зөвшөөрөл олгосон бол өнөөдрөөс/VIII.24/ зүүн аймгуудад олгож эхэлж байна. Иймээс хайгуулын тусгай зөвшөөрөл олгох ажлын явц, хэрхэн зөвшөөрөл авах, тулгарч байгаа асуудлуудыг энэ удаад онцоллоо.
Нийт 2.55 сая гектар талбайд хайгуулын тусгай зөвшөөрөл олгожээ
Үндэсний аюулгүй байдлын зөвлөлийн зөвлөмжийн дагуу эхний ээлжинд уртрагийн 104 градусаас баруун талд буюу баруун аймгуудад нийт есөн сая гектар талбайд хайгуулын тусгай зөвшөөрөл авахыг хүссэн өргөдлийг хүлээн авч шийдвэрлэж эхэлсэн. Өнгөрсөн хугацаанд 23 удаа цахим хэлбэрээр 2235 дугаарыг олгож, дугаарын дагуу ирсэн 1094 өргөдлийг бүртгэн хянан шийдвэрлэсэн талаар Ашигт малтмалын газраас мэдээлж байна. Мөн өнөөдрийн байдлаар 452 аж ахуй нэгжид 2.55 сая гектар талбайд хайгууд хийх тусгай зөвшөөрлийг олгохоор шийдвэрлэжээ. Өөрөөр хэлбэл 1094 аж ахуй нэгж, хуулийн этгээд тусгай зөвшөөрөл хүссэнээс 452-т нь лиценз олгоод байгаа гэсэн үг юм.
Аймаг орон нутгийн удирдлагуудыг "тойгдох”-оос өөр аргагүй юу?
Бүхий л шалгуурыг давсан аж ахуй нэгж байгууллагууд лиценз авч чадахгүй байгаа гол шалтгаан нь аймаг орон нутгийн удирдлагуудын зөвшөөрөл гэнэ. Ашигт малтмалын газраас тухайн газарт лиценз эзэмших бүрэн боломжтой гэж шийдвэрлэсэн ч аймаг, сумын удирдлагууд үндэслэлгүйгээр зөвшөөрөл олгохоос татгалзаж буй. Мөн тэдгээрээс цөөнгүй нь хугацаандаа хариу ирүүлэлгүй өргөдлийг хав дарснаас ийнхүү лиценз олголт тодорхой хугацаанд гацаад байгаа аж. Иймээс л лиценз хүсэгчид аймгийн удирдлагын зөвшөөрлийг авахын тулд өргөл барьц барьж, "тойгдох”-оос өөр аргагүйд хүрээд байгаа бололтой.
Зүүн аймгуудад 11.94 сая гектар талбайд лиценз олгоно
Монгол улсын нутаг дэвсгэрийн уртрагийн 104 градусаас зүүн хагасын 11.94 сая гектар талбайд хайгуул хийх зөвшөөрөл хүсэгчдийг өнөөдрөөс/VIII.24/ эхлэн Ашигт малтмалын газарт бүртгэж эхэлж байна. Мөн баруун хагаст үлдсэн 1.95 сая гектар талбайд хайгуулын тусгай зөвшөөрөл хүссэн өргөдлийг ч мөн адил хүлээн авах юм байна. Одоогоор Ашигт малтмалын газарт бүртгүүлсэн нийт 1,138 аж ахуйн нэгж байгаагаас 873 нь VPN төхөөрөмж авч цахим хэлбэрээр өргөдлийн дугаар олгох ажиллагаанд оролцож байгаа гэнэ.
Хайгуулын тусгай зөвшөөрөл хэрхэн авах вэ?
Ашигт малтмалын хайгуулын тусгай зөвшөөрлийг манай улсад татвар төлөгч хуулийн этгээдэд олгох бөгөөд нэг тусгай зөвшөөрлөөр олгох хайгуулын талбай нь 25-150 мянган гектар байх юм. Мөн хайгуулын зөвшөөрөл авахыг хүссэн хуулийн этгээд нь "Хайгуулын тусгай зөвшөөрөл авахыг хүссэн хуулийн этгээдийн бүртгэлийн хуудас”-ийг үнэн зөв алдаагүй бөглөн АМГ-т бүртгүүлэх юм. Мөн бүртгэл хийлгэхдээ дараах материалыг хавсаргах юм. Үүнд,
-Улсын бүртгэлийн гэрчилгээний хуулбар
-Хуулийн этгээдийн улсын бүртгэлийн лавлагааг хавсаргах/лавлагаанд гадаадын хөрөнгө оруулалтын байдал, хөрөнгө оруулалтын хувь хэмжээ зэргийг тодорхой тусгах/ шаардлагатай юм байна.
Дээрх бүртгэлийг хийлгэсэн хуулийн этгээд нь хайгуулын тусгай зөвшөөрөл хүсэх өргөл гаргах дугаарыг цахимаар олгох системийг худалдан авах шаардлагатай аж. Ийнхүү өргөдлийг цахимаар бүртгэж, зөвшөөрөл хүсэгчид VPN гэгч төхөөрөмжийг худалдан авснаар зөвшөөрөл хүсэгчийн материалыг кибер халдлага, хэн нэгэн алба хаагчийн ашиг сонирхлоос бүрэн хамгаалах гэнэ.
VPN төхөөрөмжийг хэрхэн авах вэ?
VPN төхөөрөмжийн үнэ нь 280 мянган төгрөг бөгөөд "Аксэнсэ Айти Суппорт” ХХК-ийн Хаан банкны 5000010281 дансанд төлбөрийг тушааснаар төхөөрөмжийг авах боломжтой болох юм. Мөн системд нэвтрэх эрхийг цахимаар авах үйлчилгээний хөлсийг АМГ-н Төрийн сангийн 900018003 дансанд төлөх гэнэ. Хураамжийн тухайд 14 хоног нэвтрэх эрх нь 500 мянга, хоёр сар нэвтрэх эрх нь хоёр сая төгрөг. Ингээд өргөдлийн дугаарыг авсан аж ахуй нэгж хайгуулын тусгай зөвшөөрөл хүссэн өргөдлийн хураамж болох 250 мянган төгрөгийг АМГ-ын төрийн сан дахь дээрх дансанд тушааснаар тусгай зөвшөөрөл хүсэх өргөдлийн сонгон шалгаруулалтад оролцох боломжтой юм.
Uuluurhai.mn
