Манай анхны Ерөнхийлөгч П.Очирбат ойрын өдрүүдэд олон нийтийн мэдээллийн хэрэгслүүд, телевизээр тогтмол гарч, Таван Толгойн орд, түүний хөрөнгө оруулалтын гэрээ, хэлэлцээрийн талаар байн байн ярилцлага өгсөөр байна.

Гэхдээ Таван толгойн асар их баялаг орд, түүнийг эх орон, ард түмэндээ ашигтай, хэрэгтэй, шударга нөхцлөөр ашиглах тухай хэлж ярьж байгаа байр суурь, үзэл бодол нь нэг л биш санагдаад байна.

-"Юун тэр хувьцаа, тэр Эрдэнэс таван толгойн хувьцаа гэж юу юм бэ, хэнд ч байхгүй ш дээ, хэрэггүй цаас” гэх ухааны зүйл яриад л, эх орныхоо энэ их баялагаас хэд гурван төгрөгийн ашиг хүртчих болов уу гэсэн ард олныхоо итгэл, сэтгэл рүү ус цацаад байгаа нь үнэхээр муухай харагдаж байна.

Ядахдаа нөгөө телевизийн зураглаач нар нь анхны Ерөнхийлөгчтэй маань хийж буй ярилцлагынхаа үед тун эвгүй өнцөөс зургийг нь авсан байхыг нь яанаа. Тохуу хийгээд ч байгаа юм уу, сайн ойлогдохгүй байна. Их л уурлаж, бухимдсан хүний зүс царайг харуулах гэж бодсон байх л даа. Гэхдээ л муухай харагдаж байна.

Хувийн ашиг сонирхол, хүсэл мөрөөдөл нь зөрчилдөөд байгаа нэгнийгээ, жишээлбэл УИХ-ын дарга З.Энхболд болон бусад төрийн түшээдийг элдвээр хэлж загнах юм. Уг нь тэд, тэр их баялагтай, нөөцтэй ордоосоо иргэн нэг бүртээ бага ч болтугай ашиг хүртээе гээд л байгаа юм биш үү. Зарим нэг нь төр засгийн хөрөнгөөр буюу татвар төлөгч ард түмний хөрөнгөөр хайгуул хийж, нөөцийг нь тогтоосон өөрсдийнхөө уул, уурхайн баялаг ордоос зөвхөн 20 гэр бүлийг хагартлаа баяжуулах уу, 20 жилийн хугацаанд монголын ард түмэн хүн шиг амьдардаг болох уу гэж хэлээд байгаа биздээ.

Хүн хүнээ байхаар муухай харагддаг гэж та бидний аав ээж, эмээ өвөө сургадаг байсансан. Цаг өөр болсон гэхэд арай ч ийм дээ хүрчихээгүй байх гэж горьдож явлаа. Гэвч хөрөнгө мөнгө, эрх мэдэл, хайр хүндэтгэл хүнийг, тэр байтугай хүнийг тун хурдан эвдэж байгааг харахаар тун муухай санагдаж, харагдаж байна.

Монгол оронд Ардчилсан хувьсгал ялж анхны Ерөнхийлөгчөөрөө ард түмэн Пунсалмаагийн Очирбатыг сонгосон. Харин анхны Ерөнхийлөгч маань Ардчилсан хүчнээс нэр дэвшихээсээ өмнө Монголын төрийг 70-80 жил дарангуйлж ирсэн МАХН-ын гишүүн байсныг уншигч та бүхэн санаж байгаа байх. Тэрээр 1993 онд Ардчилсан хүчнээс нэр дэвшиж өөрийн нам нэгтэй явсан МАХН-аас нэр дэвшигч, соён гэгээрүүлэгч, сэхээтэн Лодонгийн Түдэвтэй өрсөлдөхөд ард түмэн түүнийг сонгож Монгол улсын Ерөнхийлөгч болгож байлаа.

Энэ хүн иргэдийнхээ эрх, эрх чөлөө, сайн сайхан амьдралын баталгаа нь болсон анхны ардчилсан үндсэн хуулийг хоёр гардан авч, тамга тэмдгээ дарж, мутрын үсгээ зурж байлаа. Түүнийг техникийн ухааны дэд эрдэмтэн, Эдийн засгийн шинжлэх ухааны доктор, профессор цолтой хэмээн википедиа нэвтэрхий тольд бичжээ.

1997 онд П.Очирбатыг Ерөнхийлөгчийн сэнтийгээс буухад нь тэр үед Ерөнхий сайд байсан Мэндсайханы Энхсайхан нэгэн захирамж гаргаж байсныг энд сонирхуулья.

ЗАСГИЙН ГАЗРЫН ТОГТООЛ (ЗАХИРАМЖ)

ПУНСАЛМААГИЙН ОЧИРБАТЫН ХАНГАМЖ, ХАМГААЛАЛТЫН ТАЛААР АВАХ ЗАРИМ АРГА ХЭМЖЭЭНИЙ ТУХАЙ

1997 оны 8 дугаар сарын 13-ны өдөр

Улаанбаатархот

Дугаар 183

Монгол Улсын Ерөнхийлөгчийн тухай хуулийн 16 дугаар зүйлийн 6 дахь хэсэг, Төрийн тусгай хамгаалалтын тухай хуулийн 6 дугаар зүйлийн 1 дэх хэсгийн 3 дахь заалт, Монгол Улсын Их Хурлын "Пунсалмаагийн Очирбатын хангамж, хамгаалалтын тухай” 58 дугаар тогтоолыг үндэслэн Монгол Улсын Засгийн газраас ТОГТООХ нь:

1.Монгол Улсын анхны Ерөнхийлөгч П.Очирбатад 1997 оны 6 дугаар сарын 20-ны өдрөөс эхлэн насан туршид нь Засгийн газрын гишүүний тухайн үеийн цалинтай тэнцэх сул цалинг олгож байхыг Сангийн сайд П.Цагаан, Засгийн газрын хэрэг эрхлэх газрын дарга Т.Лхагваа нарт даалгасугай.

2.П.Очирбатыг төрийн ёслолын арга хэмжээнд төрийн өндөр албан тушаалтны /Засгийн газрын гишүүний/ зэрэг зиндаагаар оролцуулж байхыг төрийн ёслолын албанд үүрэг болгосугай.

3.П.Очирбат болон гэр бүлийг нь Улсын клиникийн нэгдсэн П эмнэлгийн үйлчилгээгээр хангаж байхыг Эрүүл мэнд, нийгмийн хамгаалалын сайд Л.Зоригт даалгасугай.

4.Монгол Улсын Ерөнхийлөгч П.Очирбатын бүрэн эрхийн хугацаа дуусгавар болсон өдрөөс эхлэн дөрвөн жилийн хугацаанд өвлийн орон сууцаар хангаж, түүний зардлыг улсын төсвөөс санхүүжүүлэхийг Сангийн сайд П.Цагаан, төр, засгийн Үйлчилгээ, аж ахуйг эрхлэх газрын дарга Д.Баяндалай нарт даалгасугай.

5.П.Очирбатыг 1997 оны 6 дугаар сарын 20-ны өдрөөс эхлэн дөрвөн жилийн хугацаанд төрийн тусгай хамгаалалтад авч, орон тооны жолооч бүхий суудлын автомашин, холбоогоор үйлчилж тэдгээрийн зардлыг төсвөөс гаргаж байхыг Улсын аюулгүй байдлыг хангах газрын дарга Ж:Энхнасанд даалгасугай.

6.50 хавтгай дөрвөлжин метр ашигтай талбай бүхий хувийн орон сууцны байшингийн зураг, төсвийг хийх,түүнийг барьж ашиглалтад оруулахтай холбогдсон зардлыг хөрөнгө оруулалтын зардлаас гаргахыг Сангийн сайд П.Цагаанд зөвшөөрсүгэй.

7. Уг байшинг барьж байгуулах ажлыг хариуцан зохион байгуулахыг Төр, засгийн Үйлчилгээ, аж ахуйг эрхлэх газрын дарга Д.Баяндалайд үүрэг болгосугай.

8.Төрийн ордонд ажил уулзалтын байр гаргаж өгөхийг Төр, засгийн Үйлчилгээ, аж ахуйг эрхлэх газрын дарга Д.Баяндалайд үүрэг болгосугай.

9.Энэ тогтоолын биелэлтэд хяналт тавьж ажиллахыг Засгийн газрын Хэрэг эрхлэх газрын дарга Т.Лхагваад даалгасугай.

Монгол Улсын Ерөнхий сайд М.ЭНХСАЙХАН

Сангийн сайд П.ЦАГААН.