Монголоос Хонконгийн хөрөнгийн бирж дээрээс хамгийн их хөрөнгө босгож байсан "ММС” корпораци буюу манайхны мэддэгээр "Энержи ресурс” дампуурахдаа тулаад байна.

Олон улсын зах зээлийн үнэлгээний "Moody's” агентлаг гурван долоо хоногийн өмнө тус компанийн зээлжих зэрэглэлийг дахин бууруулж ССС- болгосон нь тус компани нэг өдрийн дотор зах зээлийн үнэлгээнийхээ талыг алдсан талаар мэдээлсэн.

"Mongolian Mining Corporation”-ийн хувьцаа өнгөрсөн нэгдүгээр сарын 29-ний байдлаар 37 хувиар унаж, 3 хонконг цент болсон.

Улмаар зах зээлийн үнэлгээ нь 38-хан сая ам.доллар болж буурсан бөгөөд бондын төлбөрөө өнөөгийн нөхцөлөөр барагдуулахад хүндрэлтэй болсон аж.

Ингээд ч зогсоогүй тус компаний зах зээлийн үнэлгээ буюу хувьцааны ханш улам л уруудсан. Энэ байдлаас нь хараад тус компанийг дампуурах тухай асуудал яригдсаар байна.

2014 оны есдүгээр сард "Mongolian Mining Corporation”-ий зээлжих зэрэглэлийг "Caa2" зэрэглэлээс "Ca" болгож бууруулсан байдаг. Энэ нь тус корпорацийн бэлэн мөнгөний нөөц болон хөрөнгийн урсгал нь өр төлбөрөө барагдуулахад хангалтгүй гэж дүгнэсэн хэрэг юм.

"Ca" зэрэглэл нь "Moody's”-ийн үнэлгээний системийн доороосоо хоёр дахь үнэлгээнд тооцогддог ажээ. Тэгвэл эдүгээ ССС- буюу хамгийн доод үнэлгээнд хүрчихээд байна. Сүүлийн гурван жилийн турш тус компанийн зээлжих зэрэглэлийг буулгасаар ирсэн нь ч тодорхой болжээ.

Өнгөрөгч онд "Mongolian Mining Corporation”-ийн зүгээс оны эхний хагас жилийн тайлангаа танилцуулсан ба уг тайланд бэлэн мөнгөний нөөц нь өнгөрсөн оны сүүлийн хагасаас 183 сая ам.доллараар буурч, 70 сая ам.доллар болсон. Бэлэн хөрөнгийн нөөц ийнхүү 2.5 дахин буураад байхад тус компанийн өр, зээлийн үлдэгдэл 59 сая ам.доллараар л хасагдаж, 814 сая ам.доллар болжээ.

Тус компанийг ийм байдалд хүрэхэд хэн хэний буруу байв гэдэг хамгийн эхэнд тавигдах асуулт.

"Энержи ресурс” компани Ухаа худаг уурхайгаас урагш БНХАУ-ын хил хүртэл 260 км төмөр зам тавих асуудлыг 8-9 жилийн өмнө Засгийн газарт тавьсан.

Гэвч манай төр засгийн эрх баригчид уг асуудлаар мөн хугацаанд маргаж ирснээс ажил нь урагш ахиагүй.

Нэг нь төмөр зам тавих эрх олгосон ч нөгөө нь цуцалж ирсэн. Энэ бүхэн тус замыг ямар царигтай байх маргаантай хамгийн их холбоотой. Ийнхүү хэрүүл хийсээр нүүрс үнэтэй байх тэр цаг үеийг алдсанаар ийнхүү бүтээн байгуулалт ихээр хийсэн компани дампууралд тулсан хэрэг.

"Энержи ресурс”-ын хувьд Өмнөговь аймгийн Цогтцэций суманд томоохон бүтээн байгуулалт олныг хийсэн. Тэд цахилгаан станц, нүүрс баяжуулах үйлдвэрээс эхлээд орон сууцны хотхон, хил хүртэлх 240 км автозам, сургууль цэцэрлэг, онгоцны буудал гээд их ажил хийсэн байдаг.

Гэвч олборлосон нүүрсээ их хэмжээгээр экспортлох төмөр замгүйгээс нүүрс үнэтэй, эрэлт ихтэй үеийг ашиглаж чадаагүй хэрэг.

Мөн тэдний барьж босгосон нь хэтэрхий эртэдсэн хэрэг мэт. Хэрвээ эдгээр бүтээн байгуулалтынхаа ядаж талыг хойш тавьсан бол өдгөө тус компанид дампуурал шууд нүүрлэхгүй байсан биз. Тус компани эдгээр хөрөнгөө нөхөөд олчихно гэдэгтээ итгэлтэй байсан учраас л ийнхүү хийсэн хэрэг.

Гэхдээ төр засагт байсан "хамтрагчид” нь эсрэг талынхнаа яаж ч чадалгүй байсаар тус компанийг ийм байдалд хүргэсэн нь ч тодорхой байна. Тэгэхээр "Энержи ресурс” компани дампууралд тулсанд төр засгаас эхлээд өөрсдийнх нь буруутай үйлдлүүд ч байгаа ажээ. Тиймээс ч тус компани том Тавантолгойг өөрийн болгож, сэргэхийг хүссэн гэх яриа ч үнэний ортойг үйл явдал гэрчилж байгаа тухай цахим сүлжээнийхэн бичсээр байна.