Ерөнхий сайд Н.Алтанхуягийн ахлах зөвлөх Л.Гансүхэд холбогдох хэргийн талаар өнөөдөр Авлигатай тэмцэх газар болон Нийслэлийн ерөнхий прокурорын газраас дэлгэрэнгүй мэдээлэл хийлээ.

Ерөнхий менежерээр Ерөнхий сайд Н.Алтанхуягийг УИХ-ын гишүүн байхад зөвлөхөөр нь ажиллаж байсан М.Тулга гэх залуу, санхүү хариуцсан ерөнхий нягтлангаар Л.Гансүхийн эхнэрийн төрсөн дүүгийнх нь охин Мөнгөнтуяа нар тус тус ажиллаж байжээ

АТГ-аас энэхүү хэргийг 2014 оны дөрөвдүгээр сараас эхлэн эрүүгийн хэрэг үүсгэн шалгаж байгаа бөгөөд нийт арван хүнийг сэжигтэн яллагдагчаар татан шалгаж байгаагаас зургааг нь цагдан хориод байгаа аж. Шалгалтаар Нүүрс хөтөлбөрийг хэрэгжүүлэх зорилгоор 2012 оны арваннэгдүгээр сарын 1-ний өдөр "Багануур” ХХК болон "MGLSB” компаниуд гэрээ байгуулсан байдаг.

Гэрээ байгуулахаас өмнөх өдөр Л.Гансүх болон "MGLSB” компанид менежерээр ажиллаж байсан М.Тулга нар нь Жижиг дунд үйлдвэрийг хөгжүүлэх сангаас 1.5 тэрбум төгрөгийн санхүүжилтийг авах хүсэлтийг тавьсан бөгөөд тус оныхоо арванхоёрдугаар сард уг санхүүжилтээ авчээ.

Ийнхүү гэрээний дагуу нүүрсийг авахаар болж "MGLSB” компани нь УБТЗ компанитай нүүрсийг тээвэрлэх гэрээг мөн хийжээ. Нүүрсийг "Багануур” ХХК-аас авахдаа уг компаниар нүүрсийг шигшүүлж, ангилуулах ажлыг хийлгүүлсэн ч гарсан зардлаа /түлшний зардалд 399,3 сая төгрөг, шигших технологийн түрээсийн 62,9 сая төгрөг/ төлөөгүй аж. Шигших ажил болон нүүрсний жингийн зөрүүгээр "Багануур” ХХК 2,8 тэрбум төгрөгийн алдагдал хүлээжээ.

Нүүрсийг "Багануур” ХХК-аас нэг тонн тутмыг 27 мянга 500 төгрөгөөр худалдаж авахаар тохиролцсон байна. "MGLSB” компанийн ерөнхий захирлаар Л.Гансүхийг Байгаль орчны сайд байхад туслахаар нь ажиллаж байсан Эрдэнэбулганыг томилсон бөгөөд компани нь гадаад худалдаа эрхлэх чиглэлээр 2010 онд  байгуулагдаж байжээ.

УБТЗ-аар нүүрс тээвэрлүүлэхдээ  "Багануур” ХХК-аас тонн тутмыг нь 27 мянга 500 төгрөгөөр авсныгаа 40 мянган төгрөгөөр тооцож худалдаж байжээ. Өөрөөр хэлбэл нэмэгдсэн үнээрээ тээврийн хөлснийхөө талыг нь УБТЗ-д төлсөн бол 820 сая төгрөгийг бэлнээр төлжээ.

Үүний дараагаар Л.Гансүх Эрдэнэбулган нарын хооронд тодорхойгүй шалтгаанаар асуудал үүсч 2013 оны есдүгээр сард "MGLSBD” /өмнөх нэр дээр D үсгийг нэмсэн/ компанийг байгуулж захирлаар нь Л.Гансүхийнг УИХ-ын гишүүн байхад нь туслахаар нь ажиллаж байсан Даваахүү гэх хүнийг томилжээ. Ийнхүү 2013 оны есдүгээр сарын 27-ны өдөр "MGLSBD” ХК болон "Багануур” ХХК-ын хооронд нүүрс худалдах гэрээг байгуулжээ. Ингэхдээ "Багануур” ХХК-ын ТУЗ нь "нэг тонн нүүрсийг 27 мянга 500 төгрөгөөр хуралдах нь  компанид алдагдалтай байна” гээд нүүрсийг тонн тутамд нь 39 мянга болгох шийдвэр гаргасан ч Л.Гансүх нарын хүмүүс урьдын адил үнээр худалдаалахыг шаардан, шийдвэрт нөлөөлж ТУЗ-ыг дахин хуралдуулан 27 мянга 500 төгрөгийг хэвээр нь байлгаж чаджээ.

"MGLSBD” ХК-ий ерөнхий менежерээр Ерөнхий сайд Н.Алтанхуягийг УИХ-ын гишүүн байхад зөвлөхөөр нь ажиллаж байсан М.Тулга гэх залуу, санхүү хариуцсан ерөнхий нягтлангаар Л.Гансүхийн эхнэрийн төрсөн дүүгийнх нь охин Мөнгөнтуяа нар тус тус ажиллаж байжээ.

2012, 2013 оны хоёр гэрээний дагуу 249 мянган тонн нүүрсийг 6,8 тэрбум төгрөгөөр "Багануур” ХХК-аас худалдаж авсан бол 2012-2014 онуудад борлуулахдаа нийт /иргэдэд 80 мянган төгрөгөөр/ 19,9 тэрбум төгрөгөөр борлуулжээ.

Мөн "MGLSB” ХК-ий Даваахүү болон Мөнгөнтуяа нар хуурамч тайлан бүрдүүлж, Нүүрс хөтөлбөрийг дэмжих, ажилчдын цалин хөлсийг бүрдүүлэх саналыг гарган Засгийн газрын нөөц хөрөнгөөс 854 сая төгрөгийг 2012 оны арванхоёрдугаар сарын 21-ны өдөр гаргуулсан болохыг Үндэсний Аудитын газар тогтоожээ. Мөн "MGLSB” болон "MGLSBD” компаниуд нь нийт 4 тэрбум 915,6 сая төгрөгийн ашигтай ажиллажээ.

Мөн шалгалтын явцад  тухайн хүмүүс дээрх аж ахуй нэгжүүдийн кассаас ямар ч баримтгүйгээр ихээхэн хэмжээний мөнгийг авсан болохыг тогтоожээ.

Нүүрс хөтөлбөрийх хүрээнд шалгагдаж байгаа Л.Гансүхтэй холбоотой хэргээр АТГ-ын талаар хэвлэл мэдээллийн хэрэгслээр байгууллагын үйл ажиллагаа хууль зөрчиж буй мэтээр ойлгуулах, хүний эрхэнд халдаж байгаа мэт буруу ташаа мэдээллүүд сүүлийн үед гарч байгаа учир өнөөдрийн мэдээллийг хүргэж байна гэж тэд хэллээ.